حوثي ياغيان د سولي په کنفرانس کي گډون کوي
۱۳۹۴ خرداد ۱۵, جمعه
د رويترز خبري آژانس د راپور له مخي د يمن په کړکېچ کي دواړو ښکېلو غاړو د ملگرو ملتونو د سولي په کنفرانس کي گډون ته تياری ښوولی دئ.
د حوثيانو د سياسي دفتر غړي ضيف الله الشامي د پنجشنې په ورځ اعلان وکړ چي ژنيو ته به د ملگرو ملتونو د سولي په کنفرانس کي د گډون له پاره خپل استازی ولېږي.
الشامي ويلي دي چي دا کار د دې له پاره کوي چي د ملگرو ملتونو د سولي د کنفرانس ملاتړ وکړي. ملگرو ملتونو اعلان کړی دئ، چي کنفرانس به د جون مياشتي پر ۱۴ نېټه په ژنيو کي جوړ سي.
د چهارشنبې په ورځ د عبدربه منصور هادي دولت اعلان وکړ چي د ملگرو ملتونو د سولي کنفرانس ته به خپل استازی ولېږي.
د يمن په چارو کي د ملگرو ملتونو ځانگړي استازي اسماعيل شېخ احمد، دغه هيواد ته څو واري سفر وکړ څو ښکېلي غاړي د خبرو اترو مېز ته راوبولي او په دې بريالی سوی دئ چي دواړه اړخونه د ملگرو ملتونو د سولي په کنفرانس کي گډون ته تيار کړي.
دا لا روښانه نه ده چي ملگري ملتونو به د يمن د مخکني جمهور رئيس عبدالله صالح استازی دغه کنفرانس ته را وبلي او که نه. د صالح پلويان د يمن په اوسني کړکېچ کي د حوثيانو ملاتړي بلل کيږي.
په داسي حال کي چي حوثي ياغيانو په دغه کنفرانس کي بې له شرطه د گډون خبره کړې ده، د منصور هادي حکومت ويلي دي چي له ياغيانو سره په يوه شرط خبري اتري کوي چي هغوی «قانوني حکومت» ومني.
حوثي شيعه ياغيان اوس د يمن ډېره برخه په خپل کنترول کي لري. منصور هادي چي تر اوسه لا د يمن رسمي جمهور رئيس بلل کيږي د ياغيانو له خوا د پلازمېني صنعا تر نيولو وروسته له هيواده تېښتي ته مجبور سو. منصور هادي اوس په سعودي عربستان کي دئ.
د سعودي عربستان په مشرتوب سيمه ييز ائتلاف د منصور هادي د حکومت ملاتړ کوي او په يمن کي پر حوثي ياغيانو باندي له څو مياشتو راهيسي بمبارۍ کوي.
سعودي عربستان او متحدان ئې پر ايران باندي تور لگوي چي د حوثي ياغيانو په ملاتړ سره د يمن په کورنيو چارو کي مداخله کوي. خو ايران دا نه مني او وايي چي پر يمن باندي د سعودي هوايي بمبارۍ پر دغه هيواد باندي «يرغل» او له نړيوالو قوانينو څخه سرغړونه ده.
د ملگرو ملتونو د راپور له مخي د روان کال له مارچ مياشتي راهيسي تر اوسه پوري په يمن کي تر ۲۰۰۰ زيات انسانان وژل سوي او په زرونو نور ټپيان سوي دي.