ځانمرګي برید په جلال آباد ښار کې ۱۲ کسان ووژل
۱۳۹۵ فروردین ۲۳, دوشنبه
د جلال آباد د روغتون مشر احسان الله شینواري، د دوشنبې په ورځ وویل چې د یوه ځانمرګي برید له کبله د ۱۲ تنو وژل شویو کسانو مړي دې روغتون ته راوړل شوي دي.
هغه زیاته کړې ده چې د چاودنې له کبله ۳۸ تنه نور ټپیان شوي هم دي چې د ډیرو روغتیایي وضعیت د اندیښنې وړ دی.
د ننګرهار د والي ویاند عطاالله خوګیاڼي، د فرانسې خبري آژانس ته ویلي دي: «په برید کې ۱۲ کسان وژل شوي او ۳۸ تنه نور ټپیان دي.»
په برید کې ټول وژل شوي کسان د افغانستان ملي اردو ته جذب شوي نوي سرتیري وو چې په یوه سرویس کې یې د جلال آباد ښار په څنډو کې سفر کاوه.
د ننګرهار د ولایتي شورا مشر احمد علي حضرت، ویلي دي چې لومړني رپوټونه ښيي چې برید کوونکی پر یوه موټر سایکل سپور وو او ځان یې د دغو سرتیرو له موټر سره جنګولی دی.
لا تر اوسه پورې کومې ډلې د دغه برید پړه پر غاړه نه ده اخیستې خو ډیر وخت دغه شان بریدونه د طالبانو له خوا ترسره کیږي.