ترمپ د مودي او عمران خان سره د کشمير په اړه خبرې کړي
۱۳۹۸ مرداد ۲۹, سهشنبه
ولسمشر دونالد ترمپ د دوشنبې په ورځ (۲۰۱۹م کال د اگست ۱۹ نیټه) د هند له لومړي وزير نريندرا مودي او پاکستان له لومړي وزیر عمران خان سره خبرې کړي، څو د دغه دواړو گاونډيو هيوادونو ترمنځ د هغې ترنگلتيا په اړه بحث وکړي چې د هند له خوا د کشمير نيمه خپلواک حیثيت تر ختمولو وروسته رامنځته شوې ده.
ترمپ په خپل تويتر کې ليکلي: «له خپلو دوو ښو ملگرو، د هند له لومړي وزیر نريندرا مودي او پاکستان له لومړي وزير عمران خان سره مې د تجارت، ستراتيژيکي همکارۍ او تر ټولو مهم چې هند او پاکستان د کشمير پر موضوع ترنگلتيا راکمه کړي، خبري وکړې» هغه لیکلي: «وضيعت سخت دی خو خبرې مو ښې وې.»
په روانه مياشت کې د هند له خوا د ۳۷۰ مادې د له منځه وړولو چې د دغه هېواد تر ولکې لاندې کشمير ځانگړې حیثيت يې ختم کړ، د دواړو هيوادونو ترمنځ لا دمخه خړې پړې اړيکي لا پسې خرابې کړې.
د هند تر دې اعلان وروسته په کشمير کې گرځبندیز وضع شوی وو او تلیفوني او انترنتي خدمات قطع شوي ول. د دې په ځواب کې پاکستان له هند سره تجارتي اړيکي پرې کړې او په پاکستان کې یې د هند سفير اجراج کړ.
ولسمشر ترمپ ټينگار وکړ چې دواړه هيوادونه دې له زغم څخه کار واخلي. سپيني ماڼۍ ويلي دي چې ترمپ له عمران خان سره په خبرو کې «د ترنگلتيا د کمولو او هند سره د معتدلې لهجې د کارولو» پر اړتيا بحث کړی او همدا راز یې له مودي سره هم د تليفوني تماس له لارې «د ترنگلتيا د راکمولو پر اهميت» خبرې کړي.
ترمپ له دواړو هيوادونو سره د اقتصادي او تجارتي اړيکو په هکله هم غږيدلی دی. د سپيني ماڼۍ له خوا له مودي سره د تليفوني تماس په اړه ويل شوي: «دواړو مشرانو پر دې هم خبرې وکړې چې څرنگه به هغوی د امریکا ـ هند اقتصادي اړيکې د تجارت د پراخولو له لارې لا پسې قوي کړي او دوی ډېر ژر بيا لېدو ته ليواله دي.»
د کشمير سيمه په ۱۹۴۷م کال کې د پاکستان او هند تر آزاديدو وروسته د دواړو هيوادونو ترمنځ ويشل شوې ده. د دغي لانجمنې سيمې پر سر تر اوسه دوه جنگونه او بې شمیرې نښتې شوي دي.
BS/NZ (Reuters, AFP,AP)
زموږ له آرشيف څخه: