د هند او پاکستان تر منځ د اړيکو راتلونکې روښانه برېښي
۱۳۸۹ اردیبهشت ۱۰, جمعه
دواړو لورو له نهو مياشتو راپه دې خوا دغه لومړنۍ کتنه يو مهم ګام وباله ، تر څو د دغو ګاونډيو هېوادونو تر منځ بيا خبری اتری پيل شي .
دغه خبری د 2008 م کال په نومبر کې په ممبېي ښار باندی د پاکستاني شرخوښو تر حملې وروسته په ټپه درېدلې وې . د امريکې متحده آيالتونو په دواړو هېوادونو باندی فشار راوستی دی چې خپلمنځۍ ترينګلتيا دې کمه او پاکستاني امنيتي ځواکونه دي دې ته پرېښودل شي چې خپله توجه له هند سره د ګډی پولی پر ځای د افغانستان او پاکستان تر منځ ګډې پولې ته واړوي، څو هلته له القاعده او طالبانو سره وجنګيږي . خو د چارو شنونکي او کتونکي وايي چې پر جزياتو باندی بايد لا غور وشي او د اړيکو د ښه کولو هڅې کېدای شي لا ډېر وخت ته اړتيا ولري .
پاکستان په خپل وار غواړي چې په پراخ ډول خبری اترې بېرته راژوندۍ کړي او ټولې ستونزې د کشمير د شخړی په شمول په کښې مطرح شي . د پاکستان د بهرنيو چارو وزير شاه محمود قريشي په بوتان کې وويل چې اوسنۍ خبری پرته له يو شرط مخ ته وړل کيږي او پر ټولو موضوعګانو باندی په کښې بحث کيږي .
بلی غاړی ته په هند کې د بهرنيو چارو څېړونکی راجا موهن وايي چې ډېرو هلو ځلو ته لا اړتيا ده تر څو د هند او پاکستان تر منځ د خبرو لړۍ بېرته راونښلول شي . خو په هند کې کېدای شي چې، داخلي چاری د روان بهير د ناکامېدو سبب وګرځي . تر ټولو لوی مخالف ګوند بهاراتييا جناتا پارتي په حکومت باندی نيوکه وکړه چې هغه د پاکستان په وړاندی يو غوڅ نظر نه لري او د متحده آيالتونو له خوا وارد شوي فشار ته غاړه ږدي .
RTRE/ نسيم صابر
کتونکي : محمد قاسم نوري