د روغتيا نړيوال سازمان
۱۳۹۹ اسفند ۲۱, پنجشنبه
په نړۍ کې له هرو دريو ښځو څخه يوې يې تاو تريخوالي او سپکاوی تجربه کړی دی. د روغتيا نړيوال سازمان وايي چې په نړي کې کابو ۷۳۶ ميليونه ښځي له تاو تريخوالي سره مخامخ شوي دي.
د نړۍ په ډېرو هيوادونو کي د ښځو پر وړاندي تاوتريخوالی په يوې ورځنۍ پيښې اوښتی، د روغتيا نړيوال سازمان له دې سره پر دې ستونزه د ټينګار تر څنګ ویلي دي چې په نړۍ کې له دريو ښځو څخه يې يوي په خپل ژوند کي تاوتریخوالي تجربه کړی دی.
د روغتيا نړيوال سازمان په خپل وروستي رپوټ کي د ښځو پر وړاندي تاوتريخوالي د دوام په هکله ټينګار کړی او ويلي يې دي چې په نړۍ کې کابو ۷۳۶ ميليونه ښځې د خپل ژوند په يو پړاو کي په خپل ګډ ژوند کي تاو تریخوالي تجربه کړی او يا د خپل ژوند ملګري څخه جلا جنسی تيري پرې شوی.
خو د دغه سازمان د رپوټ له مخې له دغه ښځو څخه ډيري يعني کابو ۶۴۱ ميليونه يې په خپل ګډ کورني ژوند کي له دغسی تيريو سره مخامخ شوي دي.
د ياد سازمان رئيس تيدروس ادهانوم غیريوس ويلي: «د دې څيړنو پايلې يو ډير ټکان ورکونکي انځور ښکاره کوي.»
د دغه سازمان د څېړنو له مخې تر ۲۴ کلنۍ کښته له هرو څلورو ښځو څخه يې يوه په خپل ګډ ژوند کې تاو تريخوالي تجربه کوي. کابو شپږ سلنه ښځې د هغو نارینه وو له خوا زوریدلي چې دوي ورسره رابطه نه ده لرلې.
د روغتيا نړيوال سازمان ويلي دي د دوی رپوټ پر هغو احصايو ولاړ دی چې ورته لاس رسی يې لرلی دی، خو وايي چې په احتمالي توګه به د ښځو پر وړاندي د تاو تريخوالي دقيق شمير څو ځلي زيات وي.
ياد سازمان په دې تړاو د ۳۰۰ څيړنو ارزونه او شننه کړې ده. هغه څيړنې چې له۲۰۰۰م کال څخه تر ۲۰۱۸م کال پورې ترسره شوي دي.
د دغه رپوټ ليکوالانو، په ټوليزه توګه د ياد سازمان په ۱۹۴ غړيو هيوادونو کې د څيړنو پايلي تر ارزونې لاندې نيولې دي.
دغه سازمان ټينګار کړی دی چې د ښځو پر وړاندي تاو تريخوالي ناوړه پايلي لرلي، لکه سختي رواني ناروغۍ، ژورخفګان، ډار او وارخطايي او د خپلي خوښي خلاف ميندواره کيدل.
د روغتيا نړيوال سازمان عمومي منشی ويلي دي: «دغه ستونزه پخوانۍ ده او موږ کولی شو ځينو ته بدلون ورکړو.»