نوی قانون ـ د ترکيې تابعيت لا آسانه؟

د ترکيې د قانون په تازه رسمي جريده کي د تابعيت په تړاو نوي قوانين خپاره او نافذ سول. د دغو نوو قوانينو په ړنا کي به بهرنيان وکولای سي چي د پانګونې له لاري د ترکيې تابعيت تر لاسه کړي.

ترکيه به هغو کسانو ته د دغه هيواد تابعيت ورکړي چي په ترکيه کي پانګونه وکړي او په دې توګه د ترکيې د اقتصاد په پرمخ بيولو کي مرسته وکړي. دا د هغه قانون له مخي چي د پنجشنبې په ورځ (د ۲۱۰۷ کال د جنورۍ ۱۴مه نېټه) د قانون په رسمي جريده کي خپور سو.

د دغه قانون له مخي د ترکي تابعيت غوښتونکي هغه خارجي ته به د ترکيې تابعيت ورکول کيږي چي د يو مليون ډالرو په اندازه غېر منقول اموال رانيسي او په دغه هيواد کي لږ تر لږه ۲ مليونه ډالره پانګه واچوي. د هغه علاوه به هغه چا ته هم د ترکيې تابعيت ورکول کيږي چي حد اقل ۳ مليونه ډالره په ترکيه کي په خپل بانکي حساب کي جمع کړي.

د ترکيې د تابعيت په تړاو دغه قانون په داسي حال کي نافذ کيږي چي د ترکيې ليرا پيسې تر سخت فشار لاندي راغلي دي. د دغه فشار لامل د سياسي، امنيتي او اقتصادي ستونزو سره پر يو وخت رامنځ ته کېدنه بلل کيږي.

په رسمي جريده کي د تابعيت د قانون د خپرېدو او په دې توګه نافذالعمل کېدو څخه يوه اونۍ تر مخه د ترکيې ولسمشر رجب طيب اردوغان پر دې لور يو بل ګام هم اخيستی ؤ. نوموړي ويلي ول چي هغه سوريايي او عراقي مهاجرو ته به د ترکيې تابعيت ورکول سي، کوم چي په امنيتي امتحان کي بريالي سي او يو مسلک يې زده وي.

اروپايي اتحاديې هم پر ترکيې فشار زيات کړی چي و سوريايي مهاجرو ته په ترکيه کي د کار کولو قانوني اسانتياوي زیاتي کړي. اروپايي اتحاديه هيله لري چي که سوريايي مهاجر په ترکيه کي د کار کولو امکانات ولري نو ښايي هغوی په دومره زيات شمېر اروپا ته مخه ونه کړي.

پر ورته موضوع یو انځوريز البوم زموږ له آرشيف څخه (04.03.2016):

کوم پاسپورت تر ټولو زیات سرحدونه درته پرانیزي؟

«جرمني ته ښه راغلاست»

آلمانیانو ته د نړۍ دروازې پرانستي دي. د لندن د مشورتي شرکت «هینلې او پارتنر» د معلوماتو په حواله آلمانان ۱۷۷ هیوادونو ته بې له ویزې سفر کولای شي. له دې سره آلمان په پرله پسې دریم کال لومړی ځای خپل کړی.

کوم پاسپورت تر ټولو زیات سرحدونه درته پرانیزي؟

له خپل وطن سره مینه او نړۍ ته غیږ پرانستي

دوهم ځای سویډن لري. د ښایسته کلیو او ښکلي طبیعت خاوند دغه هیواد د نوري نړۍ د سیلانیانو له پاره یو په زړه پورې ځای دی. خو سویډنیان خپله هم ډیر د سفر شوقیان دي. د دوی د ټولو خارجي سفرونو ۷۱ سلنه د سیاحت په موخه ترسره کیږي. د نړۍ د ۱۷۶ هیوادونو دروازې دوی ته پرانيستي دي او پرته له ویزې ورته سفر کولای شي.

کوم پاسپورت تر ټولو زیات سرحدونه درته پرانیزي؟

د سنګاپور ملیمنو ته هم په ښه سترګه کتل کیږي

په آسیا کې د سنګاپور او جاپان پاسپورت لرونکي د سفر ډيره آزادي لري. د دغه هیوادونو وګړي ۱۷۳ ملکونو ته له ویزې اخیستو پرته تګ راتګ کولای شي. له دریم څخه تر نهم مقام پوري د ختیځې اروپا هیوادونو او همدا راز استرلیا، کانادا، جنوبي کوریا او نوی زیلاند خپل کړي. امریکا متحد ایالات وار د واره مخکې کیږي او څلورم مقام لري.

کوم پاسپورت تر ټولو زیات سرحدونه درته پرانیزي؟

له چیک جمهوریت څخه د ټولي نړۍ سفر

د برلین دیوال تر ړنګیدو وروسته د ختیځې اروپا ډيرو هیوادونو خپل سرحدونو خلاص کړل. په ۲۰۰۸م کال کې چیک جمهوریت او هنګري د اروپايي ټولنې د نورو هیوادونو سره په شریکه د شینګن په ساحه کې شامل شول. د آیسلند هیواد سره په شریکه د دغه هیوادونو پاسپورتونه لسم مقام لري. د دغه پاسپورت لرونکي ۱۶۷ هیوادونو ته پرته له ویزې سفر کولای شي.

کوم پاسپورت تر ټولو زیات سرحدونه درته پرانیزي؟

کولمبیا دی ژوندی وي

کولمبیا په یوه کال کې ډير پرمختګ وکړ. د لاتین امریکا دغه هیواد ۲۵ مقامه مخکې شو او اوس پنځوسم ځای لري. همدا راز د سویل ختیځې آسیا ټاپو وزمه هیواد ختیځ تیمور له اروپايي ټولني سره د ویزې د یوه دوه اړخیز تړون له برکته ۵۷ مقام ته لوړ شو.

کوم پاسپورت تر ټولو زیات سرحدونه درته پرانیزي؟

چینایان نړۍ «فتح» کوي

د جاپان، جنوبي کوریا او امریکا متحدو ایالاتو سره د ویزې د محدودیتونو د نرمولو له امله اوس چینایان هم د سفر زیاته آزادي لري. ډيري چینایان له اقتصادي اړخه هم د دې جوګه دي چې نورو هیوادونو ته سفر وکړي. د رسنیو د رپوټونو په حواله استرلیا او بریتانیا پر دې اړه فکر کوي چې د چینايي وگړو له پاره د سفر شرایط آسانه کړي.

کوم پاسپورت تر ټولو زیات سرحدونه درته پرانیزي؟

د اروپا پر لور تېښته

سوریايي وګړي یوازې ۳۲ هیوادونو ته پرته له ویزې سفر کولای شي. دغه عربي هیواد له دې سره د پاسپورتونو په نړیواله درجه بندي کې ډیر شاته دی. خو د سوریايي پاسپورت درلودونکي بیا لږ تر لږه یو چانس لري چې د یوه پناه وړونکي په توګه په اروپا کې ومنل شي. د عراق او یا افغانستان د مهاجرو له پاره بیا دا ډيره مشکله ده.

کوم پاسپورت تر ټولو زیات سرحدونه درته پرانیزي؟

د افغانانو له پاره کمه هیله مندي

افغانستان هم په دغه درجه بندۍ کې له هغو هیوادونو څخه یو دی چې وروستي مقامونه لري. په دې توګه دغه هیواد د سوریې، سومالیا، پاکستان او عراق ترڅنګ په هغو پنځوو هیوادونو کې شامل دی چې وګړو ته یې قانوني سفر تقریباً ناممکنه کوي. د دې وجه په دغه هیوادونو کې د څو کالو سیاسي بې ثباتي ده.


 

نور مضمونونه

موږ تعقيب کړئ