له آلمان څخه اخراج شوي افغان مهاجر کابل ته ورسیدل

د آلمان له بیلا بیلو ایالتونو څخه رد شوي ۲۷ تنه افغانان د پنجشنبې په سهار کابل ته ورسیدل. د رپوټونو له مخې په اول وار په دغه ډله کې دوه کسان داسې هم ول چې د خطر پیښونکو اصطلاح ورته کارول کیږي.

له آلمان څخه یوه بله ډله اخراج شوي افغانان د پنجشنبې په سهار وختي د کابل هوایي ډګر ته ورسیدل. د مهاجرت نړیوال سازمان یا (آی او ام) یوه استازي شاه زمان، د آلمان خبري آژانس ته ویلي دي چې الوتکه د سیمې پر وخت سهار څه باندې اته بجې د کابل په هوایي ډګر کې کښته شوه. د آلمان د خبري آژانس د معلوماتو له مخې په الوتکه کې ۲۷ تنه رد شوي مهاجر سپاره ول. دا له جنورۍ میاشتې راهیسې دوهم وار دی چې په یوه پرواز کې دومره ډیر رد شوي کسان استول کیږي. هغه مهال په الوتکه کې ۲۶ رد شوي مهاجر کابل ته لیږدول شوي ول.

په اول وار په دغو اخراج شوو کسانو دوه تنه داسي هم ول چې د خطر پيښونکي اصطلاح ورته کارول کیږي، او آلماني چارواکي داسې اټکل کوي چې ښایي په تروریستي اعمالو لاس پوري کړي. خو نوموړي خبري آژانس لیکلي دي چې په دې هکله د افغانستان اړخ ته کوم خاص تدابیر نه شته.

د آلمان خبري آژانس د افغانستان د کډوالو او راستنیدو چارو وزارت د یوه استازي فیض الرحمن خادم، له قوله لیکلي دي: «دلته هيڅوک پولیسو ته نه سپارل کیږي.» د هغه په خبره، دوی د مسافرو چاري په عادي ډول سر ته رسوي او هغوی ټول خپلو کورونو ته ستنیږي. دا چې پر دغو کسانو باندې څه ډول تورونه لګول شوي دي، لا روښانه شوې نه ده.

په می میاشت کې په کابل کې د آلمان سفارت ته څیرمه تر یوې خونړۍ چاودنې وروسته د آلمان ایالتونو افغانستان ته د اخرج لړۍ د جرمونو مرتکب شوو کسانو، د آلمان امنیت ته خطر پیښونکو او هغه کسان چې د خپل اصلي هویت له ښوولو څخه ډډه کوي، پورې محدوده کړه.

خو د مهاجرو فعالانو او مدافع وکیلانو د معلوماتو له مخې د اخراجیدونکو کسانو په نوملړ کې درې داسې ځوانان شامل وو چې په پورتنیو درو ګتګوریو کې نه راتلل. په دغو کسانو کې یو ځوان له بایرن ایالت څخه وو چې مسلکي زده کړې یې کولې. مدافع وکیلي مایرزني لازر، د چهارشنبې په شپه د پروسې په جریان کې د تیروتنې په هکله شکایت کړی دی.

د اخراج شوو کسانو زیاتره یې له بایرن ایالت څخه وو او یو تن له هیسن څخه. پر دې سربیره د آلمان د خبري آژانس د معلوماتو له مخې څلور تنه نارينه له هامبورګ، څلور له بادن ووتمبېرګ، یو له راینلند فلڅ، یو د زانکس او یو ښایي له نورد راین ویستفالن ايالت څخه وو. د وړاندې شوو معلوماتو له مخې په کابل کې به دا خبره ارزول کیږي چې ایا د اخراج پر ضد خو کومه عاجله پریکړه موجوده وه، که چیرته دغسې کومه پریکړه موجوده وي نو استول شوی کس بیرته آلمان ته راستنول کیږي.

د فرانکفورت په هوایي ډګر کې د چهارشنبې په ماښام شا او خوا ۵۰۰ فعالانو د دغو کسانو د اخراج پر ضد احتجاج وکړ.

دا د ۲۰۱۶م کال له دسمبر میاشتې راهیسې اتم وار دی چې رد شوي افغانان په ډله ایز ډول له آلمان څخه اخراجیږي. د آلمان د حکومت د رسمي معلوماتو له مخې په لومړیو اوو پروازونو کې ۱۲۸ تنه افغانستان ته استول شوي دي چې زیاتره یې ځوانان دي.

افغانستان ته د اخراج موضوع شخړه ایزه ده، ځکه چې ویل کیږي هلته د حکومت او وسله والو طالبانو او نورو وسله والو ډلو تر منځ کړکیچ زور اخیستی دی او په ټول هیوادد کې نښتې او بریدونه کيږي.

s.r/n.z (dpa)

زموږ له ارشيف څخه:

سياست

اخراج ضد احتجاج

د المان په نيورنبېرګ کي د پوليسو او تقريبا ۳۰۰ احتجاج کوونکو تر منځ هغه وخت ټېل ماټېل رامنځ ته سو، کله چي پوليسو غوښتل چي يو ۲۰ کلن افغان مهاجر د ځان سره بوزي او افغانستان ته يې ولېږدوي.

سياست

۲۰ کلن افغان مهاجر

تقريبا ۳۰۰ کسان چي اکثره يې شاګردان ول، په نيورنبېرګ کي راټول سوي ول چي د پوليسو مخه ونيسي چي دغه افغان مهاجر چي په يوه مسلکي ښوونځي کي شاګرد هم دی، د ځان سره بوزي.

سياست

اخ و ډب

په دغه ټېل ماټېل او اخ و ډب کي ۹ پوليس ژوبل سول او ۵ کسان په مؤقتي توګه د پوليسو له خوا ونيول سول. د دغې صحنې ويډيو کومه چي پر فيسبوک خپره کړل سوې وه، صرف په څو ساعتونو کي تر يو مليون څخه زيات واري وکتل سوه.

سياست

د احتجاجونو لړۍ

د افغان مهاجرو د اخراج پر ضد په آلمان کی په څو څو ځله احتجاجونه سوي دي. احتجاج کوونکي په دې نظر دي چي افغانستان د بېرته لېږد له پاره خوندي او امن ځای نه دی.

سياست

د برېمن ښاروال

د آلمان سوسيال ډيموکراټ ګوند سياستوال او د آلمان د برېمن ښاروال کارسټن زيلينګ د فُنکه په نوم د رسنيو ډلې ته ويلي دي چي د کابل وروستی خونړی بريد دا حتمي کوي چي «د المان حکومت بايد د افغانستان د امنيتي وضعي په تړاو پر خپله ارزيابي له سره غور وکړي.»

سياست

مالو درېير

د آلمان د سوسيال ډيموکراټ ګوند سياستواله مالو دريېر چي د آلمان د فدرالي ايالتونو د شورا رياست هم په غاړه لري، په کابل کي يې د وروستي بريد وروسته ويلي چي افغان مهاجر بايد بېرته افغانستان ته ونه لېږدول سي.

سياست

راينر ارنولد

د آلمان په پارلمان بُنډسټاګ کي د سوسيال ډيموکراټ ګوند د فراکسيون وياند راينر ارنولد غوښتنه کړې چي حد اقل د افغانانو بېرته لېږد دي په مؤقتي توګه ودرول سي. نوموړي په «پاساور نوين پرېسه» نومي ورځپاڼي ته ويلي چي په افغانستان کي انسانان هيڅ چيري امن ژوند نه سي کولای او له همدې کبله دغه هيواد ته د افغانانو بېرته لېږد «مسؤلانه» کار نه دی.

سياست

اميد نوريپور

د آلمان د زرغون ګوند د بهرنيو چارو سياستوال اميد نوريپور د آلمان پر حکومت تور پوري کړی دی چي ګواګي د افغانستان امنيتي وضعه تر هغه ښه ښيي لکه چي په واقعيت کي ده. نوموړي د «هايلبرونر شټيمه» نومي ورځپاڼي ته د کابل د وروستي بريد په هکله ويلي دي که د آلمان حکومت د افغان مهاجرو د اخراج له کبله د افغانستان د وضعې ښايسته کړل سوې ارزونه بېرته اصلاح نه کړي، نو به دا يو ناوړه کار وي.

سياست

پرو ازيول

د مهاجرو د ملاتړ سازمان پرو ازيول غوښتنه کوي چي و افغانستان ته دي د مهاجرو بېرته لېږد په مکمله توګه ودرول سي او دا چي هغه کسان چي د اخراجولو په مقصد په توقيف کي دي، هغوی دي آزاد کړل سي.

سياست

توماس ديميزير

خو د المان د کورنیو چارو وزير توماس ديميزير غواړي چي د ټولو تنقيدونو باوجوده د افغانانو د اجراج لړۍ ته ادامه ورکړي. د کورنيو چارو وزير ديميزېر ويل چي د چهارشنبې له پاره پلان سوې اخراجونه يې په دې خاطر ځنډولې ولي چي په کابل کي د آلمان د سفارت کار کوونکي د بريد په ترڅ کي تر دې نور مهم کارونه لري چي د اخراجونو مراقبت وکړي. د ديميزېر په وينا ځنډول سوی ډليز اخراج به وروسته عملي کړل سي.

سياست

بورکارد ليشکا

د المان د سوسيال ډيموکراټ ګوند د کورنيو چارو کارپوه بورکارد ليشکا هم په افغانستان د «نسبي آرامو» سيمو د شتون خبره کړې ده.

سياست

يوآخيم هېرمان

د آلمان د بايرن ايالت د کورنيو چارو وزير او د مسيحي سوسيال اتحاد سیاستوال يوآخيم هېرمان د فُنکه په نوم د رسنيو ډلې ته ويلي دي چي اوس هم و افغانستان ته د اخراج ملاتړ کوي.

سياست

۱۰۶ اخراج سوي

د ۲۰۱۶ کال د دسمبر راهيسي ۱۰۶ رد سوي افغان مهاجر خپل هيواد ته لېږدول سوي دي. د شليسويګ هولشتاين، نيدر زاکسن، نارد غاين وېسټفالن او غاينلانډ فالڅ ايالتونو د اخراج له پروسې سره پرېکون کړی او افغان مهاجر بېرته افغانستان ته نه لېږي.