NSA هره ورځ ۲۰۰ میلیونه تلیفوني پیغامونه ټول کړي
۱۳۹۲ دی ۲۷, جمعه
د امریکا د ملي امنیت ادارې یا NSA نه یوازې په ټولې نړۍ کې د خلکو تلیفوني خبرې ثبت کړې دي، بلکه د سلهاوو میلیونه کسانو لنډ تلیفونی لیکلي پیغامونه یا SMS یې څارلي او ثبت کړي دي. بریتانیاوی ګاردین ورځپاڼې او د همدې هیواد څلورم خبري کانال ویلي دي چې NSA د ګرځنده تلیفونو د خاوندانو شخصي معلومات، د ارتباطي شبکو او د هغوی د کریدیت کارتونو معلومات له ځان سره ثبت کړي دي.
د دغو رپوټونو په حواله امریکایي استخباراتو د دیش فایر (Dishfire) تر نوم لاندې د یوه پروګرام په ترڅ کې څه نا څه د امکان تر حده پورې هر څه راټلول کړي دي. د خپرو شویو رپوټونو په حواله امریکا متحده ایالاتو په یوه ورځ کې د ګرځنده تلیفونونو څه نا څه ۲۰۰ میلیونه لنډ لیکلي پیغامونه راټولول.
په خپورو شویو رپوتونو کې راغلي دي چې امریکايي څارنیزو ادارو د ګرځنده تلیفونونو د لنډو پیغامونو د څارلو له لارې د سفر او مالي انتقالاتو په اړه معلومات ترلاسه کول. پر دې سربیره د ناموفقه تلیفوني اړیکو له پاره رسیدلي لنډ پیغامونه هم ثبتیدل چې د ګرځنده تلیفون د خاوند ملګري او اشنایان یې له لارې وپیژندل شي.
معلومات سنودن بربنډ کړي دي
د ګاردین د رپوټ په حواله دغه معلومات هم د NSA د پخواني کارکوونکي ادوارد سنودن له خوا د بربنډو شویو اسنادو پر اساس خپاره شوي دي. دا په داسې حال کې ده چې د امریکا د کورني استخباراتي سازمان یوه ویاند دغه رپوټونه رد کړي دي او ویلي یې دي چې هغوی پرته د یوه شک له موجودیت څخه اسناد نه راټولوي.
دغه موضوع د امریکا متحده ایالاتو له پاره په یوه نامناسبه وخت کې خپریږي. د امریکا متحده ایالاتو ولسمشر باراک اوباما د جمعې په ورځ د امریکا د استخباراتي سازمامونو د اصلاح په اړه خبرې کوي.