شتاين ماير په درې ورځني سفر افغانستان ته رسيدلی
۱۳۹۰ تیر ۱, چهارشنبه
د افغانستان په شمال کي پر جرمني ځواکونو تر سختو بريدونو وروسته شټاين ماير په دې موخه افغانستان ته تللی تر څو هلته د خپلو عسکرو څخه ليدنه وکړي او هغوی ته ډاډ ورکړي چي يوازي نه دي.
د جرمني د بهرنيو چارو د پخوانی وزير شټاين ماير د ليدنو کتونو په اجندا کي به تر ډيره د روان کال په ډسمبرکي د بن د کنفرانس او د افغانستان څخه د بهرنيو ځواکونو د بيرته وتلو په اړه خبري اتري وي.
د جرمني د سوسيال ديموکراتانو گوند په دې لټه کي چي په روان کال کي په افغانستان کي د هغه هيواد د ځواکونو ماموريت لږ سي او لږ تر لږه د ۲۰۱۵ کال تر پايه پوري ټول ځواکونو د افغانستان څخه و ايتسل سي.
د نوموړي گوند د مشرانو په خبره تر هغه وخته بايد د افغان امنيتي ځواک د روزلو پروسه چي تر ډيره يې آلماني روزونکي پر غاړه لري بايد بشپړه سي.
د روان کال د می د مياشتي راهيسي د افغانستان په شمال کي پر آلماني ځواکونو باند د خونړيو بريدونو يوه لړۍ پيل سوې چي پړه يې طالبان پر غاړه اخلي.
په دغو بريدونو کي څلور الماني عسکر وژل سوي او يو شمېر نور ټپيان سوي دي.
د بلي خوا د جرمني د پراختيايي مرستو وزير ديرک نيبل ويلي چي په افغانستان کي د سولي راوستلو دپاره د طالبانو سره خبري اساسي شرط دی.
د آلمانۍ ورځپاڼي راينيشه پوست سره، چي د دوسلدورف څخه خپريزي په مرکه کي دغه سياستوال ويلي چي، د سولي راتلو لپاره د طالبانو سره خبري ضروري دي.
د نيبل په خبره که څه هم چي د افراطي طالبانو سره د لويديځوالو خبري کول امکان نه لري، خو د هغوی په منځ کي داسي کسان هم سته چي سړی خبري ور سره وکړي.
هغه هم دې ته اشاره کړې چي د ۲۰۱۴ کال تر پايه به د افغانستان څخه د ځواکونو ايستل بشپړ سي.
آژانسونه/ نجيب الله زيارمل
کتونکی: محمد قاسم نوري