1. محتوا ته تګ
  2. اصلي مینو ته تګ
  3. د دویچه ویله نورو پاڼو ته تګ

په هلمند کي د طالبانو پرضد عمليات پيل سوي

afp, IFAX ۱۳۹۳ بهمن ۲۸, سه‌شنبه

افغان چارواکي وايي چي د «جنگي موسم» تر پيلېدو دمخه ئې د طالبانو په پاخه مرکز هلمند کي د هغوی د کمزوره کولو په مخه عمليات پيل کړي دي.

https://p.dw.com/p/1Ecmc
انځور: DW/H. Hashami

په افغانستان کي د ناټو ځواکونو تر جنگي ماموريت وروسته افغان امنيتي ځواک په اول وار يوازي د دوشنبې په ورځ د هلمند ولايت په څلورو ناآرامو ولسواليو کي د وسله والو طالبانو پرضد عمليات پيل کړي دي.

هلمند چي د مخدرو موادو د توليد او قاچاق مرکز گڼل کيږي، تيرکال هم سختي جگړې پکښې وسوې.

د افغانستان د دفاع وزارت ويلي دي چي د عملياتو په لومړۍ ورځ ئې پر هلمند سربيره په کندهار، فراه او روزگان کي نزدې ۷۶ تنه ياغيان وژلي دي.

د دغو عملياتو مشر جنرال عبدالخالق ويلي دي: «دغه عمليات يوازي د افغانانو له خوا پلان سوي او مشري ئې هم دوی کوي. عمليات به تر بريا پوري رسو.»

د طالبانو وياند په دې اړه له سمدلاسه څه ويلو څخه ډډه کړې ده.


د افغانستان د دفاع وزارت ويلي دي چي د «ذلفقار» په نوم عمليات د هغو عملياتو يوه برخه کي ده چي افغان ځواکونو د ناټو ځواک تر وتلو وروسته پلان کړي دي.

د وزارت وياند جنرال دولت وزيري ويلي دي: «د طالبانو پرضد دا لومړي عمليات نه دي او نه به وروستي وي.»

کارپوهان او افغان امنيتي چارواکي اټکل کوي چي د پسرلي په رارسېدو سره به د طالبانو په بريدونو کي زياتوالی راسي.

امريکا او متحدانو يې په افغانستان کي خپل پوځي حضور کم کړی او د روان کال له پيل راهيسي په افغانستان کي يوازي ۱۲۵۰۰عسکر لري چي اصلي دنده ئې د دغه هيواد د امنيتي ځواک روزنه ده.