د آلمان پارلمان د هولوکاست د قربانیانو د یادون ورځ ولمانځله
۱۳۹۵ بهمن ۸, جمعه
د آلمان د پارلمان مشر نوربیرت لیمرت، د نازي رژیم له خوا د یهودیانو د وژنې قربانیانو ته د درناوي مراسم ترسره کړل. د جمعې په ورځ د آلمان په بیلابیلو ښارونو کې دغه شان مراسم ترسره شول.
لیمرت وویل چې سږ کال د یادون ورځ په ځانګړې توګه هغه کسان یادوي چې ناروغه او بې وسه ول او د نازیانو د مشرتابه له خوا د ژوند کولو وړ نه بلل کیدل. هغه زیاته کړه چې دغه کسان بیا په اصطلاح د «اتانازي» یا «اسانه مرګ» قربانیان دي. «اتانازي» په یوناني اصطلاح هغه یو مرگ ته وايي چې یو شخص د خپلې سختې ناروغې له امله ژوند کول نه غواړي او له ډاکتر یا خپلوانو څخه غواړي چې پریږدي چې په «اسانې» سره مړ شي.
تاریخ پوهان په دې نظر دي چې د نازیانو د دغه پروګرام په ترڅ کې په ټوله اروپا کې شاوخوا ۳۰۰۰۰۰ کسانو خپل ژوند له لاسه ورکړ. لیمرت وویل: «د اسانه مرګ پروګرام او په اروپا کې د یهودانو د عام وژنې تر منځ ډیرې زیاتې اړیکې موجودې وې.»
هغه زیاته کړه: «د هولوکاست له پاره د چمتوالي په موخه، د وژنې په کمپونو کې کاریدونکی وژونکی ګاز لومړی د اسانه مرګ پروګرام پر قربانیانو باندې وآزمویل شو.»
له ۱۹۹۶ کال راهیسې آلمان د جنوري پر ۲۷مه نټه د هولوکاست د قربانیانو یادون کوي. په همدې نیټه د پخواني شوروي ځواکونو په پولند کې د اشویتز له کمپ څخه یو شمیر یهودان آزاد کړل. ملګرو ملتونو بیا په ۲۰۰۵ کال کې یوه اعلامیه تصویب کړه چې له مخې یې د جنوري ۲۷مه نیټه په ټوله نړۍ کې د هولوکاست د یادون ورځې په توګه ونومول شوه.