دانفورد: د افغان ځواکونو جګړه ایز ماموریت ګټمن دی
۱۳۹۷ فروردین ۲, پنجشنبه
د امریکا د پوځ لوی درستیز جوزیف دانفورد ویلي دي چې د روان کال په ترڅ کې د خوندي او بریالیو پارلماني او په راتلونکي کال کې د ولسمشرۍ له پاره انتخابات به د امریکا متحدو ایالاتو د نوي جنګي ستراتیژۍ چې ترمپ په تیر اګست مياشت کې تائید کړه، د بریالیتوب مهم فکتورونه وي.
روانه اونۍ دانفورد په افغانستان کې دی او له لوړپوړو افغان چارواکو سره ملاقات لري. نوموړی همدا راز په شمال کې د مزارشریف او په شرق کې د ائتلافي ځواکونو له قوماندانانو سره ملاقاتونه لري.
دانفورد او نور امریکايي چارواکي د پارلماني ټاکنو د دقیق وخت په هکله ډیر اندیښمن نه دي. دغه ټاکني په اصل کې د روان کال په جولای میاشت کې پلان شوي وې، خو کيدای سي د روان کال د مني تر موسمه پورې وځنډیږي.
د ائتلافي ځواکونو د ستراتیژک پلان جوړولو مسئول امریکايي برید جنرال مایکل فینزل چې له دانفورد سره په دې سفر کې ملتیا کوي خبریالانو ته وویل چې د روان کال په ترڅ کې د ټاکنو مهالویش دومره ارزښت نه لري څومره چې بریالۍ، خوندي او بااعتباره ټاکنې ارزښت لري.
نوموړي همدا راز وویل چې د ټاکنو ځنډول به ښايي چارواکو ته لا ډیر فرصت په لاس ورکړي چې امنیت ښه کړي او دا ډاډمن کړي چې د ټاکنو څارونکي په هر ځای کې شتون ولري. هغه وویل چې تراوسه پورې هم ډیر کارونه پاتې چې باید تنظیم شي.
د ټاکنو له پاره پلان شوي پوځي عملیات
د چهارشنبې په ورځ په ګمبیري کې له قوماندانانو سره تر کتنې وروسته دانفورد ويلي دي چې افغان ځواکونو په دې سیمه کې د ډیر نفوس لرونکې سیمې مشخصې کړي دي. هغه زياته کړې ده چې يادي سیمي د ټاکنو او امنیت له پاره ډیرې مهمې دي او له همدې امله دوی به د وخت په تیریدو سره وويني چې له ګڼه ګوڼې ډکې سیمې خوندي شي.
د ټاکنو د وخت په هکله د پوښتنې په ځواب کې دانفورد ويلي دي چې ژمنه دا ده چې پارلماني ټاکنې د روان کال په ترڅ کې او ولسمشریزې ټاکنې راتلونکی کال ترسره شي. دانفورد ويلي دي چې د سه شنبې په ورځ له افغان ولسمشر سره پر کتنې سربیره له نورو افغان مشرانو سره د ملاقات پرمهال د ټاکنو د دقیقې نیټې موضوع په بحث کې یاده نه شوه.
نوموړی امریکايي قوماندان چې د افغانستان د جګړې د ارزونې له پاره افغانستان ته تللی همدا راز ويلي دي چې د ټاکنو دقیقه نیټه د انتخاباتو د خپلواک کمیسیون په امادګیو پوري اړه لري. دانفورد زیاته کړې ده چې اوس تر ټولو مهمه موضوع د امنیت تأمینول دي ترڅو خلک رایه ورکړي.
په عین وخت کې تر ټولو ستره اندیښنه په دې وروستيو وختونو کي په کابل کې خونړي بریدونه دي، چې ډېر تلفات لري. همدا د چهارشنبې په ورځ چې افغانانو په ټول افغانستان کې د نوي کال لمړۍ ورځ لمانځله، د چارواکو په حواله په کابل کې د شعیه مسلمانانو پر یوه زیارت د ځانمرګي برید په پایله کې ۳۳ کسان وژل شوي دي. د عامې روغتیا وزارت ویاند وحید مجروح په وینا په دې ځانمرګي برید کې چې مسئولیت یې ترهگري ډلي داعش منلی دی ۶۵ کسان نور ټپیان شوي دي.
سربیره پر دې د روان کال په جنوري میاشت کې یو امبولانس موټر برید هم د ۱۰۳ کسانو ژوند واخیست او شاوخوا ۲۳۵ تنه نور یې بیا ټپیان کړل.
تر همدغو خونړیو بریدونو او ډيرو تلفانو وروسته، امریکا متحدو ایالاتو اعلان وکړ چې د طالبانو ضد جګړه کې اوس د کابل امنیت لومړیتوب لري او د امریکا په مشرتوب ائتلاف به دغه ښار ته لا ډیر سلاکاران ولیږي څو له ځايي پولیسو سره ګډ کار وکړي. په عین حال کې د امریکا ځانګړي ځواکونه هم په دې ښار کې ځینې چاپې وهي.
پر ورته موضوع یو انځوریز البوم زموږ له آرشیف څخه: