په صنعا کي ځانمرگي بريد سخته مرگ ژوبله اړولې ده
۱۳۹۳ دی ۱۷, چهارشنبه
د يمن د امنيتي چارواکو په حواله لومړي راپورونه وايي، چي په صنعا ښار کي د پوليسو د اکاډمۍ مخ ته د يوه موټر بم په چاودنه کي نزدې ۱۵ انسانان وژل سوي او تر ۴۰ زيات نور ټپيان دي.
پيښه په داسي حال کي رامنځ ته سوې ده، چي د پوليسو اکاډمۍ مخي ته زيات کسان د دې له پاره راټول سوي ول، چي وگوري پوليسو ته د جلب و جذب شرايط څه ډول دي.
د پيښي په سيمه کي عيني شاهدانو ليدلي دي چي څومره ډېر مړي پراته ول او امبولانسونو روغتونونو ته لېږدول. دوی ويلي دي چي ټپيان په شماره ول.
تر اوسه پوري د دغي پيښي مسئوليت چا پر غاړه اخيستی نه دی.
په ۲۰۱۲م کال کي د عبدالله صالح تر ليري کېدو وروسته له هغه راهيسي په دغه هيواد کي تاوتريخوالی او سياسي ناآرامۍ رامنځ ته سوي دي.
د عبدالله صالح د واکنۍ پرمهال د دغه هيواد شيعه وگړو له تبعيض څخه شکايت کاوه. د حوثي قبيلې شيعه گانو د تيرکال په شروع کي خپل اعتراضونه پيل کړل او تر اوسه ئې د دغه هيواد په مرکز او لوېديځ کي د خپلو فعاليتونو لمن غځولې ده.
د دوی غوښته د يمن په سياسي سرنويشت کي د ډيري ونډي ورکول ده. د يمن له حوثي شيعه گانو سره ايران ملاتړی دی. دوی د ۲۰۱۴م کال په دوبي کي په دې بريالي سول چي د صنعا په يو شمېر سيمو تسلط ولري.
په صنعا کي د حوثي شيعه گانو حضور او په سياست کي د هغوی ونډه د سني مسلمانانو او القاعدې تروريستي شبکې له سخت مقاومت سره مخامخ سوي دي.