په افغانستان کې د بې کيفيته درملو ستونزه
۱۴۰۰ فروردین ۲۳, دوشنبه
د افغانستان د درملیزو خدمتونو ټولنه وايي، د اقتصادي مافیا ترشا ځانګړې حکومتي کړۍ ولاړه ده چې په مټ یې هيواد ته د درملو او طبي وسایلو د وارداتو چاره یوازي د پنځو شرکتونو لاسو ته لوېدلې.
د دې ټولنې مشر اسدالله کاکړ نن دوشنبې (۲۰۲۱م کال د اپریل ۱۲مه) په کابل کې خبري غونډې ته وویل، اوسمهال د درملو واردولو شاوخوا ۵۰۰ شرکتونه فعال دي، خو حکومت هڅه کوي چې دغه واردات یوازي د څو ګوتو په شمېر شرکتونو انحصار کې راولي: «که چېرې د درملو واردات یوازي پنځو شرکتونو ته منحصر شي، د بازار د درملو اړتیاوي نه شي پوره کولای.»
کاکړ زیاتوي چې په دې سره افغانستان ته د بې کیفیته درملو قاچاق ته لاډیره زمینه برابروي.
د درملیزو خدمتونو ټولنې ددغو پنځو شرکتونو هویت په ډاګه نه کړ چې په وینا د درملو واردات انحصاروي، خو تور یې ولګاوه چې ځانګړې مافیايي ـ اقتصادي کړۍ نه غواړي د دې طرحې تر وروستي کېدو دغه شرکتونه په ډاګه کړي.
د ټولنې مشر زیاته کړه: «موږ نه غواړو چې د درملو واردات هم د تیلو او گازو مافیا په څیر د څو مافیايي شرکتونو په لاس کې ولویږي، ځکه د حکومت ددې پریکړې اصلي زیان خلکو ته رسیږي.»
د درملیزو خدمتونو د ټولنې د معلوماتو پربنسټ اوسمهال په ټول هيواد کې شاوخو ۱۵ زره درملتونونه او شاوخوا ۵۰۰ د درمل واردولو شرکتونه فعالیت کوي. دغه راز، د درملو جوړولو شاوخوا ۸۰ فابریکې هم په کار بوختې دي.
د درملیزو خدمتونو ټولنې خبرداری ورکړی چې که د روانې وري میاشتې تر ۲۵مې یې اعتراض وا نه وریدل شي، نو په ټول هيواد کې به د درملو شرکتونه په کاربندیز لاس پورې کړي.
د افغانستان د عامي روغتیا وزارت یوه ویاند د درملیزو خدمتونو ټولنې دغه اعتراض ته په ځواب کې یواځې همدومره وویل، چې د درملو اړوند ټولې چارې اوس یوې خپلواکې ادارې ته سپارل شوي.
افغانستان ته د بې کیفیته درملو واردات
سره له دې چې افغان حکومت او د درملو واردولو شرکتونه وايي، هيواد ته راواردېدونکي درمل بې کیفیته نه دي، کتونکي تور لګوي چې افغانستان ته راواردیدونکي ۶۰ سلنه درمل بې کیفیته دي. د حکومت وینا داده چې هیڅ شرکت د بې کیفیته درملو راواردولو اجازه نه لري.
ډاکټر محمد یوسف یعقوب زاده په دې اړه دویچه ویله ته وویل: «ددې درملو ډیره برخه افغانستان ته په قاچاقي ډول راوړل کیږي او هلته ګمرکي محصول هم نه ترې اخېستل کیږي.»
دغه ډاکټر ټینګار وکړ چې حکومت باید د خیالي شرکتونو چې هيواد ته بې کیفیته درمل راواردوي مخنیوی وکړي.
اسماعیل شاکر – کابل
زموږ له آرشیف څخه: