۸۰ تنه افغان کوچنيان د درملني له پاره آلمان ته ځي
۱۳۹۳ بهمن ۲۹, چهارشنبه
د «سولي کلي» مسئولانو د سه شنبې په ورځ ويلي دي چي په افغانستان کي «طبي مراقبت ورځ تر بلي خراب سوی دئ.»
په افغانستان کي د دغه سازمان مرسته کوونکو په خپلو وروستيو ۷۱ کتنو کي تر بل هروخت ډير ناروغ کوچنيان ټاکلي دي چي د درملني له پاره آلمان ته ولېږدول سي.
د دغو روغتيا پالو نتايجو ته په کتو سره د «سولي نړيوال کلی» مسئولانو آلمان ته تر بل هر وخت د ډيرو ناروغو او ټپيانو کوچنيانو د لېږد پريکړه کړې ده.
دا چي په افغانستان کي د بشري وضعيت خرابوالی له دغه هيواد څخه د نړيوالو ځواکونو له وتلو سره تړاو لري، دغه سازمان ئې يوازي د گومان خبره کوي.
دغه مرستندوی سازمان ويلي دي چي له دغو افغان کوچنيانو سره به يو ځای د تاجيکستان، ازبکستان، قرغيزستان، ارمنستان او گرجستان نزدې ۳۰ تنه کوچنيان هم آلمان ته ولېږدول سي.
سازمان ويلي دي چي دغه کوچنيان به د شنبې په ورځ له نزدې ۶ ټنو مرستو سره بيرته خپلو هيوادونو ته ستانه سي.
د «سولي نړيوال کلی» له ۱۹۶۷م کال راهيسي د جنگ ځپلو سيمو له ناروغو او ټپيانو کوچنيانو سره مرسته کوي. دغه سازمان هر وخت نجوني او هلکان د درملني له پاره آلمان ته لېږدوي او دغه راز د هغوی په هيوادونو کي پراختيايي پروژې پلي کوي.