د سوريي کردانو د داعش اته بهرني جنګیالي نیولي

په سوریه کې د داعش ډلې سره په جګړه کې د امریکا له ملاتړه برخمنو کردي جنګیاليو د یوه آلماني او یوه امریکايي په ګډون اته بهرني جنګیالي نیولي دي. یادې ډلې ویلي دي چې تراوسه پورې یې شاوخوا ۱۰۰۰ تنه بهرني جنیګالي نيولي دي.

د چهارشنبې په ورځ په سوریه کې د داعش ډلې پر ضد جنګیدونکو د سوریې د ديموکراتیک ځواکونو استازو چې د کردانو د خلکو د مدافع واحدونو یوه برخه ده، ویلي چې دوی د داعش ډلې اته بهرني جنګیالي يې نیولي دي.

د کردانو د ديموکراتیک ځواکونو چارواکي ریدو شیلیل وویل: «دغې ډلې د کردانو د ديموکراتیک ځواکونو پر ضد د یوه ترهګریز برید له پاره تابیا نیوله او موږ په دې باور یوو چې دغه ډله په وروستیو ورځو کې پر کردانو د یو شمیرو نورو بریدونو ترشا هم لاس لري.»

د دغو نيول شويو بهرنیو جنګیالیو په ډله کې ۳۱ کلن آلماني هم شامل دی چې احتمالاً د آلمان د دورتمند ښار اوسیدونکی دی. په دې کسانو کې یو بل ۱۶ کلن امریکايي هم شامل دی. د نورو نیول شوو کسانو د هویت په هکله ویل شوي چې نور جنګیالي د روسيې اوکراین، قزاقستان، تاجکستان او ازبکستان اتباع دي.

د آلمان څارنوالان وايي چې احتمالاً نیول شوی آلمانی وګړی به د آلمان د دورتمند ښار اوسیدونکي افراطي شوی لوکاس جي. وي. د «ډیر شپیګل» په نامه یوې آلمانۍ خبري مجلې رپوټ ورکړی چې نوموړی کس د آلماني استخباراتي سازمانونو له څار څخه په وتلو بریالی شوو او د آلمان د جنايي فدرالي پولیسو د معلوماتو له مخې نوموړي په ۲۰۱۴م کال کې سوریې ته سفر کړی دی.

سربیره پر دې په آلمان کې څارنوالانو تر دې وړاندې د ۲۰۱۶م کال په اکتوبر میاشت کې د بهرنیو ترهګریزو سازمانونو د غړیتوب د شک په تړاو د لوکاس جي په نامه د دغه کس په هکله پلټنې پیل کړي وې. چارواکو هغه مهال د داعش په ډله کې د لوکاس د مهم مقام او ځای په هکله معلومات او مدارک نه وو موندلي.

د کردانو د خلکو مدافع واحدونو یا (YPG) چي د داعش ډلې پر ضد مبارزه کې د امریکا په مشرتوب د ائتلاف یوه برخه ده، هڅې کوي څو د سوریې په ختيځه برخه کې د عراق پولې ته څیرمه د داعش وروستي سنګرونه له منځه یوسي او دغې ډلې ته ماته ورکړي.

تیره اونۍ، داعش جنګیالیو د کردانو ديموکراتیک ځواکونو پر ضد یو لړ تهاجمي بریدونه هم پیل کړل چې له امله یې د کردانو د یادې ډلې شاوخوا ۲۳ جنګیالي ووژل شول او۳۰ نور ټپیان شول.

د کردانو ديموکراتیک ځواکونه چې نړیوال ائتلاف يې ملاتړ کوي، وايي چې دوی تر اوسه پوري د فراط په ختيځه تراډه کې شاوخو ۱۰۰۰ بهرني جنګیالي نیولي دي. یادې ډلې همدا راز زیاته  کړې ده چې پر نیول شوو کسانو سربیره دوی ۵۵۰ میرمنې او۱۲۰۰ داسې ماشومان نیولي چې له یادو جنګیالیو سره یې ګډ ژوند کاوه.

زموږ له آرشیف څخه: 

د سوریې د کورنۍ جګړې له پیل څخه تر اوسه لنډه تاریخچه

۲۰۱۱م کال د مارچ ۱۵

د ۲۰۱۱م کال د مارچ میاشتې پر ۱۵ د سوریې په مختلفو ښارونو کې حکومت ضد مظاهرې پيل شوې. عربي پسرلی په ځینو عربي هیوادونو کې د وخت رژیمونه را نسکوره کړل. په دې وخت کې په سوريه کي هم مظاهره کوونکي د خپلو غوښتنو د پوره کیدو له پاره سړکونو ته راووتل. خو حکومتي ځواکونو د درعا په ښار کې پر مظاهره کوونکو ډزې وکړې چې په ترڅ کې یې ۴ تنه ووژل شول.

د سوریې د کورنۍ جګړې له پیل څخه تر اوسه لنډه تاریخچه

د مارچ ۲۸ نیټه

ولسمشر بشارالاسد فکر کاوه چې په زور سره به د مظاهرو مخه ونیولای شي. د مارچ له ۱۵ څخه په پيل شویو مظاهرو کې د دغې میاشتې تر ۲۸ نیټې پورې ۶۰ کسان ووژل شول. د حکومت له خوا د مظاهره کوونکو پر سرکوبه کولو سربیره د مظاهرو لړۍ په ټول هیواد کې پراخه شوله.

د سوریې د کورنۍ جګړې له پیل څخه تر اوسه لنډه تاریخچه

۲۰۱۱ د اګست ۱۸

د سوريې د حکومت له خوا د مظاهره کوونکو د سرکوبه کولو په غبرګون کې د امریکا ولسمشر بارک اوباما د بشارالاسد د استعفا غوښتنه وکړه او په امریکا کی یې د سوريې حکومت د ټولو شتمنیو د کنګل کولو اعلان وکړ. خو د سوریې حکومت د نړیوالې ټولنې غوښتنې ونه منلې او د مظاهره کوونکو ځپلو ته یې دوام ورکړ.

د سوریې د کورنۍ جګړې له پیل څخه تر اوسه لنډه تاریخچه

د جولای ۱۹- ۲۰۱۲

د ۲۰۱۲م کال په جولای کې د مظاهره کونکو د ځپلو لړۍ تر حلب پورې پراخه شوه. هلته د حکومتي ځواکونو او مظاهره کونکو تر منځ جګړه پیل شوه. په دغه وخت کې په درعا، حمص، ادلیب او دمشق په شاوخوا سیمو کې هم جګړو شدت وموند. په دې وخت کې د حکومت مخالف مظاهره کوونکي په یاغي ځواکونو بدل شول.

د سوریې د کورنۍ جګړې له پیل څخه تر اوسه لنډه تاریخچه

۲۰۱۲م دسمبر

برینانیا، امریکا، فرانسې ترکیې او خلیجې هیوادونو یاغي اپوزیسیون د سوريې ولس د قانوني استازو په توګه ومنل. له دې سره سم د رژیم ضد اپوزیسیون ملاتړ هم پیل شو. کله چې اسد د نړیوالو د غوښتنو له منلو څخه یو وار بیا انکار وکړ، په دې وخت کې د القاعدې په ګډون یو شمیر ترهګرې ډلې هم د اسد رژیم پر ضد جګړه کې ونډه واخيسته.

د سوریې د کورنۍ جګړې له پیل څخه تر اوسه لنډه تاریخچه

۲۰۱۳ م کال د مارچ ۱۹

په دې ورځ په خان شیخون سیمه کې د زهرجنو ګازو برید وشو چې له امله یې ۲۶ تنه ووژل شول. په دې کې ډیر کسان د سوريې پوځیان ول. د ملګرو ملتونو څارونکو هم ونه شوای کولای دا معلومه کړي چې دغه برید چا کړی دی. په همدې کال په عراق او سوریې کې د داعش ډلې هم خپل فعالیتونه زیات کړل.

د سوریې د کورنۍ جګړې له پیل څخه تر اوسه لنډه تاریخچه

۲۰۱۳ م د سپټمبر ۲۷

د کیمیاوي وسلو تر کارونې وروسته د ملګرو ملتونو سازمان د دمشق حکومت ته خبرداری ورکړ چې که خپلي کیمیاوي وسلې ختمې نه کړي نو پر وړاندي به یې له نظامي قوت څخه کار واخیستل شي. که څه هم بشارالاسد د خپلو کیمیاوي وسله پر لمنځه وړلو رضامندي ښکاره کړه، خو په همدې وخت کې د داعش ډلې په سوريه کې خپل حضور نور هم پیاوړی کړ.

د سوریې د کورنۍ جګړې له پیل څخه تر اوسه لنډه تاریخچه

۲۰۱۴ کال د جون میاشت

د سوریې الرقه لومړنې ښار وو چې داعش ډلې تر خپل کنترول لاندې راوست. په جون میاشت کې داعش د الرقه ښار خپله پلازمېنه اعلان کړه. وروسته تر دې دغې ډلې له دې ښار څخه خپل بریدونه پراخ کړل. د سپټمبر پر ۲۲ امریکا ائتلافي ځواکونو د داعش پر مرکزونو هوایې بمبار پیل کړ.

د سوریې د کورنۍ جګړې له پیل څخه تر اوسه لنډه تاریخچه

۲۰۱۵ سپټمبر ۲۳

که څه هم روسیې لا پخوا له بشارالاسد سره مرسته کوله خو په دې ورځ د مسکو حکومت په عملي ډول اړخ ونیوه. د روسیې جنګي الوتکو د اسد د مخالفیونو پر ضد د هوایې بمباریو لړۍ پيل کړه.

د سوریې د کورنۍ جګړې له پیل څخه تر اوسه لنډه تاریخچه

۲۰۱۶ مارچ میاشت

د روسیې هوایې بمباریو د سوریې ځواکونو ته نوی قوت ور وبخښه او ډیر ژر یې هغه سیمي ونیولې چې وسله والو مخالفینو یې نیولي وې. په دې وخت کې د سوريې پوځ د ایران ملاتړ لرونکي شعیه ملیشه و له خوا هم همکاري ترلاسه کوله. دې اتحاد په مارچ میاشت کې لا په پالمیرا کې د داعش ډلې ته ماته ورکړې وه.

د سوریې د کورنۍ جګړې له پیل څخه تر اوسه لنډه تاریخچه

۲۰۱۶ دسمبر میاشت

روسي جنګي الوتکو او د حزب الله د جنګیالیو په مرسته د سوريې پوځ په حلب کې هم جهادیان پر شا وتمبول.

د سوریې د کورنۍ جګړې له پیل څخه تر اوسه لنډه تاریخچه

۲۰۱۷ م کال جنوري میاشت

د امریکا، روسیې، ترکیې او ایران د هڅو په ترڅ کي د سوریې حکومت او غیر جهادي ډولو ترمنځ د سولې یو تړون رامنځته شو. خو د دې تړون له مخې د جهادې ډلو پر ضد د عملیاتو لړۍ پای ته ونه رسول شوه.

د سوریې د کورنۍ جګړې له پیل څخه تر اوسه لنډه تاریخچه

۲۰۱۷ م کال اپریل میاشت

دونالد ترمپ واک ته تر رسیدو څو میاشتې وروسته امر وکړ چې د سوريې حکومت پر هغې پوځي اډې دې توغندیز برید وشي، چې ویل کیږي له هغه ځایه په خان شیخون کې د یاغیانو پر مرکزونو د کیمیاوي وسلو برید شوی وو. امریکا له منځلارو سوریایې یاغیانو سره هم خپلې مرستې زیاتې کړلې. خو بل لور ته بیا روسیه له بشار الاسد سره پوځې همکاري کوي.

د سوریې د کورنۍ جګړې له پیل څخه تر اوسه لنډه تاریخچه

۲۰۱۷م کال جون

د سوریې دیموکراتیکې جبهې SDF ځواکونو چې د امریکا ملاتړ له ځان سره لري الرقه محاصره کړی وو. کرد او عربي جنګیالیو په دې ښار کې داعش ته د ماتې ورکولو له پاره عملیات پیل کړل. په همدې میاشت کې روسیې اعلان وکړ چې په زیات ګومان سره د داعش مشر ابوبکر البغدادي د یوه هوایې برید په نتیجه کې وژل شوی دی. خو د روسیې دغه ادعا نه ده تائيد شوې.

د سوریې د کورنۍ جګړې له پیل څخه تر اوسه لنډه تاریخچه

۲۰۱۷ اکتوبر

په سپټمبر کې کردي ځواکونو Syrian Democratic Forces د الرقه ۸۵ سلنه برخه تر خپل کنترول لاندې راوستله. په اکتوبر میاشت کې دغو ځواکونو په بشپړ ډول د الرقه د نیولو له پاره عملیات پیل کړل. که څه هم د اکتوبر میاشتې پر ۱۷ دغو پوځیانو د جهادیانو په بشپړ ډول په شا تمبولو اعلان وکړ البته له الرقه څخه، چې دا د داعش له پاره یوه لویه ضربه وه. خو د سوریې نور سنګرونه اوس ساړه شوي نه دي.

موږ تعقيب کړئ