لندن بريدونه ـ پلټنې ادامه لري

درېو بريد کوونکو شپږ انسانان ووژل مخکې له دې چې هغوی خپله د پوليسو له خوا په ډزو ووژل شول.

په مانچستر کې تر بمي بريد کابو دوه اوونۍ وروسته لويه بريتانيا يو ځل بيا د يوه تروريستي بريد هدف ګرځېدلی دی. د معلوماتو له مخې د شنبې په ماښام دريو تنو عاملينو په لندن کې لږ تر لږه شپږ انسانان ووژل چې شمېر يې اوس د پوليسو په خبره اوو تنو ته لوړ شوی دی.

۴۸ نور کسان د پوليسو د څرګندونو په حواله ژوبل شوي هم دي. درې واړه بريد کوونکي په ډزو ووژل شول. د پوليسو د څرګندونو له مخې لومړی يوه لارۍ د لندن د پله د پاسه د پلو کسانو په ډله ورننوتله. لارۍ موټر ورپسې د بورو مارکېټ په لور ولاړه چې يوازې يو څو سوه متره لېرې ورڅخه پروت دی. هلته درې واړه شکمن عاملين کوز له لارۍ څخه شول او په انسانانو باندې يې د چړو بريدونه وکړل.

ټول بريدکوونکي پوليسو په ډزو وژلي دي

د پوليسو د يوه وياند په خبره بريد کوونکي د بورو په مارکېټ کې د امنيتي ځواکونو له خوا اته دقيقې وروسته له هغه چې ورته په عاجله توګه زنګ وهل شوی وو، په ډزو ووژل شول. بريد کوونکو هغسې واسکټونه اغوستي ول لکه چاودېدونکي مواد چې پکې ځای پر ځای شوي وي. خو وروسته بيا چاودېدونکي مواد پکې ونه موندل شول.

د لويې بريتانيې د تروريزم ضد چارو مشر، مارک روولې د شنبې په سهار وويل چې پوليس دغه بريدونه «تروريستي پېښې» بولي. تر اوسه پورې يې پړه البته کومې ډلې منلې نه ده. خو د جهادي تبليغاتو څېړونکې، ريتا کاڅ وايي چې د داعش د ترهګرې ډلې پلويان په خپلو انترنېټي ليکنو کې دغه بريدونه لمانځي او داسې ښېي چې داعش دې دغه کار کړی وي. پوليس داسې فکر کوي چې د درې واړو وژل شويو مشکوکو کسانو علاوه نور عاملين په دغو بریدونو کې ښکېل نه ول. خو روولې زياته کړه چې پلټنې دوام لري.

د صدراعظمې تريزا می محافظه کار ګوند خپل انتخباتي کمپاين ځنډولی دی. دا په داسې حال کې ده چې د پنجشنبې په ورځ په لويه بريتانيا کې نوی پارلمان ټاکل کيږي. می د رسنيو د راپورونو په حواله د يکشنبې سهار له پاره د کوبرا د کميټې يوه ځانګړې ناسته رابللې ده، هغه په بريتانيا کې تر ټولو ستره امنيتي حلقه ده.

د لندن مسلمان ښاروال، صادق خان، له يوه «هدفمن او ډارن بريد» څخه خبرې کولې چې د لندن بې ګناه اوسېدونکي او مېلمانه يې په نخښه کړي دي. يوازې څه کم دوې اوونۍ مخکې ۲۲ کلن ځانمرګي بريدګر، سلمان عابدي د سندرغاړې، آريانا ګراندې، کنسرټ په مانچېستر کې په نخښه کړی وو چې ۲۲ انسانان پکې ووژل شول. په هغه تروريستي پېښه کې څه باندې سل انسانان ټپيان شوي هم وو.

نن د يکشنبې په ورځ ګراندې د انګلستان په شمال کې پراته د مانچېتسر ښار د بريد د قربانيانو له پاره يو لوی خيريه کنسرټ ورکوي چې نور مشهور کسان پکې هم حضور لري. په هغه کې کېتي پېري او کولدپلای هم راڅرګنديږي. د آلمان صدراعظمې انګلا مېرکل خپګان څرګند کړی دی. مېرکل په يوه بيانيه کې ويلي دي چې «موږ د ټولو سرحدونو بغير اوس د حيرانتيا او خپګان په ذريعه سره يو ځای شوي يو، قاطعيت مو هم همغسې محکم دی.»

صدراعظمې مېرکل ټينګار وکړ چې آلمان د ترهګرۍ په وړاندې په مبارزه کې په «ټينګ او قاطع» ډول د لويې بريتانيې تر څنګ ولاړ دی.

انځورونه: د لندن تروريستي پېښې

د امنيتي ځواکونو بيړه

له ټول ښار څخه پوليس راټول شول چې په ځغاسته د پېښې ځايونو ته ورسېدل. د پوليسو د ماموريت همغږي ښايي د تروريزم ضد پلانونو له مخې شوې وي.

انځورونه: د لندن تروريستي پېښې

د پله د پاسه رڼا، خو چوپتيا

پېښه د لندن د پله د پاسه شروع شوه. داسې ويل شوي دي چې يو سپين باروړونکی موټر د پلو کسانو په يوه ډله ورغلی وو. په دغه وخت کې يې لا انګيزه څرګنده شوې نه وه.

انځورونه: د لندن تروريستي پېښې

پوليسو له څرخي الوتکو او کښتيو څخه کار واخيست

د پوليسو څو څرخکې د لندن د پله د پاسه کوزې شوې. پل تخليه شوی وو. د بورو په مارکېټ کې هم د يوې «پېښې» خبر ورکړل شو. وروسته بيا د پوليسو کښتۍ هم وليدل شوې چې په قربانيانو پسې يې لټون ګاوه.

انځورونه: د لندن تروريستي پېښې

په بيړه کې د جامو بدلول

له خبرداري وروسته بيړه حاکمه وه. د پوليسو واحدونه د لندن پله ته ولېږدول شول. ځينو يوازې هلته فرصت وموند چې د مرميو ضد واسکټونه واغوندي.

انځورونه: د لندن تروريستي پېښې

بورو مارکېټ: پر رستورانت باندې چاپه

د «بلو آيد مېډ» په نوم رستورانت د بورو مارکېټ په ساحه کې پروت دی. پوليسو هلته تلاشۍ وکړې وروسته له هغه چې د چړو د بريدونو خبر ورغلی وو. دا چې څومره مرګ ژوبله اوښتې وه، لا څرګنده نه وه.

انځورونه: د لندن تروريستي پېښې

پورته کړي لاسونه

د پوليسو امرونو ته بايد دغو پلو کسانو هم غاړه ايښې وای. هغوی لاسونه پورته کړل او له صحنې لېرې شول. د عامل او قرباني تفريق لا د امنيتي ځواکونو له پاره اصلي ننګونه وه.

انځورونه: د لندن تروريستي پېښې

د ډار او وېرې شېبې

هغه پلي کسان چې پوليسو د لندن په زړه کې ژغورلي ول، ورو ورو پوه شول چې د ژوند جدي خطر ورته متوجه شوی وو. يوه عيني شاهد د بي بي سي چېنل ته وويل چې عاملينو په چړو بريدونه کول.

انځورونه: د لندن تروريستي پېښې

د قربانيانو شمېر نه وو په ګوته شوی

يوازې د شنه سهار په موده کې د وژل او ژوبل شوو په اړه معلومات راووتل. لومړی نهه تنه مړه شوي ول، يعنې درې واړه بريدګر او شپږ تنه عادي خلک. په عکس کې د لومړنۍ طبي مرستې صحنه ليدل کيږي.

انځورونه: د لندن تروريستي پېښې

په ښار کې بېړنی حالت حاکم وو

د بورو مارکېټ سيمه د سيلانيانو او د لندن د اوسېدونکو له پاره د مېلې ځای وي. په دغه شپه د پوليسو د موټرو څراغونه او غږونه موجود وو. ډېرې لارې او کوڅې بندې شوې هم وې.

انځورونه: د لندن تروريستي پېښې

په ځان پورې تړلې بوشکه

په ټولنيزو رسنيو کې دغه عکس هم خپور شو: هغه ښايي يو بريدګر وي چې په ډزو وژل شوی دی. په خپل بدن پورې يې بوشکه تړلې ده. بي بي سي هم دغه عکس خپور کړی دی. د پېښې په اړه تائيد شوي معلومات لا موجود نه ول.

موږ تعقيب کړئ