«هغه مهاجر چې غواړي نرس شي، آلمانۍ اقامه دې ورکړل شي»

د آلمان زرغون ګوند وړانديز کړی، چې هغو مهاجرو ته دې په آلمان کې د اوږدې مودې اوسیدو اقامې ورکړل شي چې غواړي د نرسنګ او زړو افرادو د پالنې په برخو کې کار کوي.

آلمان د هيواد په کچه د زړو افرادو د پالنې په برخه کې دروزل شويو پرسونل يا نرسانو له کمښت سره مخ دی. د آلمان په پارلمان کې د زرغون ګوند پارلماني مشر رابرت هابيک، په دې اړه آلماني خبري آژانس (دي. پې. اې) سره په خبرو کې ويلي دي: «موږ اړتيا لرو چې نرسانو او روغتيايي کارکونکو ته په آلمان کې د خپلواکه اوسيدو اجازه ورکړو او په کار ده چې دغه مسئله هم د پناه غوښتنې په ملکي قانون کې ورزياته کړل شي.»

له بل لورې په آلمان کې د هغو مهاجرو او پناه غوښتونکو شمير کې هم لوړ دی، کوم چې د نرسنګ په څانګه کې زده کړې کوي. هايک په دې اړه له مرکزي حکومت څخه وغوښتل چې هغو مهاجرو ته چې په روغتيايي برخه کې په کار بوخت دي، په آلمان کې دې ورته د اوږدې مودې پاتې کيدو اقامې ورکړل شي. هغه زياتوي چې اړتيا ده تر څو په دې تړاو په قانون کې تغييرات راوستل شي.

روانه اوونۍ په يو خپور شوي رپوټ کې راغلي وو چې په ټول آلمان کې د زړو افرادو د پالنې په برخه کې د مسلکي افرادو کمښت ترسترګو کيږي. په دې برخه کې ۳۵ زره ځایونه خالي دي. د آلمان مرکزي حکومت هم په حاضر وخت کې د زاړه عمر لرونکو افرادو د پالنې په برخه کې د ۸ زرو نورو خصوصي ځایونو ذکر کړی دی. په عين وخت کې برلین د جذب او تشويق په موخه، په تنخواه و کې زياتوالی، روزنيز امکانات او د نورو اضافي امتيازاتو اعلان کړی دی.

زرغون ګوند ويلي دي چې په دې برخه کې روزنه ډير وخت او لګښت ته اړتيا لري، په همدې دليل بايد داسې يو ډاډ رامنځته شي تر څو هغو مهاجرو او پناه غوښتونکو ته چې په دې روغتيايي څانګه کې روزنې ويني، په آلمان کې ورته د اوږدې مودې اوسيدو اقامې ورکړل شي.

رابرت هایک زياتوی چې په دې سره نه يوازې مهاجر او پناه غوښتونکو له پاره کاري فرصتونه پیدا کيږي، بلکه پر اړوندې روغتیايي څانګې د موجوده فشارونو کچه هم ښکته کيدای شي.

دا هم زموږ له آرشيف څخه يو انځوريز البوم:

د کوم مسلک خلک په آلمان کې ژر کار ترلاسه کولی شي؟

داکتر

په دې څانګه کې کار د مقرراتو پر بنسټ تنظیم شوی یعني په دې برخه کې د پوهې سطحه باید د آلماني معیارونو سره برابر وي. هغه داکتران چې له اروپایې اتحادیې څخه بهر آلمان ته راغلي دي په دې هیواد کې د کار له پاره باید اجازتنامه ترلاسه کړي. دغه اجازتنامه کیدای شي موقتي او یوازې په هغه ایالت کې اعتبار ولري چې دغه اجازتنامه یې ورکړې. بله نا محدوده اجازتنامه ده چې د هغې ترلاسه کولو له پاره باید امتحان ورکړي.

د کوم مسلک خلک په آلمان کې ژر کار ترلاسه کولی شي؟

نرس

په دې رشته کي سړی کولی شي یوازې د ایالتي ادارو له اجازتنامې سره کار وکړي، خو د یوې ازموینې ورکول اړين دي. یو شمیر درسي پروګرامونه او کاري تجربي د جبران وړ دي، خو که چیرې دغه توپير ډیر زیات وي بیا نو باید یوه تخصصي آزمونه ورکړي او یا هم یوه دری کلنه روزنیزه دوره بشپړه کړي. نرسان یا نرسانې هم باید په روزمره ژوند کې کاریدونکي آلماني او طبي اصطلاحاتو سره آشنایې ولري.

د کوم مسلک خلک په آلمان کې ژر کار ترلاسه کولی شي؟

انجینر

په آلمان کې د انجینر په توګه د کار کولو له پاره حتمي نه ده چې د دغه شخص د انجینرۍ خارجي دیپلوم دې په رسمیت پیژندل شوی وي. کار ورکونکی شرکت په خپله پریکړه کوي چې آیا نوموړی شخص چې د کار ترلاسه کولو غوښتنه یې کړې یو مناسب کس دی او که څنګه؟ په عین وخت کې د یوه مسلک په برخه کې تخصص د کار په بازار کې جانس زیاتوي.

د کوم مسلک خلک په آلمان کې ژر کار ترلاسه کولی شي؟

د کمپوټر متخصص

د دې مسلک له پاره تر اوسه بورې خاص قوانین نه دي وضعه شوي. د یوه کاري ځای د موجودیت په صورت کې هر څوک چې ځان مناسب بولي خپل غوښتنلیک دي واستوي. د ۲۰۱۶ کال د احصایو له مخې په دې برخه کې متخصصیونو ته تقاضا ډیره شوی ده.

د کوم مسلک خلک په آلمان کې ژر کار ترلاسه کولی شي؟

د حرفوي زده کړو متخصصین

د ۳۰۱۳ م کال را په دیخوا د آلمان د کار د چارو وزارت په آلماني شرکتونو کې د مسلکي کارګرانو له پاره شرایط آسانه کړي دي. د هغو شمیرو له مخې چې د ۲۰۱۶ م کال په سپټمبر میاشت کې اخیستل شوي دي مسلکي بهرنیان تر ټولو زیات د فلزکارۍ، د پرزو نصبولو، د برښنا ټکنالوژۍ، پایپ جوړونې، چت جوړونې او نورو ساختماني برخو کې له دغو آسانتیاو څخه ګټه اخیستې ده.

د کوم مسلک خلک په آلمان کې ژر کار ترلاسه کولی شي؟

تحصیل یافته متخصصین

د دې رشتو متخصصین باید په آلماني ژبه پوه اوسي او په خپله رشته کي یې لوړی زده کړې کړي وي. که څه هم د دوی د تحصیلي اسنادو تائید حتمي نه دی خو د کار په چارو کې د آلمان فدرالي اداره سپارښتنه کوي چې د بهرنیانیو متخصصینو دیپلومونه باید له آلماني معیارونو سره سم وي. دغه اسناد د سوداګرۍ او صنایعو ادارې له خوا ارزول کیږي او شاوخوا دری میاشتې وخت نیسي.

د کوم مسلک خلک په آلمان کې ژر کار ترلاسه کولی شي؟

کوم ځای ته باید مراجعه وشي؟

پر دې د پوهیدلو له پاره چې آیا ستاسي دیپلوم چي له آلمان څخه مو بهر اخیستې دی په رسمیت پيژندل کیدو ته اړتیا شته او که نه، د دې انټرنټي ادرس www.anerkennung-in-deutschland.de دې برخې Anerkennungsfinder ته مراجعه وکړئ. همدارنګه په دې ادرس کې هغه آژانسونه موندلی شئ چې ستاسي اسناد ارزوي.

موږ تعقيب کړئ