د حزب اسلامي ۷۵ غړي له پلچرخي زندانه آزاد شول

افغان چارواکو د پنجشنبې په ورځ وویل چې د ولسمشر غني د یوه فرمان له مخې له پلچرخي زندان څخه د حزب اسلامي، ۷۵ غړي آزاد شوي دي. دغه کسان د افغان حکومت او ګلبدین حکمتیار تر منځ د سولي تړون له مخې له زندانه آزاد شوي دي.

افغان ولسمشر محمد اشرف غني، په ګلبدین حکمتیار پورې تړلي ۷۵ زندانیان آزاد کړي دي. حکمتیار چې اوږده موده یې د افغان حکومت او نړیوالو ځواکونو پر ضد جګړه وکړه، په ۲۰۱۷م کال کې د سولې د یوه تړون په پایله کې کابل ته راغی او د حکومت پر ضد یې وسلواله جګړه ختمه کړه.

د پلچرخي زندان د رسنیو مسئول شاه میر امیرپور، اسوشیتد پرس خبري آژانس ته ویلي دي چې دغه ۷۵ زندانیان د ولسمشر غني د فرمان له مخې د پنجشنبې په ورځ له زندان څخه آزاد شوي دي. دا په داسې حال کې ده چې د حکمتیار د حزب اسلامي ګوند ویاند نادر افغان، وایي چې اوس هم د دې ګوند ۲۲۰۰ غړي د افغانستان په زندانونو کې وخت تیروي.

د سولې د تړون له مخې حکمتیار او پلويانو یې د خپلو پخوانیو کړنو په اړه مصئونیت ترلاسه کړ او په دې ترتیب سره ورته پوره سیاسي حقوق ورکړل شول.

حکمتیار د افغان حکومت لومړی مطرح وسله وال مخالف وو، چې د سولې د بهیر له لارې یې وسله واله جګړه پریښوده. تیر کال ملګرو ملتونو هم د خپل د بندیزونو له نوملړ څخه د حکمتیار نوم پاک کړ.

ولسمشر غني هیله څرګنده کړې ده چې له حکمتیار سره د سولې تړون به د افغان حکومت نور وسله وال مخالفین د سولې له بهیر سره یوځای کیدو ته وهڅوي.

APE(M.J/N.Z)

زموږ له آرشیف څخه: 

د بگرام زندان

د بگرام هوايي ډگر رامنځ ته کیدل

پر افغانستان باندی د پخوانی شوروي د یرغل پر مهال په همدې ولسوالۍ کې یو لوی هوايي ډگر جوړ شو او له مسکو څخه رارسیدونکې او دې ښار ته تلونکو الوتکو به له همدې هوایي ډگر څخه پروازونه کول.هغه وخت په دې هوایي ډگر کې کوم زندان موجود نه وو او یوازي د هوايي قواوو صاحب منصبانو ته په کې د استوګنې څو بلاکونه په پام کې نیول شوي ول.

د بگرام زندان

د هوایي ډگړ خرابیدل

په ۱۳۷۵ او ۱۳۷۶ کلونو کې د شمالي ټلوالې او طالبانو تر منځ د نښتو په پایله کې د بګرام هوايي ډگر ته سخت زیان واوښت. هغه وخت دغه سیمه تر ډیرې مودې پورې د ښکیلو غاړو د جګړې لومړۍ کرښه وه.

د بگرام زندان

د امریکايي ځواکونو اډه

کله چې د طالبانو واکمنۍ ړنګه شوه ایتلافي ځواکونو د بګرام هوايي ډگړ په خپله ولکه کې راوست او دغه سیمه يې د خپلو الوتکو د ناستي پاستي له پاره د یوه لوی مرکز په توگه وټاکله.

د بگرام زندان

د زندان رامنځ ته کیدل

ایتلافي ځواکونو د بگرام په هوايي ډگر کې د ملیونونو ډالرو په ارزښت پوځي تاسیسات ورغول او دغه ځای یې په بشپړه توګه له ملکي تسلت څخه بهر کړ. په دې ترڅ کې ایتلافي ځواکونو په دې ځای کې د جگړې پر مهال د نیول شویو بندیانو د ساتلو له پاره ۱۱ بلاکونه جوړ کړ او په دې ترتیب سره یې د بگرام زندان بسټ کیښود.

د بگرام زندان

له ۳۱۰۰ څخه ډیر بندیان

په تیرو لسو کلونو کې د بگرام په زندان کې شاوخوا ۳۱۰۰ کسان ساتل کیدل. د دغو بندیانو په ډله کې له کورنیو جنګیالو نیولي بیا د بهرنیو هیوادونو تر اتباعو لکه پاکستانیانو، عربو او لیبیایي وګړو پوري شامل دي.

د بگرام زندان

له تاوتریخوالي ډکې مظاهرې

د ۲۰۱۲ کال په لومړیو میاشتو کې د بگرام په زندان کې د امریکايي سرتیرو له خوا د قرآن شریف په گډون د دیني کتابونو د سوځولو له کبله سختي مظاهرې وشوې چې په پایله کې یې ډیر کسانو ته مرگژوبله واوښته.

د بگرام زندان

افغانانو ته د زندان د تسلیمولو غوښتنه

. افغان حکومت د دغه زندان له شتون سره که څه هم په لومړیو کلونو کې مخالفت نه درلود خو په وروستیو کلونو کې یې د دغه زندان شتون خپل ملي حاکمیت ته لوی گواښ وباله او له امریکايي ځواکونو څخه یې وغوښتل چې د هغه مسوولیت په خپله افغانانو ته وسپاري. ولسمشر کرزي په دې اړه څو وارې پر امریکا باندې سختې نیوکې وکړي.

د بگرام زندان

د مسوولیتونو د سپارلو د لړۍ پیل

په لومړي سر کې په ۲۰۱۲ کال د لومړي ځل له پاره افغانانو ته د دغه زندان د ځینو برخو د مسوولیت سپارلو لړی پیل شوه. له هغه وخت راهیسې افغانان توانیدلي چې د نهو بلانکونو کنترول په خپل لاس کې واخلي او شاوخوا ۱۲۰۰ بندیان چې د هغوی په اند بیگناه ول، آزاد کړي.

د بگرام زندان

دوه شخړه ییز بلاکونه

اصلي شخړه د دوو بلاکونو پر سر وه چې په کې له ۴۰۰ څخه تر ۵۰۰ پورې بندیان ساتل کیږي. د دغو بندیانو ډیر شمیر پاکستاني وګړي دي. واشنگټن دغه کسان د خپل امنیت له پاره خطرناکه بولي او له همدې کبله ټینگار کوي چې هغوی باید د امریکایي چارواکو له موافقې پرته آزاد نه شي.

د بگرام زندان

نوې نیټه

تر هغه وروسته چې څو وارې افغانانو ته د بگرام زندان د بشپړ مسوولیت سپارلو نیټه وځنډول شوه، اوس پریکړه شوې ده چې د دوشنبې په ورځ به دغه زندان به بشپړه توګه افغانانو ته وسپارل شي. کتونکي د بګرام زندان بشپړ افغانی کیدل د کابل او واشنګټن تر منځ د ستراتیژیک سند پر سر یوې هوکړې ته د رسیدو له پاره یو مهم پرمختګ بولي.

موږ تعقيب کړئ