د افغان رد شوو مهاجرینو الوتکې له فرانکفورت هوايي ډګر څخه د کابل په لور پرواز وکړ

د یو شمیر افغان رد شوو مهاجرینو الوتکې نن د چهارشنبې په ماښام د آلمان له فرانکفورت هوايي ډګر څخه د کابل په لور پرواز وکړ. په دې ډله مهاجرینو کې زیاتره د آلمان د هسن او بایرن له ایالتونو څخه افغان مهاجرین شامل وو.

نن د چهارشنبې ورځې په ماښام (دسمبر میاشتې په ۶ نیټه) د افغان رد شوو مهاجرینو یوه ډله د آلمان له فرانکفورت هوايي ډګر څخه د کابل په لور انتقال شول. ویل کیږي چې دا ځل ۲۷ تنه افغان رد شوي مهاجرین له آلمان څخه کابل ته لیږدول کیږي.

د فرانکفورت له هوايي ډګر څخه د دې الوتنې څخه څو ساعتونه وړاندې د ۴۰۰ نه تر ۵۰۰ پورې لاریون کوونکي د دې هوايي ډګر مخې ته راټول شوي وو او له دې اقدام سره یې خپل مخالفت څرګند کړ. دوی د آلمان له حکومت څخه غوښتنه کوله چې د افغان رد شوو مهاجرینو اخراج دې ژر تر ژره بند کړي.

د افغان مهاجرینو د اخراج په هکله غبرګونونه

دا په داسې حال کې ده چې د همدې اونۍ په ترڅ کې په آلمان کې ګڼ شمیر پیلوټانو افغانستان ته د رد شوو افغان مهاجرینو د الوتکې له الوزولو ډډه کړې وه او نه یې غوښتل چې په دې پروګرام کې برخه واخلي.

Demo gegen geplante Abschiebung am Frankfurter Flughafen

په آلمان کې څو ځله د افغان مهاجرینو د اخراج پر ضد لاریونونه شوي

د هغو معلوماتو له مخې چې د آلمان حکومت، په پارلمان کې د کيڼ اړخي ګوند د غوښتنې په ځواب کې وړاندي کړي دي، د اخراجي مهاجرو ۲۲۲ پروازه د پيلوټانو له خوا ځنډول شوي دي. دغه پيلوټان نه غواړي چې افغانستان ته د رد شويو افغان مهاجرو د اخراج په جنجال کي ونډه ولري.

بل لوري ته بیا د رد شوو مهاجرینو موضوع لا هم د آلمان په سیاست کې ډیره توده ده. د آلمان حکومت د مهاجرینو د داوطلبانه بیرته تګ د موضوع د تشویق له پاره یو لړ تازه پروګرامونه هم پیل کړي چې په دې ترڅ کې دغو مهاجرینو ته د ډیرو مالي امکاناتو د ورکړې موضوع هم یو نوی اقدام دی.

په خپله خوښه خپلو هیوادونو ته تګ

د آلمان د کورنيو چارو وزارت وايي چي د ۲۰۱۸ کال د فبرورۍ مياشتي تر ۲۸مې نېټي به د رد سوو پناه غوښتونکو سره اضامي مالي مرستي وکړي. خو دغه مرستي به د هغو پناه غوښتونکو له پاره وي چي په رضاکارانه توګه له آلمان څخه خپل هيواد ته ستانه سي.

د کورنيو چارو د وزارت په وينا د دغه پروګرام له مخي به د بېلګي په توګه هر کس وکولای سي چي په خپل هيواد کي د «بېرته ادغام» له پاره ۳۰۰ يورو مرسته وغواړي. د دې تر څنګ به کورنۍ وکولای سي چي په خپل هيواد کي د خپل کور د ترميم له پاره، د کرايې له پاره، د بنسټيزه کورني سامان لکه پخلنځي له پاره سامان او د ورته څيزونو له پاره د آلمان له اړونده ادارې څخه پيسې وغواړي. دغه مرستي د کورنۍ له پاره تر ۳۰۰۰ يورو پوري او د مجردانو له پاره تر ۱۰۰۰ يورو پوري حجم درلودلای سي..

له افغان مهاجرینو د پخواني ولسمشر حامد کرزي غوښتنه

د دې ټولو سربیره، د افغانستان پخواني ولسمشر حامد کرزي د دویچه ویله په مرکز کې د یوې مرکې په ترڅ کې له اروپايي هیوادونو مننه وکړه چې افغانانو ته د اوسیدو امکانات برابروي.

Deutsche Welle Bonn | Hamid Karzai, ehemaliger Präsident Afghanistans

حامد کرزي له افغان مهاجرینو وغوښتل چې د کوربه هیوادونو قوانین مراعات کړي

نوموړي همدا راز په دې مرکه کې وویل چې هغه افغانان چې دلته یعنې په اروپا کې رد کیږي، باید په هسکه غاړه بیرته خپل وطن ته ولاړ شي او خپل هیواد جوړ کړي. هغه همدا راز ویلي چې هغوی چې دلته په آلمان یا نورو اروپايي هیوادونو کې د پاتې کیدو اجازه ترلاسه کوي باید د دې هیوادونو قوانینو ته درناوی وکړي او عملي یې کړي.

په عین وخت کې بیا د آلمان د حکومت د دې اقداماتو پر وړاندې ګڼ شمیر مهاجرین پلوه او خیریه سازمانونه نیوکې کوي او وايي چې افغانستان خوندي نه دی نو له دې کبله دې آلمان د افغان مهاجرینو د اخراج په هکله بیا کتنه وکړي.

د بخښني نړیوال سازمان د شمیرو له مخې د ۲۰۱۶م کال له اکتوبر میاشتې راهيسي ۱۳۲ تنه افغان مهاجر چې د پناه غوښتنه یې رد شوې وه، له آلمان څخه اخراج شوي دي. یاد سازمان د آلمان په پلازمینه برلین کې ویلي دي چې د افغانستان د اوسني امنیتي وضعیت په پام کې نیولو سره، دې هیواد ته د مهاجرو اخراج د نړیوالو قوانینو تر پښو لاندې کول او غیر مسوولانه اقدام دی.

د اروپا د بشري حقونو کنوانسیون هغو هیوادونو ته چې پکې د بیرته لیږل کیدونکو کسانو ژوند ته خطر وي، منع ګرځولی دی. تیر کال په افغانستان کې نږدې ۱۱ زره او ۵۰۰ افغانان وژل یا ټپي شوي دي. پر دې سربیره د روان میلادي کار له پیله تر سپتمبر میاشتې پوري تر ۸ زرو ډیر افغانان د زور زیاتیو قرباني شوي هم دي.

د افغان مهاجرینو د اخراج په هکله یو انځوریز رپوټ زموږ له آرشیف څخه: 

سياست

له آلمان څخه اخراج شوي ۸ تنه رد شوي افغان مهاجرین د کابل هوايي ډګر ته رسیدلي. په پیل کې آلماني رسنیو ویلي وو چې په دې پرواز کې ۱۵ افغان مهاجرین بیرته خپل هیواد ته استول کیږي، خو تیره ورځ بیا رسنیو د ۱۲ کسانو یادونه وکړه. په پای کې د کابل له هوايي ډګر څخه یوازې ۸ مهاجرین بهر شوي.

سياست

د دې رد شوو افغان مهاجرینو الوتکه د سې شنبې (د ۲۰۱۷ کال د سپتمبر میاشتې په ۱۲ نیټه) د آلمان له دوسلدورف هوايي ډګر څخه د کابل هوايي ډګر په لور والوته. آلماني چارواکو ویلي چې د اخراج کیدونکو افغانانو په دې دور کې داسې مهاجرین دي چې د پناه غوښتنه یې رد شوې او ځینو یې جرمونه ترسره کړي.

سياست

په کابل کې د آلمان پر سفارت باندې تر خونړي برید وروسته، افغانستان ته د رد شوو اخراجیدونکو مهاجرینو لړۍ ځنډیدلې وه. له هغې پیښې وروسته، دا لومړی ځل دی چې یو ډله افغان رد شوي مهاجرین له آلمان څخه افغانستان ته اخراجیږي.

سياست

د افغانستان د مهاجرینو وزارت چارواکو ویلي چې ټاکل شوې وه په دې پرواز کې ۱۱ افغان مهاجرین افغانستان ته اخراج شي، خو یوازې ۸ مهاجرین رسیدلې دي. د یاد وزارت یو چارواکي آصف عباسي د فرانسې خبري آژانس ته ويلي چې «دا چې پاتې درې کسان ولې نه دي اخراج شوي، دلیل یې موږ ته هم معلوم نه دی.»

سياست

په داسې حال کې چې آلماني چارواکو ویلي چې د اخراجیدونکو مهاجرینو په ډله کې لږ تر لږه درې کسان د آلمان له زندان څخه د کابل هوايي ډګر ته اخراج شوي، خو افغان چارواکو د دې کسانو د راتلونکي برخلیک په هکله تر اوسه پورې کوم نظر نه دی ورکړی.

سياست

د اخراج شوو کسانو له ډلې څخه پنځه رد شوو افغان مهاجرینو د آلمان په بایرن آیالت کې ژوند کوو. د بایرن د کورنیو چارو وزیر یواخیم هرمن ویلي چې دغه کسان مجرم وو. د هغه په وینا له دوی څخه لږ تر لږه دوه کسان یې د جنسي تیري د جرم له امله په زندان کې وو.

سياست

د رد شوو افغان مهاجرینو له ډلې څخه ځینو یې هیڅ هم نه درلودل. دوی ادعا کوله چې دوی په کور کې وو او د آلمان د پولیسو لخوا ونیول شول او سمدلاسه د دوسلدروف هوايي ډګر ته انتقال او له هغه ځایه افغانستان ته اخراج شول. آلماني چارواکي وايي چې څو میاشتې وړاندې یې دغو کسانو ته خبر ورکړی چې باید د آلمان خاوره ترک کړي.

سياست

د آلماني چارواکو د څرګندونو سربیره، ځینې اخراج شوي مهاجرین وايي چې دوی په آلمان کې کوم جرم نه دی کړی او یوازې له دې امله اخراج شوي چې د دوی د پناه غوښتنه نه ده منل شوې. دغه مهاجر هغه مهال چې کابل ته ورسیدو، سترګې یې له اوښکو ډکې شوې خو معلومه نه ده چې دغه اوښکې د خوښی دې که د خفګان.

سياست

بل لوري ته بیا په آلمان کې د بشري حقونو مدافع سازمانونه او ګڼ شمیر نورې ډلې افغانستان ته د دې مهاجرینو پر اخراج نیوکې کړي. دوی ویلي چې د بشري حقونو او امنیت له امله افغانستان په داسې حالت کې نه دی چې آلمان دې وکولای شي رد شوي افغان مهاجرین هلته اخراج کړي.

سياست

د سپتمبر په ۱۲مه په آلمان کې د دوسلدروف هوايي ډګر په مخ کې د بشري او د مهاجرینو د حقونو فعالانو د رد شوو افغان مهاجرینو د اخراج پرضد لاس لاریون او اعتصاب وکړ. ویل کیږي چې د آلمان په لږ تر لږه څلورو ایالتونو کې د رد شوو مهاجرینو د ساتلو له پاره ساتن ځایونه جوړ شوي.

سياست

د سپتمبر په ۱۲مه د آلمان د دوسلدورف په هوايي ډګر کې د لاریون سره په یو وخت کې شاوخوا ۲۰۰ کسانو افغانستان ته د رد شوو افغان مهاجرینو د ډله ایز اخراج پر ضد لاریون وکړ.

سياست

لاریون کوونکو داسې شعارونه لیږدول چې د افغانستان امنیتي وضعیت یې تشریح کوو. دوی افغانستان ته د «اخراج د توقف» غوښتنه کوله.

سياست

په دې لاریون کې ګڼ شمیر افغان مهاجرینو هم ګډون کړی وو. د دوی په لاسونو کې په ځینو شعارونو کې لیکل شوي وو چې «افغانستان خوندي نه دی.»