ملرګرو ملتونو په افغانستان کي د پارلماني انتخاباتو په اړه اندېښنه ښودلې
۱۳۸۹ مرداد ۲۴, یکشنبه
ټاکل سوې چي دغه انتخابات د سنبلې يا وږي د مياشتي پر ۲۷ نېټه په ټول افغانستان کي تر سره سي.
د يوناما مشر شټيفن ديميستورا په داسي حال کي د ټاکنو د امنيت په باب خپله اندېښنه ښولي چي د ملک په بيلا بيلو برخو کي انتخاباتي کمپاينونه روان دي.
د ملګرو ملتونو سازمان د افغان امنيتي ځواکونو څخه غوښتنه کړي چي د انتخاباتو پر مهال له هوښيارۍ څخه کار واخلي.
ښاغلي مستورا پر امنيت سربيره يو شمېر نور مسايل هم د اندېښنې وړ بللي، خو هغو ته يې په خاصه توګه ګوته نده نيولې.
په کابل کي د ملګرو ملتونو د سياسي نمايندګۍ يو وياند نظيف الله سالارزي وويل چي:
«د ملګرو ملتونو ځانګړي استازي په افغانستان کي يو شمير ننګونو ته اشاره کړي، په اول سر کي دا مسله ده چي نا امني بايد ددې لامل و نه ګرځي چي د افغانستان د خلکو په رايو کي لاس وهنه وسي، ځکه ده له امنيتي چارواکوغوښتي چي له ډيري بيدارۍ او هوښيارۍ څخه کار واخلي.»
د انتخاباتو امنيت هغه مسله ده چي په اړه يې بيلابيلي نړيوالي ټولني او د افغان دولت غربي متحدين اندېښمن دي.
هغوﺉ وايي چي، که چيري د انتخاباتو امنيت ډاډمن نه وي له يوي خوا به خلک و نه سي کړای چي، د رايو د صندوقونو پر لور ورسي او له بل لوري به يو شمېر عناصر له دې موکې څخه په ناوړه ګټي سره د خلکو په برخليک کي لاس ووهي.
خو افغان حکومت وايي چي د انتخاباتو د امنيت لپاره پر يوه ګډ امنيتي پلان کار روان دی چي، د ټاکنو په ورځ به د رايو پر مرکزونو او محلاتو سربيره د رايه ورکونکو امنيت خوندي سي.
د ملي دفاع وزارت وياند جنرال ظاهر عظيمي د انتخاباتو د امنيت په اړه ډاډمن ښکاري.
«موږ د ولسمشرۍ د انتخاباتو په پرتله ډيرامکانات په واک کي لرو، ددې لپاره زموږ ځواکونه پوره چمتو والی لري، د هغوﺉ تر څنګ د ايساف او ايتلاف سرتيري هم زموږ سره همکاره دي، د دي انتخاباتو د امنيت لپاره موږ درې سوه زره سرتيري لرو».
د مهال ويش له مخي به له نن څخه يو مياشته او څو ورځي وروسته پارلماني ټاکني تر سره شي.
په دغو ټاکنو کي د ملي شورا څه باندي دوه سوه څوکيو ته د هيواد له بيلا بيلو سيمو څخه د يو شمېر مېرمنو په ګډون شاوخوا شپږ نيم زره کسانو ځانونه نومولي دي.
ميرويس جلالزی/ کابل
کتونکی: نجيب الله زيارمل