د آلمان د مهاجرت اداره ډیر شمیر ژباړونکي له دندو ګوښه کوي

د آلمان د مهاجرت فدرال اداره د یو ګڼ شمیر ژباړونکو د فعالیت په هکله له بې اعتماده کېدو اندېښنه لري. د ۲۰۱۷م کال نه نیولې د روان کال تر پایه پورې د داسې ژباړونکو شمیر چې بیا په کار نه ګمارل کیږي، ۲۱۰۰ کسانو ته رسیږي.

د آلمان د مهاجرت او پناه غوښتنې فدرال ادارې یا «بامف» ویلي  چې دوی په پام کې لري چې د ۲۰۱۸م کال تر پایه پورې، په مجموعي توګه ۲۱۰۰ تنه ژباړونکي د خپل راتلونکي کال په ماموریت کې په دندو ونه ګماري. د یادې ادارې د دغه اقدام تر شا اصلي دلیل، د ژباړونکو په فعالیت کې د دوی نه مسلکیتوب په ګوته شوی دی.

آلمانۍ ورځپاڼې «بیلډ» د آلمان په پارلمان یا بوندیستاګ کې د چپیانو د ګوند لخوا د مطرح شوې پوښتنې په ځواب کې د فدرال آلمان د کورنیو چارو وزارت په حواله لیکلي چې یوازې په ۲۰۱۷م کال کې له ۳۰ تنو ژباړونکو سره همکاري پای ته رسیدلې. د ورځپاڼې په رپوټ کې همدا راز راغلي چې له دندې د دې کسانو د لیرې کولو تر شال دلیل «د چلند اصول ماتول» دي.

دا په داسې حال کې ده چې په دې وروستیو کې د آلمان په بریمن ښار کې د مهاجرت او پناه غوښتنې پر ادارې یا «بامف» شک شوی چې ګواکې له ۲۰۱۳م کال نه نیولې تر ۲۰۱۶م کال پورې یې ۱۲۰۰ داسې کسانو د مهاجرت غوښتنې ته مثبت ځواب ویلي، چې په اصل کې په شرایطو برابر نه وو.

د رویترز خبري آژانس په حواله، په دې پیښه کې ظاهراً د بریمن ښار د مهاجرت او پناه غوښتنې د ادارې د ځايي دفتر پر پخوانۍ مشرې، د بریمن او نیدرزاکسن ښارونو پر درې مدافع و کیلانو او یو ژباړونکي باندې د ښکیلتیا شک کیږي.

د دې تورونو تر معلومیدو وروسته، د آلمان په پارلمان کې د دې هیواد د کورنیو چارو وزارت استازي ګونتر ګرینګس څرګنده کړه چې ارزول شوي دوسیې به له سره وپلټل شي. د انګلا میرکل په مشرۍ د دموکرات مسیحي ګوند دغه سیاستوال له «راینشه پوست» رسنۍ سره په مرکه کې وویل چې فدرال حکومت دغه موضوع « ډیره جدي» ګڼي. کرینګس په دې هکله وویل: «دا طبیعي ده چې موږ دغې پیښې ته د یوه فرصت په توګه ګورو او باید فوراً په راتلونکي کې پام وکړو چې د پناه غوښتنې دوسیې په اساسي او منتقدانه توګه و ارزول شي.»

زموږ له آرشیف څخه:

په اروپايي ټولنه کې د مهاجرو له پاره مهم معلومات

کډوال څوک دی؟

په اصل کې کډوال هغه چاته ویل کیږي چې د خپل هیواد په داخل او یا بهر کې بل نوي ځای ته ولاړ شي. کډوال داسې کسانو ته ویل کیږي چې په خپله خوښه خپل هیواد ترک کوي. دوی له خطر سره مخ نه وي او ښايی د ژوند د نه مساوات له امله کډوالۍ ته اړ شوي وي.

په اروپايي ټولنه کې د مهاجرو له پاره مهم معلومات

مهاجر څوک دی؟

په قانون کې مهاجر د کډوال برعکس یو داسې کس ته ویل کیږي چې د ژنیو د تړون په شرایطو برابر وي. په دې ترتیب یو مهاجر داسې څوک دی چې د خپل هیواد پریښودو ته د مختلفو لاملونو له امله اړ شوی وي. دغه لاملونه کیدای شي نژادي، مذهبي، ملیتي، سیاسي او یا د ټولنې د یوې ډلې غړیتوب وي.

په اروپايي ټولنه کې د مهاجرو له پاره مهم معلومات

اقلیمي مهاجر بیا څوک دی؟

اقلیمي مهاجر داسې یو کس ته ویل کیږي چې د هوا یا د اقلیم د بدلون له امله د خپل ټاټوبي یا هیواد پریښودو ته اړ شوی وي. دغه راز مهاجر بیا د ژنیو د تړون په شرایطو کې برابر نه دي.

په اروپايي ټولنه کې د مهاجرو له پاره مهم معلومات

پناه غوښتونکی څوک وي؟

هغه کسان چې د پناه غوښتنې له پاره یې درخواست کړی وي او راتلونکي یې لا هم معلوم نه وي، د پناه غوښتونکو په ډله کې راځي. د آلمان د مهاجرت او پناه غوښتنې اداره یا «بامف» د دې پریکړه کوي چې آیا یو کس د پناه غوښتنې حق لري او یا د مهاجر په توګه ژوند کولای شي او که نه. تر هغه پورې چې د داسې کس په هکله پریکړه کیږي، هغوی په ځانګړو کمپونو کې ساتل کیږي.

په اروپايي ټولنه کې د مهاجرو له پاره مهم معلومات

هیواد بدلونکی څوک دی؟

بهرني اتباع یا هیواد بدلوونکي داسې کسان دي چې آلمان ته راځي او د راتګ هدف او موده یې معلومه نه وي. دوی کولای شي د مختلفو لاملونو له امله راشي. د بیلګې په توګه د خپل مسلک، د پناه غوښتنې او یا هم د لوړو زده کړو د ترلاسه کولو له پاره آلمان ته راځي.

په اروپايي ټولنه کې د مهاجرو له پاره مهم معلومات

په آلمان کې د پناه غوښتنې حق څوک لري؟

د قانون او د آلمان د اساسي قانون په رڼا کې، تر سیاسي تعقیب لاندې خلک کولای شي چې د پناه غوښتنه وکړي. تر سیاسي تعقیب لاندې کس هغه چا ته ویل کیږي چې د یوه انسان په توګه په خپل هیواد کې د سیاسي دلایلو له امله انزوا شوی وي او د انسان په توګه د هغه حیثیت له ویجاړۍ سره مخ وي.

په اروپايي ټولنه کې د مهاجرو له پاره مهم معلومات

د پناه غوښتنې حق

په بیړنیو حالاتو لکه اقتصادي ناورین له امله یو څوک نه شي کولای چې د پناه غوښتنه وکړي. په دې ترتیب سیاسي پناه یوازې هغه چا ته ورکول کیږي چې له یو خوندي هیواد څخه نه وي راغلی.

په اروپايي ټولنه کې د مهاجرو له پاره مهم معلومات

د یو کس خوندي د مبدأ هیواد یا اصلي هیواد څه معني لري؟

خوندي اصلي هیواد خپل ښاریان د سیاسي لاملونو له امله نه محکمه کوي او نه هم داسې سزاګانې عملي کوي چې د بشریت خلاف وي. که څه هم د خوندي هیوادونو اتباع هم په اسانی سره له یو هیواد څخه نه شي اخراجیدلای. په آلمان کې هر پناه غوښتونکی باید دا په اثبات ورسوي چې هغه په خپل هیواد کې له سیاسي اړخه خوندي نه دی.

په اروپايي ټولنه کې د مهاجرو له پاره مهم معلومات

خوندي اصلي هیواد

د یو داسې کس چې خپل اصلي هیواد یې خوندي وي، د هغه د پناه غوښتنه معمولاُ منفي ځواب ترلاسه کوي تر هغه پورې چې د خپلې پناه غوښتنې له پاره کره شواهد په لاس کې ونه لری. په ۲۰۱۷م کال کې په آلمان کې په دې هکله ډیر تاوده بحثونه وشول چې آیا افغانستان یو خوندي هیواد دی او که نه او آیا افغان مهاجر باید اخراج شي او که نه.

په اروپايي ټولنه کې د مهاجرو له پاره مهم معلومات

د پناه غوښتنې په قانون کې کوم بدلونونه راغلي؟

د تازه وضع شویو قوانینو په اساس، د پناه غوښتنې لړۍ چټکه شوې ده. چارواکي باید د یوې پناه غوښتنې له پاره د څو اونیو په ترڅ کې د هو او نه ځواب ووايي. د رد په صورت کې د دریو اونیو په ترڅ کې باید یو کس د پناه غوښتونکو له کمپ څخه اخراج شي.

په اروپايي ټولنه کې د مهاجرو له پاره مهم معلومات

د پناه غوښتنې د رد په صورت کې څه پیښیږي؟

که چیرته په آلمان کې د یو کس د پناه غوښتنه رد شي، نو په دې صورت کې هغه ته مهاجر نه ویل کیږي او داسې یو کس اړ دی چې آلمان ترک کړي. د اخراج ګواښ هم کیدای شي شتون ولری. که چیرته یو کس له آلمان څخه د مختلفو دلایلو له امله ونه ایستل شي، نو دا کس په آلمان کې د یوې مودې له پاره زغمل کیږي. دلایل کیدای شي مرض، د اسنادو نه شتون، یا په خپل هیواد کې خراب شرایط وي.

په اروپايي ټولنه کې د مهاجرو له پاره مهم معلومات

د دوبلین پروسه څه ته وايي؟

د پناه د هرې غوښتنې په هکله په آلمان کې پریکړه نه کیږي. د دوبلین د قانون په اساس، د اروپايي ټولنې هغه هیواد چې پکې یو کس د لومړي ځل له پاره داخل شوی وي، د پناه غوښتنې د لړۍ مسوولیت لري. که چیرته همدا لومړی هیواد خوندي وي، نو پرته له ځنډ څخه مهاجر اخراجیږي او اړ دی چې په همدې هیواد کې د پناه له پاره غوښتنه وکړي.

په اروپايي ټولنه کې د مهاجرو له پاره مهم معلومات

د دوبلین قانون

د ۲۰۰۳م کال د دوبلین ۲ قوانین باندې په ۲۰۱۵م کال کې ډیرې نیوکې وشوې. دغه نیوکې په ځانګړې ډول هغه وخت زیاتې شوې چې اروپا د مهاجرت له کړکیچ سره لاس او ګریوان وه او زرګونه مهاجرینو په یونان کې کې بند پاتې وو. دوی شکایت کوي چې د اروپايي ټولنې غړي هیوادونه د دوبلین ۲ قوانینو ته په اشاره له یونان څخه مهاجرین نه قبلوي.

موږ تعقيب کړئ