د جيش محمد ډلې مشر څوک او ولي په تور ليست کې شامل شوی؟

هند له څو کلونو راهيسې هڅه کوله چې مسعود اظهر د ملگرو ملتونو د ترهگرو په نړيوال نوملړ کې شامل شي. د هغه د جيش محمد په نوم ډلې د هند تر ولکې لاندې کشمير کې د فیبرورۍ د خونړيو بريدونو پړه منلې وه.

د ملگرو ملتونو امنيت شورا د پاکستان ميشتې وسله والې ډلې جيش محمد مشر مسعود اظهر د نړيوالو ترهگرو په تور ليست کې شامل کړی دی. دې ډلې په روان میلادي کال کې د هند تر ولکې لاندې کشمير کې د هغه بريد پړه منلې وه چې ۴۰ عسکر پکښې ووژل شول او هند او پاکستان یې د يوې جگړې تر حده رسولي ول.

د ملگرو ملتونو پر داعش او القاعده شبکې د بندیزونو کميټې د چهار شنبې په ورځ پر مسعود اظهر هم د القاعدې شبکې سره د اړيکو له کبله بندیز اعلان کړ.

د جيش محمد ډلې پر بنسټ ايښوونکي او مشر مسعود اظهر په دې بندیزونو کې د سفر او وسلو د رانيولو بندیز شامل دی. همدا راز به د نوموړي شتمنۍ هم کنگل شي. د جيش محمد ډله لا له ۲۰۰۱م کال راهيسې د ملگرو ملتونو د ترهگرو ډلو په نوملړ کې شامله وه. پاکستان او هند هم پر دې ډله قانوني بندیز لگولی وو.

خو هند تل ادعا کوله چې مسعود اظهر او ډله یې په پاکستان کې په آزاده توگه حرکت کوي او له خپل گاونډي یې غوښتنه کوله چې د خپلې خاورې څخه د دغه وسله والې ډلې عملیات ودروي.

هند د ملگرو ملتونو په امنيت شورا کې په څو ځلي هڅه کړې وه چې مسعود اظهر د ملگرو ملتونو له خوا د ترهگر په توگه درجه بندي شي خو په ملگرو ملتونو کې د هند دا هڅه هر وارې د چين له خوا د ويټو د حق په کارولو سره له ناکامې سره مخامخ شوې وه. خو دا ځل چين هم د دې کار مخنيوی و نه کړ.

جيش محمد ډلې د کشمير د بريد پړه منلې وه

د کشمير لانجې افراطيت ته وده ورکړې

هند د روان کال په فيبرورۍ مياشت کې د کشمير په پلوامه سيمه کې پر خپلو نيمه پوځي ځواکونو د حملې په غبرگون کې د پاکستان په شمال ختیځ کې هوايي بريدونه وکړل. هند ادعا کوله چې هلته د وسله والو ډلو کمپونه دي. پاکستان بيا وروسته د هند دوې جټ الوتکې وويشتلې او يو پېلوټ یې ونيو.

د پاکستان او هند ترمنځ د غچ اخيستني دغه سيالي چې دواړه گاونډي هېوادونه یې تر دې د مخه په ۱۹۴۷م کال کې د آزادۍ له اخيستو راهيسي درو جگړو ته اړ کړي ول، د نړيوالو په منځگړتوب يو څه آرامه شوه.

د جيش محمد بسنټ ايښوول

مسعود اظهر په ۲۰۰۰م کال کې د جيش محمد ډلې بنسټ تر هغه وروسته کيښود چې د يوې تښتول شوې الوتکې د ۱۵۵يرغمل شويو مسافرو د آزادولو په بدل کې د هند له يوه زندانه آزاد شو. د دې ډلې تر جوړېدو يوازې یو کال وروسته اظهر مسعود د هغه بريد پړه پر غاړه واخيستله چې په نوي ډيلي کې پر پارلمان شوې وه او لس کسان پکښې ووژل شول. هغه وخت هم هند او پاکستان يوې جگړې ته نژدې شوي ول.

د هند پر پارلمان تر بريد وروسته نوموړی په پاکستان کې ونيول شو او په کور کې نظر بند شو. خو بيا وروسته د لاهور يوې محکمې په ۲۰۰۲م کال کې پر هغه د لگول شويو تورونه په اړه د شواهدو د نه شتون له کبله آزاد کړ.

B.S/N.Z(AFP,AP,Reuters)

زموږ له آرشيف څخه: 

ترهگرۍ په ۲۰۱۸کال کې کوم هیوادونه تر ټولو زيات ځپلي دي؟

عراق

«د ترهګرۍ نړیوال شاخص» د رپوټ له مخې تیرکال په عراق کې په ترهګریزو بریدونو کې ۴۲۷۱ تنه وژل شوي، په داسې حال کې چې دا شمیر په ۲۰۱۶م کال کې نږدې ۱۰ زره ول. د داعش په بریدونو کې ۵۲ سلنه کمښت رامنځته شوی دی، خو سره له دې هم عراق په ترهګرۍ کې د ښکيلو هیوادونو په کتار کې له تیرو ۱۴ کلونو راهیسې د نوملړ په سر کې ځای لري.

ترهگرۍ په ۲۰۱۸کال کې کوم هیوادونه تر ټولو زيات ځپلي دي؟

افغانستان

د نوي رپوټ له مخې افغانستان په دې نوملړ کې په دویم مقام کې ځای لري. دا په داسې حال کې ده چې سږ کال په افغانستان کې د ترهګریزو پيښو په پایله کې د وژل شویو کسانو شمیر تر عراق هم لوړ دی. تیر کال په نږدې ۱۲ سوه ترهګریزوو پيښو کې ۴۶۶۳ کسان وژل شوي او تر ۵۰۰۰ ډیر ټپیان شوي دي.

ترهگرۍ په ۲۰۱۸کال کې کوم هیوادونه تر ټولو زيات ځپلي دي؟

نایجیریا

په ۲۰۱۷م کال کې په نایجیریا کې د ترهګریزو بریدونو په پایله کې تر دوه نیم زرو ډیر کسان وژل شوي دي، دا د تیرکال په مقابل کې ۱۶ سلنه کم دی.

ترهگرۍ په ۲۰۱۸کال کې کوم هیوادونه تر ټولو زيات ځپلي دي؟

سوریه

د ۲۰۱۶ م کال په پرتله تیرکال په دغه هیواد کې د تلفاتو شمیر ۴۸ سلنه کم وو. خو سره له دې هم دغه هیواد له ترهګریزو بریدونو څخه د اغیزمنو شویو هیوادونو په کتار کې په څلورم مقام کې ځای نیولی دی. په دې کال په سوریې کې نږدې ۱۱ سوه تنه وژل شوي دي.

ترهگرۍ په ۲۰۱۸کال کې کوم هیوادونه تر ټولو زيات ځپلي دي؟

پاکستان

په پاکستان کې تیرکال د ۵۷۶ بیلابیلو ترهګریزو بریدونو په پایله کې اته نیم سوه انسانان وژل شوي دي. د۲۰۱۶م کال په پرتله تیرکال د پاکستان د تحریک طالبان په بریدونو کې د وژل شویو کسانو ۱۷ سلنه کم ول. د داعش د خراسان څانګې په بریدونو کې ۵۰ سلنه او د لشکر جهنګوي په بریدونو کې ۱۷ سلنه زیاتوالی راغلی دی.

ترهگرۍ په ۲۰۱۸کال کې کوم هیوادونه تر ټولو زيات ځپلي دي؟

سومالیا

سومالیا په دې نوملړ کې په شپږم مقام کې ځای نیولی دی. سومالیا په ۲۰۱۶م کال کې په دې نوملړ کې په ۷ مقام کې ځای نیولی وو. په دې هیواد کې تر نوي سلنه د ډیرو بریدونو پړه الشباب ترهګرې ډلې پر غاړه اخیستې ده.

ترهگرۍ په ۲۰۱۸کال کې کوم هیوادونه تر ټولو زيات ځپلي دي؟

هندوستان

هندوستان هم په دې نوملړ کې له ۸ څخه ۷ شمیر ته راغلی دی. په دې هیواد کې هم د ترهګریزو بریدونو په شمیر کې زیاتوالی راغلی دی او هم د وژل شویو کسانو په شمیر کې. په ۲۰۱۷م کال کې په دې هیواد کې د ترهګریزو بریدونو په پایله کې ۳۸۴ تنه ووژل شول او ۶۰۰ ټپیال شول.

ترهگرۍ په ۲۰۱۸کال کې کوم هیوادونه تر ټولو زيات ځپلي دي؟

یمن

دا هیواد نه یوازې د ترهګریزو بریدونو او حوثي یاغیانو د جګړې بلکې د ترهګریزو بریدونو سره هم مخامخ دی. د ۲۰۱۶ کال په پرتله په دې هیواد کې د ترهګریزو پيښو شمیر ۷۵ سلنه کم وو. په مجموع کې په ترهګریزو بریدونو کې ۳۷۸ تنه وژل شوي دي. په تیر شاخص کې یمن په شپږم نمبر راغلی وو.

ترهگرۍ په ۲۰۱۸کال کې کوم هیوادونه تر ټولو زيات ځپلي دي؟

مصر

مصر یو وار بیا له ترهګرۍ څخه په اغیزمنو شویو لسو لومړنیو هیوادونو کې شامل شوی دی. په ۱۶۹ ترهګریزو پيښو کې ۶۵۵ تنه وژل شوي دي. ډیري بریدونه د داعش ترهګرې ډلې کړي دي.

ترهگرۍ په ۲۰۱۸کال کې کوم هیوادونه تر ټولو زيات ځپلي دي؟

فیلپين

په دغه هیواد کې د ترهګرۍ په ۴۸۶ پيښو کې ۳۲۶ وژل شوي او په دې توګه دغه هیواد هم په هغو لسو هیوادونو کې شامل شوی دی چې له ترهګرۍ څخه تر ټولو ډیر اغیزمن شوي دي. په دغه هیواد کې د ۳۵ سلنه بریدونو پړه د «نیو پیپلز آرمي» په نوم کمونیستي ډلې په غاړه اخیستې ده. په داسې حال کې چې د داعش د ابو سیاف ډلې په بریدونو کې هم ۱۸ سلنه زیات رامنځته شوی دی.

ترهگرۍ په ۲۰۱۸کال کې کوم هیوادونه تر ټولو زيات ځپلي دي؟

د کانګو جمهوريت

د «ترهګرۍ نړیوال شاخص» په نوملړ کې د کانګو جمهوريت له ۷،۰۵ نومړو سره په ۱۱مقام کې ځای نیولی دی.

ترهگرۍ په ۲۰۱۸کال کې کوم هیوادونه تر ټولو زيات ځپلي دي؟

ترکیه

تیر کال ترکیه د لومړي ځل له پاره له ترهګرۍ څخه د تر ټولو ډیرو لسو اغیزمنو شویو هیوادونو په کتار کې شامل کړای شوی وو، خو په ۲۰۱۷م کال په دې هیواد کې د ترهګریزو پيښو له امله د وژل شویو کسانو شمیر کم وو.

ترهگرۍ په ۲۰۱۸کال کې کوم هیوادونه تر ټولو زيات ځپلي دي؟

لیبیا

په لیبیا کې د معمر القذافي د واک تر پای ته رسېدو وروسته دغه هیواد په ډیري چټکۍ سره د ترهګرۍ په جال کې بند پاته شو. تیرکال دغه هیواد په دغه لیست کې په ۱۰ او سږ کال په ۱۳ مقام کې ځای نیول دی.

موږ تعقيب کړئ