د آلمان د کورنیو چارو وزارت: تر مني پورې د اخراج لومړنۍ مرکز جوړوو

د اخراج د مرکز جوړول د دې هیواد د کورنیو چارو وزیر د ماسترپلان یوه برخه ده. ټاکل شوې چې د اخراج د مرکز په نامه له دې مرکز څخه به پناه غوښتونکي وروسته له هغې وتلی شي چې د پناه د غوښتنې په هکله یي پریکړه شوي وي.

د یوې آلمانۍ ورځپاڼې په حواله، د آلمان فدرال حکومت غواړي چې د روان کال د مني موسم په لومړۍ میاشت کې د پناه غوښتونکو له پاره دغه راز یو مرکز جوړ کړي. د آلمان په بایرن ایالت کې د مسیحي دیموکرات ګوند لوړپوړي سیاستوال شتیفان مایر د «زود دویچه څایتونګ» په نامه آلمانۍ ورځپاڼې ته ویلي دي چې د آلمان فدرال پولیس به د دې مرکز مسوولیت پر غاړه ولري.

د مایر په وینا، دغه پریکړه د چارواکو د اجندا په سر کې ځای لري. نوموړي ویلي: «زه فکر کوم چې موږ به وکولای شو چې د ایستر (د مسحیانو اختر) تر رخصتیو وروسته په دې هکله یوه طرح وړاندې کړو.» مایر غواړي چې د دې پروژې له پاره له شته بنسټونو او تأسیساتو کار واخلي.

په دې ترتیب امکان لري چې د بایرن ایالت په بامبرګ او منشینګ کې د مهاجرینو د ترانزیت له مرکزونو او یا هم د هیسن ایالت په ګیسن ښار کې د مهاجرینو د ثبت لومړني مرکز څخه استفاده وشي.

مایر په دې هکله وویل چې په ګیسن کې دغه مرکز د ۱۳ زره کسانو ظرفیت لري او په دې ښار کې د امریکايي ځواکونو د سرتیرو د استوګنې ځای هم د درې زره کسانو له پاره اضافي ځای لري.

په ۲۰۱۷م کال کې باید ۶۴ زره او ۹۱۴ کسانو آلمان ترک کړی وای، خو د اسنادو د نه شتون له امله دوی زغمل کیږي

مایر د خپلو خبرو په دوام کې ویلي دي چې سربیره پر دې د آلمان د فدرال حکومت هدف باید د اخراج په موخه د مهاجرینو د اخراج ځایونو د پام وړ زیاتوالی وي. د آلمان په بایرن ایالت کې د سوسیال مسیحي ګوند د دې سیاستوال په حواله د تیرکال په ترڅ کې د ۶۵ زره کسانو اخراج له دې امله امکان نه درلود، ځکه چې دغو کسانو د اخراج له پاره اړین سفري اسناد لکه پاسپورتونه او یا د هغې بدیل اسناد نه درلودل.

په خپله خوښه خپلو هیوادونو ته د تګ له پاره د مهاجرینو هڅول

تر دې وړاندې، د آلمان د پراختیایي چارو وزیر ګیرد مولر، اعلان کړی وو چې ټاکل شوې دوی په کلني ډول نیم میلیارد یورو په داسې یو پروګرام مصرف کړي چې هدف یې خپلو هیوادونو ته په خپله خوښه د مهاجرینو بیرته تګ ته هڅول دي.

آلمان د مهاجرو په خپله خوښه د ستنيدو يو نوی پروگرام په نظر کې نيولی

ټاکل شوې چې دغه پیسې به په داسې پروژو مصرف کړل شي چې د مهاجرینو په اصلي هیوادونو کې اوسمهال جریان لري. مولر په دې هکله ویلي وو چې ټاکل شوې چې په عراق کې د دوی د وزارت په ملاتړ د زیمنس په نامه آلمانی شرکت، په دې هیواد کې پنځه زره بیرته راغلي مهاجر او ځايي کسان د برق او د انرژۍ د تخنیک په برخه کې وروزي.

پر ورته موضوع زموږ له آرشیف څخه یو انځوریز البوم: 

کوم شمیر پاکستاني مهاجر له اروپا اخراج شوي دي؟

بریتانیا

په تیرو پنځو کلونو کې نږدې ۴۰ زره پاکستاني مهاجر په غیر قانوني ډول په بریتانیا کې اوسیدل، چې د محکمې د حکم پر اساس ورته د هیواد پریښودلو ویل شوي ول. په همدې موده کې تر ۲۷ زرو ډیر پاکستاني مهاجر یا خو بیرته خپل هیواد ته ستانه شوي او یا هم کوم بل اروپایې هیواد تللي دي.

کوم شمیر پاکستاني مهاجر له اروپا اخراج شوي دي؟

یونان

په تیرو پنځو کلونو کې په یونان کې داسې ۴۳ زره پاکستاني مهاجر موجود ول چې په دغه هیواد کې یې د استوګنې قانوني اسناد نه درلودل او دوی ته امر شوی وو چې له دغه هیواد څخه دې ووزي. په دې موده کې ۱۶۷۰۰ پاکستاني مهاجر له یونان څخه وتلي دي.

کوم شمیر پاکستاني مهاجر له اروپا اخراج شوي دي؟

فرانسه

فرانسې له ۲۰۱۲ م څخه تر ۲۰۱۶ م کاله پورې په دغه هیواد کې هغو یولس نیم سوه مهاجرو ته له دغه هیواد څخه د وتلو امر وکړ چې د پناهندګۍ غوښتنلیکونه یې رد شوي دي. په دې موده کې یوازې ۲۶۵۰ پاکستاني مهاجر له فرانسې څخه وتلي دي.

کوم شمیر پاکستاني مهاجر له اروپا اخراج شوي دي؟

هسپانیا

په همدې موده کې نږدې اته زره پاکستاني مهاجرو ته د هسپانیې د پریښودلو امر شوي دي، خو د رسمي شمیرو له مخې یوازې شپږنیم سوه یې پاکستان ته ستانه شوي او یا هم کوم بل اروپایې هیواد ته یې پناه وړې.

کوم شمیر پاکستاني مهاجر له اروپا اخراج شوي دي؟

بلجیم

په تیرو پنځو کلونو کې نږدې پنځه نیم زره داسې پاکستاني مهاجرو ته چې په دغه هیواد کې یې د اقامت اجازه نه درلوده له بلجیم څخه د وتلو امر شوی وو. په همدې منځ کې له دغه هیواد څخه د وتونکو پاکستاني مهاجرو شمیر ۷۶۵ تنه وو.

کوم شمیر پاکستاني مهاجر له اروپا اخراج شوي دي؟

آلمان

تر ۲۰۱۲ م کاله پورې یوازې شاوخوا ۳۷۵ تنه پاکستاني مهاجر داسې ول چې باید له آلمان څخه وتلي وای، خو په ۲۰۱۶ م کال کې د داسې کسانو شمیر ۲۴ سوو ته لوړ شو او په دغو پنځو کلونو کې د دا ډول مهاجرو مجموعي شمیر ۵۰۰۰ ته ورسید. د یورو سټیټ د شمیرو له مخې په همدې موده کې ۱۰۵۰ تنه پاکستاني مهاجر له آلمان څخه وتلي دي.

کوم شمیر پاکستاني مهاجر له اروپا اخراج شوي دي؟

اتريش

په تیرو پنځو کلونو کې په مجموع کې ۳۲۲۰ پاکستاني مهاجرو ته د دې هیواد له خاورې څخه د وتلو امر شوی دی. په همدې منځ کې یوازې ۵۳۵ تنه له دغه هیواد څخه وتلي دي.

کوم شمیر پاکستاني مهاجر له اروپا اخراج شوي دي؟

هنګري

هنګري له ۲۰۱۲ م کال څخه د ۲۰۱۶ م کال تر پای پورې نږدې ۳۰۰۰ پاکستاني مهاجر غیر قانوني بللي او له دغه هیواد څخه یې ورته د وتلو امر کړی وو. خو په همدې موده کې له دغه هیواد څخه نږدې ۱۵ سره مهاجر وتلي دي.

کوم شمیر پاکستاني مهاجر له اروپا اخراج شوي دي؟

ایټالیا

د همدې پنځو کلونو په موده کې د ایټالیا حکومت هم تر دوه نیم زرو ډیرو پاکستاني مهاجرو ته له دې هیواد څخه د وتلو امر کړی دی. خو د یورو سټیټ په حواله په همدې موده کې له ایټالیا څخه د وتونکو پاکستاني مهاجرو شمیر یوازې ۴۰۰ تنه دی.

کوم شمیر پاکستاني مهاجر له اروپا اخراج شوي دي؟

په ټوله اروپا کې مجموعي وضعیت

په مجموعي توګه د اروپایې اتحادیې په ۲۸ غړو هیوادونو کې تر ۱۲۸ زرو ډیر پاکستاني مهاجر په غیر قانوني توګه اوسیدل او دوی ته د محکمې او اړونده ادارو له خوا له دغو هیوادونو څخه د وتلو امر شوی وو. په مجموعي توګه ۵۴۷۰۰ پاکستاني مهاجر د اروپایې اتحادیې له غړو هیوادونو څخه وتلي دي. لیکونکو: شمشیر حیدر

موږ تعقيب کړئ