کرزي د روسیې او ناټو د تیرې شپې ګډ عملیات وغندل
۱۳۸۹ آبان ۸, شنبه
په دغو عملیاتو کې چې په اچین ولسوالۍ کې تر سره سوي پکې د نشیه یې توکو د تولید د څلورو لابراتوارونو د ویجاړیدو خبر ورکړ سوی .
دا لومړی ځل دی چې له څه باندي دوو ولسیزو وروسته روسي ځواکونه په افغانستان کې په داسي عملیاتو کې برخه اخلي.
د مسکو او واشنګټن دا شپنې عملیات چې حامد کرزی یې سخت په غوصه کړی په تیرو څو لسیزو کې د دغو دوو رقیبو ملکونو بي ساري ګډه همکاري بلل سوي ده .
نن د جمهور ریس کرزي له دفتر څخه دوچې ویلې راډیو ته په را استول سوي یوه خبرپاڼه کې ویل سوي چې ولسمشر د ناټو او روسیې دغه عمل د افغانستان پر ځمکنۍ بشپړتیا یو بربنډ یرغل بولي او په کلکو الفاظو یې محکوموي.
د روسیې د نشه یې توکو پر وړاندي د مبارزې د ادارې مشر ویکتورایوانوف د نوموړي هیواد انټرفاکس دولتي آژانس ته ویلي چې په دغو عملیاتوکې شاوخوا دوه زره پونډ د لوړ کیفیت هیروین له مینځه یوړل سوي دي.
مسکو ویلي چې له لمر خاته دمخه په دغو عملیاتو کې د دوی د مخدره توکو ضد څلورو اجنټانو دنده درلوده او پاتي نور سرتیري د امریکې او افغانستان ول.
دا په داسي حال کې ده چې کابل په دغو عملیاتو باندي پوره بي خبري ښيي.
روسیې په بیا بیا په افغانستان کې د نشه یي توکو سره د مبارزې د بهیر پر څرنګوالې کلکې نیوکې کړې او هغه یې پڅ بللی دی.
تیرکال د روسيې ولسمشر دیمتري میدويدیف په افغانستان کې تو ليد شوي نشه يي توکي د روسيې ملي امنيت ته گواښ بللى او دې ستونزې د مسکو او واشنگټن ترمنځ په اړيکو هم سيورى غوړولى و.
خو د ولسمشر کرزي له ننیو څرګندونو داسي ښکاري چې د کابل حکومت په دغو عملیاتو خبر نه وو.
د ولسمشر له لوري د کورنیو چارو وزارت او ملي امنیت ریاست ته دنده سپارل شوي چې تر همدې نن ماښامه پوري د دغو عملیاتو په اړه پوره تحقیق وکړي او راپور ولسمشرۍ ماڼۍ ته وسپاري.
که څه هم د امریکې او کابل تر منځ اړیکي په دې ورستیو کې د پخوا په څير تودې نه دي، اوس داسي ښکاري چې د واشنګټن او مسکو دغه ګډ کار به دغه اړیکي نوري هم سره سړې کړي.
د ولسمشرۍ ماڼۍ په وینا پاڼه کې دا هم ویل سوي چې هیڅ هیواد د افغانستان په حریم د برید اجازه نه لري او که چیرته کوم عملیات تر سره کیږي نو باید د افغان دولت اجازه واخیستل شي.
دا لومړی ځل نه دی چې په افغانستان کې د نشه یي توکو لابراتوارونه ویجاړیږي او یا هم نشه یي توکي نیول کیږي، بلکې د عملیاتو څرنګوالی په خپل ډول کې بی ساری دی.
کرزي ویلي چې د ناټو او روسیې دغه عمل د افغانستان د نافذه قوانینو او ټولو نړیوالو اصولو سره په ټکر کې دی او دغه دوه هیوادونه باید ژر تر ژره د خپلې کړني سپیناوی وکړي.
ليکونکی: ميرويس جلالزی/ کابل
کتونکی: احمدولي اڅکزی