مشعل: د کرکټ د بریا لپاره به هر اړخیز سیستم جوړ کړم

شکرالله عاطف مشعل وروسته له هغې د کرکټ بورډ مشر ټاکل شوی، چې پرپخواني مشر نسیم الله دانش باندې پراخې نېوکې وې چې له لوبغاړو سره دوه ګونی چلند کوي.

کرکټ، چې په تېرو پنځلسو کلونو کې د پام وړ لاسته راوړنې لري، خو په دې وروستیو کې یې د بورډ مشرتابه په سر ناندرۍ رامنځته شوې وې.

د کرکټ ملي لوبغاړي شاه پور ځدران خو په زغرده په رسنیو کې د کرکټ بورډ پخوانی مشر نسیم الله دانش تورناوه چې لوبډلې ته یې دده د ورتګ مخه نېوله.

د ښاغلي ځدران ترڅنګ د کرکټ ملي لوبډلې بل لوبغاړي شفیق الله شفق هم د کرکټ بورډ چارواکي پردوه ګوني چلند تورنول.

د کرکټ ملي لوبډلې ددغو لوبغاړو خوابدي په ټولیزو رسنیو کې پراخ غبرګون درلود، چې له امله یې ویل کیږي، افغان حکومت هم د کرکټ بورډ مشرتابه بدلون ته اړ شو.

له دغو ناندریو وروسته د ولسمشر د رسمي فرمان له مخي نن شنبي (د 2016 میلادي کال د دسمبر 17مه) په کابل کې د یوه غونډې په ترڅ شکرالله عاطف مشعل د افغانستان کرکټ بورډ له پاره د نوي مشر په توګه معرفي شو.

ښاغلي مشعل په غونډه کې ژمنه وکړه، چې د کرکټ سیسټم په هراړخیزه توګه جوړوي.

« په پوره صراحت وایم چې چې یوه ډېره مستقله د غوراوي کمېته به جوړوم د لوبغاړو د انتخاب روښانه کړنلاره برابروم مالي شفافیت ته به خاصه پاملرنه کوم.»

دغه راز نوموړي زیاته کړه ، د کرکټ په اړه پریکړو کی به د افغانستان کرکټ ملي لوبډلی پخوانیو لوبغاړو ، په کرکټ پوه کسانو او دغه راز د هیواد له ورزشي خبریالانو سره سلامشوري کوي.

د کرکټ بورډ دغړو په استازیتوب د مالیی وزیر اکلیل حکیمي د ښاغلي مشعل د پیژندلو په غونډه کی وویل، عاطف مشعل د یوي رڼې پروسې په ترڅ کې دغې څوکۍ ته له دوو نورو نوماندانو غوره شوی دی. هغه وويل: «له نوي رییس څخه  مو هیله داده چې د کرکټ بورډ لپاره لږ تر لږه درې کلنه کړنلاره جوړه کړي.»

خو د کرکـټ بورډ نوی مشر به له کومو ننګونو سره مخ وي؟

د کرکټ چارو کتونکي پردې باور دي چې د کرکټ بورډ نوي مشر لپاره به ترټولو ستره ننګونه دا وي چې څه ډول د کرکټ برخه کې د تېرو څو کلونو لاسته راوړنې وساتي؟

د کرکټ مشهور افغان کمینټر ابراهیم مومند دوچه ویله آلمان غږ راډیو ته وویل، چې ښاغلی مشعل باید له کرکټ ملي لوبډلې خفه لوبغاړي بیرته دلاسه کړي. هغه زياته کړه: «نوی مشر باید د کرکټ له ټولو لوبغاړو سره د قانون له مخې چلند وکړي، نو خفه لوبغاړي بیرته لوډلې ته راستانه شي.»

د کرکټ بورډ لپاره داسې مهال نوی مشر ټاکل کیږي، چې په دغه اداره کې د سیاسي لاسوهنو په اړه هم اندېښنې پرځای دي.

شکرالله عاطف مشعل د خپلي معرفی پرمهال له ولسمشر او اړوند چارواکو څخه وغوښتل چې په کرکټ بورډ کې دې ټولو سیاسي لاسوهنو ته د پای ټکی کېښودل شي.

محمد اسمعيل شاکر (کابل)

پر ورته موضوع یو انځوريز البوم زموږ له آرشيف څخه (12.07.2016):

د ورزش په اړه کومي خبري سمي او ناسمي دي؟

ورزش د بدن مقاومت زياتوي

رښتیا ده. د بدن فعالیت د دې سبب کیږي چې زړه او عضلات فعال شي خو افراطي ورزش د بدن دفاعي سیستم ضعیفه کوي. په اوونۍ کې څو واري ورزش د بدن مقاومت زياتوي.

د ورزش په اړه کومي خبري سمي او ناسمي دي؟

ورزش یوازي هغه وخت ګټه لري چې عضلات درد وکړي؟

سمه نه ده. بدن باید فعاله شي خو نه د درد تر حده پورې. تر ورزش وروسته د عضلاتو درد هم د هغه د موثریت په معنی نه دی. باید عضلات تر حده ډیر کش نه شي. د دې له پاره چې ورزش ښې پایلې ولري باید په اوونۍ کې له درو تر پنځو وارو پوري نیم ساعت وشي.

د ورزش په اړه کومي خبري سمي او ناسمي دي؟

هر څومره چې تیزي منډي ووهئ، ډیره ګټه لري

دا خبره سمه نه ده. ډېر کسان دا اشتباه کوي او په دې فکر دي چې سړی هر څومره تیزې منډې ووهي نو په هماغه اندازه یې په ګټه ده. باید د منډو وهلو په پیل کې داسې سرعت غوره کړئ چې پوهیږئ تر پایه پوري یې ساتلای شئ. داسي منډې ووهئ چې په جریان کې یې له یوه کس سره خبري وکولای شئ.

د ورزش په اړه کومي خبري سمي او ناسمي دي؟

څوګ چې سخت تمرین کوي نو د بدن ډیره وازگه ويلي کوي

سمه نه ده. د بدن د وازگي ويلي کولو له پاره ایده آل حرکات استقامتي ورزشونه دي، لکه لامبو، بایسکل چلول، منډي وهل، پیاده تلل او داسي نور. عضلاتي ورزش د مصرفي کالري د ډېرښت لامل کیږي.

د ورزش په اړه کومي خبري سمي او ناسمي دي؟

انرژي لیرونکی څښاک د ورزشکارانو له پاره ایده آل دی

سمه نه ده. په انرژي لیرونکی څښاک کي لکه معدني مواد، مالګه او کله نا کله پروتین او ځینې نور مواد پکښې وي. ورزشکاران بیا داسې نوشابو ته اړتیا لري چې سودیم او منیزیم ولري چې د بدن هغه مواد پوره شي چې د خولو له لاري د انسان له بدن څخه وځي.

د ورزش په اړه کومي خبري سمي او ناسمي دي؟

مگنیزیم د بدن د عضلاتو خستګي رفع کوي

د دې له پاره چې ښه اغیزه رامنځ ته شي ورزشکاران ۴۰۰ او ۶۰۰ ملي ګرامه مگنیزم ته اړتیا لري.

د ورزش په اړه کومي خبري سمي او ناسمي دي؟

کششي حرکتونه د عضلاتو د پرې کیدو لامل کیږي

کششي حرکات د عضلاتو د آرامش او د خوشحالي احساس د رامنځ ته کیدو سبب کیږي. دغه حرکات د عضلاتو د پرې کیدو لامل نه کیږي.

د ورزش په اړه کومي خبري سمي او ناسمي دي؟

څوک چې ډیري خولې کوي روغتیا یې ښه نه ده

سمه نه ده، دا ځکه چې ورزشکاران تر نورو ډیري خولې کوي.

د ورزش په اړه کومي خبري سمي او ناسمي دي؟

څوک چې ډیرې خولې کوي باید ډیرې اوبه وڅښې

سمه نه ده. د انسان بدن په هر ساعت کې ۰/۸ لیتر اوبه تنظیموي. د ډیرو اوبو څښل کیدای شي چې د بدن د نورو ضرورو موادو د ضایع کیدو لامل شي.

د ورزش په اړه کومي خبري سمي او ناسمي دي؟

په ورزش سره د بدن د وزن کمول

په لنډه موده کې سمه نه ده. په اوږدې موده کې ورزش یوازي په هغه صورت کې د انسان د بدن وزن کمولای شي چې له یوه ښه غذایي رژیم سره مل وي. ورزش د بدن د وازگي سلولونه په عضلاتو بدلوي او دغه سلولونه د استراحت په وخت کې د نورو په پرتله ډیره انرژي مصرفوي. له همدې کبله یوازې د یوه ښه غذایي رژیم او ورزش ترکیب کولای شي چې وزن کم کړي.

د ورزش په اړه کومي خبري سمي او ناسمي دي؟

ورزش د تيانو د لویدو لامل کیږي

سمه نه ده. د ورزش له کبله په تيانو کې د وینې حرکت ډیریږي او عضلات یې لا قوي کیږي.

د ورزش په اړه کومي خبري سمي او ناسمي دي؟

د بدن وازگه تر۳۰ دقیقو وروسته اوبه کیږي

آن هغه کسان چې ورو منډې وهي له لومړي قدم څخه د بدن وازگه اوبه کوي. خو په لومړي سر کې د وازگي د اوبه کیدو کچه ټیټه وي او تر ۲۰ او ۳۰ دقیقو وروسته ډیره وازده اوبه کیږي.

د ورزش په اړه کومي خبري سمي او ناسمي دي؟

په خالي نس ورزش

څوک چې سهار وختي په خالي نس ورزش وکړي د بدڼ ډیره وازگه ويلي کوي. خو باید په بدن کې د انرژې ذخیرې موجودې وي.

د ورزش په اړه کومي خبري سمي او ناسمي دي؟

د بایسکل چلول جنسي ناتواني رامنځ ته کوي

سمه نه ده. د بایسکل مشهوره چلوونکي ودونه او ماشومان لري. خو څېړنو ښوولې ده چې د بایسکل چلول د نارینه و پر جنسي لیوالتیا یو څه منفي اغیزه پریږدي.

د ورزش په اړه کومي خبري سمي او ناسمي دي؟

تر لامبو مخکې باید ډوډۍ و نه خورئ

سمه نه ده. څوک چې وږی وي باید تر لامبو مخکې یو څه ډوډۍ وخوري. خو دا ډیره ښه ده چې تر لامبو وروسته بیا ډیره ډوډۍ وخوړل شي.

موږ تعقيب کړئ