هند په فضا کې يوه سپوږمکۍ ويشتلې ده

د هند د لومړي وزير نريندرا مودي په حواله دغه هيواد د خپل نوي دافع هوا سسټم کاميابه آزموينه کړې ده. ويل شوي دي چې يوه توغندي یې د ځمکۍ په مدار کې د ۳۰۰ کيلومترو په ارتفاع کې يوه سپوږمکۍ ويجاړه کړې ده.

د هند لومړي وزير نريندرا مودي په تلویزيوني وينا کې وويل چې هند نن ځان په فضا کې هم د يوه ستر قوت په توگه مطرح کړ. هغه وويل چې سټيلايت يا سپوږمکۍ ضد وسلې «A - SAT» یې وکولای شول په درو دقيقو کې په کاميابۍ سره يو ژوندی ـ ستيلايت د ځمکې په ټيټ مدار کې د کابو ۳۰۰ کيلو مترو په لوړوالي کې را نسکور کړي.

مودي په خپلو خبرو کې وويل چې د «شکتي» په نوم دا ماموريت د هيواد د اقتصادي ودې او تخنيکي پرمختگ له پاره يو مهم گام دی.

څلور نور هيوادونه دا تخنيک لري

لومړي وزير وويل چې تر اوسه د نړۍ يوازې درې هيوادونه يعني امريکا متحده ايالات، روسيه او چين دا تخنيک لري او هند د څلورم هيواد په توگه په دغه کتار کې شامل شوی دی.

مودي په خورا ډاډ سره وويل چې د A – SAT توغندی به د هند د فضا نوردۍ د پروگرام د پرمختگ باعث وگرځي.

مودي ډاډ ورکړ چې هند به دا تخنيک د نورو هيوادونو پرضد استعمال نه کړي. هغه زياته کړه چې دا پروگرام يوازې د دفاع په موخه رامنځته شوی دی. نوموړي وويل چې په دې آزموينې سره یې له نړيوالو قوانينو څخه سرغړونه نه ده کړې او نه یې هم کوم تړون نقض کړی دی.

مودي د تلویزيون له لارې دغه آزموينه اعلان کړه

د جنوبي آسيا دا هيواد چې ۱،۳ ميليارده نفوس لري، يو ښه او کامياب فضايي پروگرام لري. مودي تيرکال اعلان کړی وو چې په ۲۰۲۲م کال کې به يعني د هند د آزادۍ د ۷۵ کلیزې په مناسبت به د څلورم هيواد په توگه فضا ته داسې يوه سپوږمکۍ وليږي چې هوا نورد به هم پکښې وي.

د انتخاباتي کمپاين تور

د اپوزيسيون استازو بيا د مودي په دې ډول راڅرگنديدو نيوکې کړي او دا یې د هغه د انتخاباتي کمپاين برخه او تگلاره وبلله. په هند کې به د اپريل له ۱۱ نيټې څخه د مي تر ۱۹ نيټې پورې په څو پړاونونو کې د استازو مجلس غړي انتخاب شي.

ممتا بينرجي چې د هند د «آل انډيا ترينمول گوند» مشره ده او غواړي د هند لومړۍ وزيره شي، د ټاکنو له قوانينو څخه د سرغړوني خبره وکړه او د انتخاباتو کمیسيون ته یې رسمي شکايت وکړ.

د مودي هندو ناسيونالست گوند په ټاکنو کې د خلکو د خوښي وړ گوند گڼل کيږي. د کاميابۍ په صورت کې به مودي کولی شي د نورو پنځوو کلونو له  پاره د حکومت چارې پر مخ يوسي.

B.S/N.Z (rtr, deccanherhold, dpa)

زموږ له آرشيف څخه:

د سنتينل سپوږمکۍ د لارې اخيستل شوي د ځمکې د کُرې انځورونه

د فرانسې د سمندر غاړه

په دغه عکس کې د فرانسې د مديترانې د سمندر غاړه ګورئ. د فرانسې په کان ښار کې د کوپرنيګوس پروګرام له پاره د سنتينل سپوږمکيو مهم توکي جوړيږي. د ايربوس شرکت هم ځينې پرزې په اختيار کې ورکوي.

د سنتينل سپوږمکۍ د لارې اخيستل شوي د ځمکې د کُرې انځورونه

تر اوسه څه شوي دي؟

د ۲۰۱۴ او ۲۰۱۶ کلونو په ترڅ کې درې سنتينل سپوږمکۍ فضا ته وتوغول شوې. د دريمې سنتينل سپوږمکۍ له خوا اخيستل شوی دغه انځور د نيل سيند او د نژدې ختيځ يوه برخه ښېي. د سنتينل په نوم سپوږمکۍ هغه انرژي اندازه کوي چې د ځمکې د سطحې څخه پورته کيږي.

د سنتينل سپوږمکۍ د لارې اخيستل شوي د ځمکې د کُرې انځورونه

اصلي رنګونه

دغه ډېر دقيق انځور د سعودي عربستان د ساحل په اوږدو کې په سره سمندر کې د مرجانو غونډۍ ښېي. د سنتينل سپوږمکيو د انځورونو کيفيت د پخوانو سپوږمکيو په پرتله ډېر ښه دی. په دغو انځورونو کې ونې، بوټي، سيندونه، لښتي او ساحلونه په دقيق ډول څېړل کېدلی شي.

د سنتينل سپوږمکۍ د لارې اخيستل شوي د ځمکې د کُرې انځورونه

رنګ کړل شوي انځورونه

دغه عکس وروسته رنګ کړل شوی دی چې په سودان کې د خرطوم سويلي برخه ښېي. په ښي پاسني اړخ کې د نيل سيند يوه څنډه ليدل کيږي. سره ټکي د سيند په اوږدو کې بوټي ښېي. رنګ وروسته ورکړل شوی دی څو له عکسونو څخه سم تعبير واخيستل وشي.

د سنتينل سپوږمکۍ د لارې اخيستل شوي د ځمکې د کُرې انځورونه

ګواښل شوی بندر

په دغه عکس کې د لويديځې افريقا سيرا لېون هېواد ليدل کيږي. پلازمېنه فريټاون يې د انځور په لاندنۍ برخه کې په نيمه ټاپو کې قرار لري. اقتصادي چارې يې د ژورو اوبو په طبيعي بندر پورې تر ډېره تړلې دي. د اروپا د فضايي ادارې څېړونکي وايي چې ګرد چاپېره جوړ شوي ښارګوټي اوس بندر ګواښي ځکه چې د ښارګوټو د جوړولو له پاره ځنګلونه وهل شوي دي.

د سنتينل سپوږمکۍ د لارې اخيستل شوي د ځمکې د کُرې انځورونه

د يوما ښار څلورکونجه جوړښتونه

د سنتينل سپوږمکيو ډېر شمېر عکسونه هنري ارزښت لري. په دغه انځور کې د امريکا متحده آيالاتو په اريزونا آيالت کې پروت د يوما ښار ليدل کيږي. دغه ښار د مکسيکو له پولې سره څېرمه پروت دی.

د سنتينل سپوږمکۍ د لارې اخيستل شوي د ځمکې د کُرې انځورونه

د آرال سمندرګی په ورکېدو دی

دا د آرال په نوم سمندرګی دی چې د درو سنتينل سپوږمکيو له عکسونو څخه يو ځای شوی دی. د اروپا فضايي اداره وايي چې د آرال سمندرګی «د دې له پاره اصلي ثبوت دی چې بشر څه ډول اغېزې پر چاپېريال او طبيعي سرچينو باندې لري.» د ۱۹۶۰ کال راهيسې يې د ډېر استعمال د وجې ۹۰ سلنه اوبه له لاسه ورکړې دي.

د سنتينل سپوږمکۍ د لارې اخيستل شوي د ځمکې د کُرې انځورونه

د برلين بشپړ انځور

دغه انځور د آلمان پلازمېنه برلين ښېي. سړی ليدلی شي چې دغه ښار څومره زرغون دی چې په لويديځ کې يې د تېګل او وان به نوم ډنډونه قرار لري. د انځور په لاندنۍ منځنۍ برخه کې پخوانی هوايي ډګر ليدل کيږي. که نور د سپوږمکۍ له خوا اخيستل شوي انځورونه ليدل غواړئ، نو لاندې ويبپاڼې ته مراجعه وکړئ: www.esa.int/spaceimages/Images

موږ تعقيب کړئ