د حلب د ملکي وگړو له پاره نوې هیله

د رپوټونو له مخي له حلب څخه د شلو سرویسونو یو کتار وتلی او همداشان د یاغیانو له لوري له کلابندو شوو کلیو څخه په سونو خلک وځي. د ملگرو ملتونو امنیت شورا حلب ته د څارونکو د لیږلو، یو پریکړه لیک چمتو کوي.

د سوریې د حکومتي ځواکونو له خوا د حلب ختیځه څنډه کلابنده ده چې پکښې لا هم په زرونو ملکي کسان په یخه هوا کې شپې او ورځي سبا کوي. له دغه ځايه د خلکو راایستل له ځنډ سره مخامخ ول، خو د دوشنبې په ورځ دغه لړۍ بېرته پېل شوه.

د حلب په لویدیځ کې د کسانو د تخلیې له پاره په مشخص شوي ځای کې ډاکټر احمد دبیس ویلي دي: «شا او خوا شل سرویسونه چې پکښې خلک سپاره ول، رارسیدلي دي.» دغه ډاکټر د هغه یوه ټیم مشري کوي چې پکښې ډاکټران او داو طلب کسان د خلکو راایستل همغږي کوي. هغه زیاته کړې ده چې په دغه ځای کې اوس له ۱۲۰۰ څخه تر ۱۳۰۰ پورې کسان شته. خبري آژانسونو د نوموړي له قوله ویلي دي ځینې کسان په «هیبتناک وضعیت» کې دي.

نوموړي ډاکټر ویلي دي: «هغوی څه نه دي خوړلي، د څښاک له پاره یې څه نه درلودل، ماشومان زکام شوي دي آن هغوی د دې توان نه لاره چې تشناب ته ولاړ شی.»

لندن مېشته د بشري حقونو د څار سوریایي سازمان، دا خبره تائید کړې ده چې له حلب څخه د خلکو د راایستلو لړۍ پېل شوې ده.

د یکشنبې په ورځ د سوریې پوځ د جگړې له سیمې څخه پنځو سرویسونو او لږ تر لږه یوه امبولانس ته د تگ اجازه ورکړې وه.

په حلب کې د یکشنبې په ورځ سرویسونه د کسانو لیږدولو ته انتظار باسي

په عین وخت کې د آی اچ اچ، په نوم ترکي خیریه سازمان د یکشنبې په ورځ خبر ورکړی وو چې د راشدین سیمې ته په رارسېدلو سرویسونو کې شاو او خوا ۴۰۰ خلک ول. د ورکړل شوو رپوټونو له مخې د دغه هیواد په شمال لویدیځ کې د یاغیانو له لوري د کلابندو شوو سیمو الفوعه او کفریا څخه په لسو موټرو کې هم ملکي کسان راوتلي دي.

د یکشنبې په ورځ پر یوه توافق سربیره له حلب څخه د ملکي کسانو انتقالول له ځنډ سره مخامخ شوي. د هغې علت د حلب په گاونډي ولایت ادلیب کې په ظاهري توگه پر سرویسونو باندې برید ښوول شوی وو.

د دیپلوماتانو د وینا له مخې د ملگرو ملتونو امنیت شورا ښایي د دوشنبې په ورځ حلب ته د څارونکو د استولو یوه پریکړه تائید کړي. په اصل کې دغه کار باید د یکشنبې په ورځ شوی وای. خو په نیویارک کې دغه رای اچونه وروسته له هغې وځنډوله شوه، چې روسیې د فرانسې له لوري وړاندې کړی شوی پریکړه لیک د یوه «ناورین» په توگه ياد کړ.

په ملگرو ملتونو کې د فرانسې سفیر ویلي دي چې په امنیت شورا کې ۱۵ هیوادونه د پریکړه لیک پر مصودې باندې راضي شوي او په وینا یې په ملگرو ملتونو کې د روسیې سفیر ویتالي چورکین هم هغه «ښه» ارزولې ده.

په ملگرو ملتونو کې د امریکا متحدو ایالاتو سفیري سمنتا پاور د خپلو معلوماتو له مخې هغه د دغه پریکړه لیک د تصویبدو اټکل کوي. ملگري ملتونه اټکل کوي چې د سوریې په حلب ښار کې د یاغیانو تر کنترول لاندې وروستۍ کوچنۍ سیمه کې ښايي ۴۰ زره ملکي کسان وي. دغه سیمه په وروستیو کې د سوريې رژیم د ځواکونو له لوري چې د روسیې هوایي ملاتړ ورسره دی، د سختې جگړې شاهده وه.

نور مطالب:

انځورونه: له حلب څخه د ملکيانو د انتقال ستونزمن حالت

د ملګرو ملتونو د رپوټ له مخې، په داسې حال کې چې د حلب ښار ختيځ لور کې په زرونو کسان په محاصره کې پاتې دي، د ملکيانو د وښکلو د پاره موقت اوربند دريدلی دی.

انځورونه: له حلب څخه د ملکيانو د انتقال ستونزمن حالت

د آلمان خبري آژانس په حواله، هم د اسد رژيم او هم د دولت مخالف ځواکونه د ملکيانو د وښکلو عمليات د دريدو مسئول پيژندل شوي دي.

انځورونه: له حلب څخه د ملکيانو د انتقال ستونزمن حالت

د سوريې دولت ادعا کوي، چې د مخالفو ځواکونو له لورې د ملکيانو پر موټرو د ډزو کولو له امله، د ملکيانو د وښکلو عمليات د دريدلي دي.

انځورونه: له حلب څخه د ملکيانو د انتقال ستونزمن حالت

خو مخالف ځواکونه بيا بشارالاسد ته وفا دار ځواکونه پړ ګڼې چې لمړی يې ډزې کړي دي.

انځورونه: له حلب څخه د ملکيانو د انتقال ستونزمن حالت

د آلمان صدراعظمې انګلا مرکل د پنجشنبې په ورځ (ډسامبر ۱۵مه) د اروپايي اتحاديې غړو هيوادونو مشرانو د غونډې په پای کې ايران او روسيه حلب کې د ملکيانو پر ضد جګړه کې د جنګی جنایتونو په ترسره کيدو کې پړ وګڼل. هغې وويل چې بايد د دغو جنايتونو پلټنه وشي او عاملان يې مجازات شي.

انځورونه: له حلب څخه د ملکيانو د انتقال ستونزمن حالت

د حلب له ختيځ څخه تر اوسه نژدې اته زره کسان نورو سيمو ته انتقال شوي دي.

انځورونه: له حلب څخه د ملکيانو د انتقال ستونزمن حالت

په وروستيو ورځو کې د حلب ښار پر ختيځه سيمه باندې د سوريې او روسي ځواکونو د بمباريو له امله د سيمې ډير اوسيدونکي دې ته اړ شول چې له خپلو کورونو څخه ووځي.

انځورونه: له حلب څخه د ملکيانو د انتقال ستونزمن حالت

حلب ښار څخه د اکثرو تښتيدلو کورنيو د برخليک په باب معلومات په لاس کې نشته.

انځورونه: له حلب څخه د ملکيانو د انتقال ستونزمن حالت

د ملګرو ملتونو سازمان د رپوټ په حواله، یو شمير کسان چې د حلب له ختيځې سیمې څخه تښتيدلي وو، د سوريې د پوځ لخوا نیول شوي دي.

انځورونه: له حلب څخه د ملکيانو د انتقال ستونزمن حالت

د هغو کسانو لپاره چې د حلب په ختيځ کې ژوند کوي، ژوند د هرې ورځې په تيريدو سره لا سختيږي. دلته کورونه ويجاړ شوي او خوراکي مواد لږ پيدا کيږي. روغتيايي خدمات هم په ډیر بد حالت کې قرار لري.

انځورونه: له حلب څخه د ملکيانو د انتقال ستونزمن حالت

حلب تر نژدې تيرو کلونو پورې د سوريې يو ستر فرهنګي ښار او اقتصادي مرکز ګڼل کيده، خو وروسته د کورنيو جګړو په مرکز واوښت. اوس د دغه ښار يوازې کنډوالې پاتې دي.

انځورونه: له حلب څخه د ملکيانو د انتقال ستونزمن حالت

بشارالاسد ځواکونو په نوامبر میاشت کې د ياغيانو څخه د حلب ښار د بيرته نيولو په مقصد، ستر تعرضي عمليات پیل کړل.

انځورونه: له حلب څخه د ملکيانو د انتقال ستونزمن حالت

د حلب پر ښار پوځي عملياتو څو اونۍ دوام وکړ، بلاخره دولتي ځواکونه وتوانيدل چې د روانې (دسامبر) مياشت په لمړيو کې د دغه ښار ډيرې برخې ونيسي.

انځورونه: له حلب څخه د ملکيانو د انتقال ستونزمن حالت

وروسته له هغې چې د بشارالاسد ځواکونو د روسيې ځواکونو او د شعيه ډلو د جنګياليو په مرسته د حلب ښار ختيځ کې زياتې سيمې ونيولې، د ملکيانو د وښکلو خبرې هم څو ځله مطرح شوې، خو کوم ځای يې ونه نيوه.

موږ تعقيب کړئ