پاريس هوايي ډګر ـ پوليسو يو کس په ډزو وواژه

د پاريس په اورلي هوايي ډګر کي يو کس د پوليسو له خوا په ډزو ووژل سو. دغه کس د يو عسکر څخه د وسله اخيستلو هڅه کړې وه. ايا دغه کس غوښتل وسله وال بريد وکړي؟

د شنبې په ورځ (د ۲۰۱۷ کال د مارچ ۱۸ مه نېټه) د فرانسې د پلازمېني پاريس په اورلې هوايي ډګر کي يو کس هڅه وکړه چي د عسکر څخه وسله واخلي. د عسکر په وړاندي د دغه بريد په ترڅ کي پوليسو دغه کس په ډزو وواژه. د فرانسې د پوليسو وياندي د آلمان خبري آژانس ته ويلي چي دغه سړی د هغه وروسته د پوليسو له خوا وويشتل سو، چي د عسکر څخه د وسله اخيستلو ناکامه هڅه يې وکړه.

خو د فرانس پريس خبري آژانس بيا د کورنيو چارو د وزارت په حواله ويلي دي چي دغه کس په دې توانېدلی ؤ چي له عسکر څخه وسله واخلي. زياته سوې چي هغه وروسته د وسلې سره يو دوکان ته وتښتېد او هملته د پوليسو له لوري په ډزو ووژل سو. دا چي د دغي پيښي تر شا کوم لاملونه ول لا تر اوسه نه دي څرګند.

د فرانسې د کورنيو چارو وزارت پر خپله ټويټر پاڼه ليکلي چي د کورنيو چارو وزير برونو لې روکس د پيښي وروسته هوايي ډګر ته ورسېد. پر دغه هوايي ډګر د الوتکو تګ راتګ په بشپړه توګه متوقف کړل سوی دی. دغه وزير پر مسافرو ږغ کړی دی چي دغه هوايي ډګر ته دي نه ورځي. د دغه هوايي ډګر هوايي ترافيک د شارل دې ګول هوايي ډګر ته لېږدول کيږي. دا نه ده څرګنده چي دغه کس ولي د عسکر څخه د وسله اخيستلو هڅه کړې وه. دا هم نه ده څرګنده چي ايا دغه کس غوښتل چي يو وسله وال بريد تر سره کړي که څنګه.

د اورلې هوايي ډګر د پاريس په سويل کي واقع دی او د شارل دې ګول هوايي ډګر وروسته د پلازمېني تر ټولو لوی هوايي ډګر دی.

په پاريس کي د ۲۰۱۵ کال د نوامبر د ۱۳مي د بريد راهيسي په دغه هيواد کي اضطراري حالت برقرار دی. د نوامبر په دغه بريد کي د داعش وسله والو ۱۳۰ انسانان په ډزو وژلي ول.

پر ورته موضوع یو انځوريز البوم زموږ له آرشيف څخه (14.11.2015):

دغه شپه به فرانسه او نړۍ بدله کړي

لومړني راپورونه

د آلمان او فرانسې تر منځ د فوټبال دوستانه لوبه لا روانه وه چې د سرټکو په صفت لومړني بېړني راپورونه د تلويزيون پر پردو باندې راغلل.

دغه شپه به فرانسه او نړۍ بدله کړي

انسانان په وېره کې

دغو راپورونو د پاريس په اوسېدونکو کې وېره او ترهه راوټوکوله. پر ولس باندې غږ وشو چې له خپلو کورونو او اپارتمانونو دې نه وزي.

دغه شپه به فرانسه او نړۍ بدله کړي

د کنسرت تالار د يرغمل نيونې پر صحنې بدل شو

د باتاکلان په نوم په تالار کې پوليسو د سهار يوې بجې په شاوخوا کې يرغمل نيونه پای ته ورسوله. هلته د «هېوي مېتل» موسيقۍ کنسرت روان و.

دغه شپه به فرانسه او نړۍ بدله کړي

ولسمشر ټکان وخوړ

ولسمشر اولاند د تلويزيون له لارې د فرانسې ولس ته خطاب وکړ. هغه د فوټبال لوبې په نيمايي تفريح کې لوبغالی پرې ايښی و. د SID په نوم خبري اژانس راپور ورکړ چې اولاند «خوندي ځای ته رسول شوی و.»

دغه شپه به فرانسه او نړۍ بدله کړي

په لوبغالي کې لوبغاړو او مينه والو شتون درلود

په دې ترڅ کې د فوټبال مينه والو او د آلمان او فرانسې د ملي ټيمونو لوبغاړو اجازه نه درلوده چې له لوبغالي څخه ووزي. په لوبغالي کې دننه ترينګلې فضا خپره وه.

دغه شپه به فرانسه او نړۍ بدله کړي

احتمالا پنځه بريدکوونکي، ټول ووژل شول

په شپه کې راوتلو راپورونو له پنځو بريدکوونکو څخه خبرې کولې. د لويې څارنوالۍ په حواله ويل کيږي چې ټول ووژل شول. کېدای شي چې نور بريدګر په تېښته بريالي شوي وي.

دغه شپه به فرانسه او نړۍ بدله کړي

د ژوندي پاتې شوو وېره

د مړو شمېر به ښايي لا لوړ شي. د شپې له خوا له ۱۲۰ وژل شوو کسانو څخه خبرې کېدلې. ژوندي پاتې شوي سخت وډارېدل.

دغه شپه به فرانسه او نړۍ بدله کړي

امنيتي تدابیر سخت شول

په ټوله نړۍ کې امنيتي تدابير کلک شول، په انځور کې په نيو يارک ښار کې د فرانسې قونسلګيري ليدل کيږي.

دغه شپه به فرانسه او نړۍ بدله کړي

په ټوله نړۍ کې خواخوږي

په نيو يارک ښار کې د «وان ورلد» سوداګريز مرکز خپل انتن د فرانسې په ملي رنګونو روښانه کړی دی. د نيو يارک آيالت ګورنر، اندرېو کومو وويل چې «موږ د فرانسې ولس سره په خواخوږۍ کې ځانونه شريک بولو.»



 

اړوند مطالب

افغانستان | 21.05.2017

کابل: د امنيت تضمين نسته

موږ تعقيب کړئ