په چين کي دافغاني لوبغاړو دپاره يوه بله نااميدکونکې ورځ
۱۳۸۹ آبان ۲۸, جمعه
د چين په کوربه توب اسيايي لوبو ته د افغانستان څخه، يوه څه کم سل کسيزه ډله ورغلې چي پکښي 67تنه يې لوبغاړي اوپاته نور يې مربيان دي .
تکواندو، واليبال، کاراته، اوشو، غيږنيونه، سنوکر، تنس، توره وهلو او يو شمير نورو لوبو کي افغان لوبغاړي د خپلو سيالانو سره سيالۍ ته حاضر سوي دي .
تيره ورځ د بليارد په سياليو کي افغان لوبغاړي نادرخان سلطاني مسابقه دخپل حريف په مقابل کي 9 پر 4 بايلول .
په دوهمه مسابقه کي د افغانستان له اړخه عباس سلطاني د 74 کيلوګرامه وزن په رده کي د تکواندو په برخه کي له خپل تاجک سيال شهريور څخه څلور د يوه په مقابل کي په ګونډو سو .
ليلا حسيني بله افغان تکواندو کاره پيغله وه چي د 46 کيلوګرامه وزن په رده کي يې د خپلي فليپينۍ سيالۍ څخه تر څو رونډه سيالۍ وروسته ماته وخوړه.
د ليلا او ددې د سيالي په مسابقه کي په څلورو رونډونو کي يوه هم يو پر بله د نمري په تر لاسه کولو و نه توانيده او په پای کي ليلا د ډيرو فولونو له کبله چي خپلي حريفي ته يې ورکړي وه،ماتي ته مجبوره سوه .
چين ته د افغان لوبغاړو له ډلي سره تللي يوه مربي محبوب د ټليفون په کرښه دويچي ويلي ته وويل چي نن به هم افغانان د بليارد او تکواندو په برخه کي سيالي کوي .
ټاکل سوېده چي د افغانستان د المپيک دمسابقو څخه مډال ګټونکي تکواندو کار نثار احمد بهاوي به هم نن د خپل نيپالي سيال سره د سيالۍ ډګر ته وځي .
بهاوي د سيمي په کچه يوه پيژندل سوې تکواندو کاره څيره ده .
نوموړی هغه مهال د چين د المپيک په سياليو کي د خپل ملک بيرغ لوړ کړ چي د ګاونډي ايران د تکواند يو نړيوال اتل علي ساعي ته يي حيرانونکې ماته ورکړه .
د افغانستان د المپيک د ملي کميټې په وينا چي بهاوي به نن د ورځي په اوږدو کي د مسابقې ډګر ته راوزي او تمه ده چي نوموړی به د پخوا په څير يووار بيا په ډک لاس هيواد ته را ستنيږي .
د ننيو سياليو په جريان کي به د بليارد د مسابقو په برخه کي محمد ريس او محمد صالح له خپلو فليپيني سياليو سره ډګر ته وزي.
د تکواندو په برخه کي به په بهاوي سربيره د هغه هم وطنه پيغله هميرا محمدي د 53 کيلوګرامه وزن په رده کي د خپلي چينايي سيالي سره مقابلي ته حاضريږي .
په چين کي د دغو آسيايي لوبو د منتظمينو د وينا له مخي چي تر اوسه پوري په دغو سياليو کي کوربه هيواد تر ټولو ډير د سرو زرو مډالونه ،يعني 97 مډالونه تر لاسه کړي دي.
جنوبي کوريا تر نن ورځي پوري د 29 مډالونو په تر لاسه کولو سره په دوهم مقام کي او جاپان د 17 مډالونو په تر لاسه کولو سره دريم ځای خپل کړي دي .
ميرویس جلال زی
کتونکی : محمد قاسم نوري