د شمالي کوریا توغندی بیا د جاپان له خاورې تیر شوی

شمال کوریا یو ځل بیا توغندی توغولی دی. په ټوکیو کې حکومت خبر ورکړی دی چې دغه توغندی د جاپان له خاورې تیر شوی دی. جنوبي کوریا د ملي امنیت شورا غونډه رابللې ده.

ظاهرا شمالي کوریا یو توغندی ازمویلی چې د جاپان له خاورې تیر شوی دی. د جاپان د ان اچ کې، په نوم تلویزوني چینل خبر ورکړی دی چې دغه څه یو جی – الرټ، په نوم د خبرداری سیستم ښوولی دی. د دغو معلوماتو له مخې توغندی د جاپان له شمال څخه پر نورو سربیره د هوکایدو له ټاپو هم تیر شوی دی او تر هغې وروسته په پاسفیک یا آرام سمندرګي کې غورځیدلی دی.

د جاپان د کابیني سیکرتر یوشيهیدي سوګا، ویلي دي چې دغه توغندی د جاپان له سیمې څخه ۲۰۰۰ کیلومتره وړاندې په سمندر کې راغورځیدلی دی. د هغه په خبره تر اوسه په دې هکله هیڅ کومې نخښې نښانې نه شته چې د دغه توغندي کومې برخه د جاپان په خاوره کې رالویدلي وي.

د جنوبي کوریا د ګډو ځواکونو دفتر خبر ورکړی دی چې د امریکا متحدو ایالاتو پوځ په دې هکله نور جزئیات ارزیابي کوي. زیاته شوې چې د لومړنیو ارزونو له مخې دغه توغندی د شمالي کوریا پلازمینې پیونګ یانګ، ته څیرمه له سونان څخه توغول شوی دی. د جنوبي کوریا ولسمشرۍ ماڼۍ د ملي امنیت شورا غونډه رابللې ده.

د جنوبي کوریا د توغندیو تمرینونه

متحده ایالاتو، جاپان او جنوبي کوریا د توغندي ازموینې بیا په غوسه کړي او د پیونګ یانګ پر مشرتابه باندې یې ګاونډیو هیوادونو ته د لمسون او ګواښ تور لګولی دی. د جنوبي کوریا امنیتي ځواکونو په خپلو پوځي تمرینونو کې د یوه بالستیک توغندي په توغولو سره غبرګون ښوولی دی.

د متحدو ایالاتو د بهرنیو چارو وزیر ریکس تیلرسن له لوري په یوه بیانیه کې ویل شوي دي: «له دوې اونیو څخه په کمه موده کې دا دوهم وار دی چې له جاپان سره د متحدو ایالاتو د تړون یو شریک په مستقیمه توګه ګواښل کیږي.» هغه یادونه کړې ده چې د دغه لمسون ادامه به په دې کې مرسته وکړي چې د شمالي کوریا دیپلوماتیکه او اقتصادي انزوا لا پسې ژوره شي. د جاپان لومړي وزیر شینو آبې دغه برید غندلی او نه د زغملو وړ یې بللی دی.

د ملګرو ملتونو امنیت شورا بیړنۍ غونډه

په دې ترځ کې په آرام سمندرګي کې د متحدو ایالاتو د قومندې مرکز خبر ورکړی دی چې د سهار وختي توغول شوی توغندی د اټکلونو له مخې د منځني واټن ویشتونکی توغندی دی. د دغه مرکز په خبره توغندی نه د متحدو ایالاتو وچې او یا هم په پاسفیک کې د ګوام ټاپو ته کوم خطر وو. زیاته شوې ده چې متحده ایالات به د خپلو متحدینو چې پکښې جاپان او جنوبي کوریا راځي د دفاع په برخه کې خپل ملاتړ ته دوام ورکړي. دغه مرکز په خپله بیانه کې دا هم ویلي دي چې د شمالي کوریا پوځي کړنې به په راتلونکي کې هم دقیقا وڅارل شي.

په عین وخت کې د ملګرو ملتونو امنیت شورا د جمعې په ورځ یوه بیړنۍ غونډه تر سره کوي. د ایتوپیا استازي چې په روانه میاشت کې د دغې شورا دوره یي مشري پر غاړه لري ویلي دي چې شور به تر ماسپښین د مخه (د سیمي په وخت) په نیویارک کې غونډه وکړي. د دیپلوماتانو د معلوماتو له مخې دغه غونډه به د تړلو دروازو تر شا وشي. دا په داسې حال کې ده چې د دوشنبې په ورځ د امنیت شورا د شمالي کوریا د وروستۍ اتومي ازموینې په غبرګون کې پر دغه هیواد باندې د یو شمیر بندیزونو له پاره پریکړه لیک تصویب کړ. د ملګرو ملتونو پریکړه لیکونه شمالي کوریا له اتومي او د توغندیو له ازموینو منع کوي.

امریکايي جنرال: د سپتمبر په دریمه تر سره شوې ازموینه ښاي هایدروجن بم وي

د چهارشنبې په ورځ شمالی کوریا د نوو بندیزونو په غبرګون کې متحدو ایالاتو او جاپان ته ګواښونه کړي وو. د امنیت شورا د شمالي کوریا له لوري د سپتمبر میاشتې په دریمه نیټه د هایدروجن بم د ازمویلو پریکړه غندلې وه. د امریکا متحدو ایالاتو د کیماوي وسلو د غونډ مشر جون هایتن، خبریالانو ته ویلي دي چې د سپتمبر د میاشتې د دریمې نیټې ازموینه احتمالا کیدای شي یو هایدروجن بم وي. شمالي کوریا د لومړي ځل له پاره د هایدروجن بم د ازمویلو اعلان کړی وو. خو امریکایي کارپوهانو لا تر اوسه نه دغه خبر تائید کړی او نه هم رد کړی دی.

پر ورته موضوع یو انځوريز البوم زموږ له آرشيف څخه (10.07.2017):

د شمالي کوریا پوځ څومره غښتلی دی؟

د نړۍ تر ټولو لوی پوځ

دغه هیواد ۷۰۰۰۰۰ پوځ او ۴،۵ میلیونه ریزرف پوځ لري چې د اړتیا په صورت کې خدمت ته اماده وي. په دې توګه نو د دغه هیواد نږدې هر ۵ تن پوځي دی.

د شمالي کوریا پوځ څومره غښتلی دی؟

د وسلو بې شماره سیستمونه

د وسلو او تجهیزاتو نړیوال شاخص د ۲۰۱۷م کال د رپوټ پر بنسټ، دغه هیواد ۷۶ اوبتلونه، ۵۰۲۵ زیري ټانکونه او ۴۵۸ جنګي الوتکې لري. په دغه انځور کې چې د ۲۰۱۳م کال دی د شمالي کوریا واکمن کم جونګ اون د قوماندې په مرکز کې لیدل کیږي.

د شمالي کوریا پوځ څومره غښتلی دی؟

د وسلو ننداره

شمالي کوریا هرکال په پلازمېنه پيونګ یانګ کې د یوه پوځي پرېډ په ترڅ کې خپلې وسلې او تجهیزات نندارې ته وړاندې کوي. د وسلو دا ډول ننداره د دغه کمونیستي هیواد له تاریخي او ملي ورځو سره مطابقت کوي.

د شمالي کوریا پوځ څومره غښتلی دی؟

بالستيک توغندی

امریکا متحدو ایالاتو د تيري سه شنبې په ورځ د شمالي کوریا له خوا، د بالستيک توغندي د آزموینې بریاليتوب تائید کړ. د امریکا د بهرنیو چارو وزیر ریکس ټیلرسن ویلي دي: دغه آزموینه د شمالي کوریا له خوا امریکا، د هغه متحدینو او نړیوالو ته د ورپیښ احتمالي نوي ګواښ جدیدت ښيي.

د شمالي کوریا پوځ څومره غښتلی دی؟

د اټومي وسلو جوړولو لړۍ

پر ډیرو سختو بندیزو سربیره شمالي کوریا خپل د اټومي پروګرام لړۍ جاري ساتلې ده. دغه هیواد په مجموع کې تر اوسه پورې ۵ اټومي آزمویني کړي دي. یوازي په ۲۰۱۶م کال کې یې دوې آزموینې کړي دي. د سویلي کوریا د دفاع وزیر وایي چې په ډیر قوي احتمال به شمالي کوریا ډیر ژر شپږمه آزموینه هم وکړي.

د شمالي کوریا پوځ څومره غښتلی دی؟

نړیوال امنیت ته ګواښ

یوازي چين او روسیه تر اوسه پوري د شمالي کوریا متحدین دي. د شمالي کوریا رژیم د «امریکا متحدو ایالاتو امپریالیستي قدرت» خپل اصلي دښمن بولي او جاپان او سویلي کوریا په دویمه درجه کې ځای لري. شمالي کوریا د امریکا او سویلي کوریا د کلني ګډ پوځي مانورونو پر وړاندې په ډیر حساسیت سره غبرګون ښيي.

د شمالي کوریا پوځ څومره غښتلی دی؟

د حوصلې پای

داسې ښکاري چې د شمالي کوریا له خوا د بالستيک توغندی تر ازموینې وروسته اوس د امریکا حوصله ختمه شوي وي. د شمالي کوریا د توغندو آزموینه د جې ۲۰ په سرمشریزه کې یوه د بحث موضوع وه.


 

اړوند مطالب

موږ تعقيب کړئ