آلمان: کابينې د اخراج ډېرولو طرحه تصویب کړه
۱۴۰۲ آبان ۳, چهارشنبه
د حکومتي سرچینو د معلوماتو له مخې، د آلمان حکومت کابینې د چهارشنبې په ورځ د کورنیو چارو د وزیرې نانسي فایزر، له خوا د ډېرو پناه غوښتونکو د ايستلو او دغه بهیر ته د آسانتیا په موخه وړاندي کړې طرحه تصویب کړه.
په یاده طرحه کې د هغو کسانو د توقیف د مودې غځول په پام کې نیول شوې چې باید له آلمان څخه ووځي. همدا راز پولیسو ته د پناه غوښتونکو د اوسیدو ځایونه د پلټني په برخه کې لا ډېر اختیارات ورکړل شوې دي.
د قانون د دې مسودې بله موخه دا ده چې د قاچاق وړونکو د شړلو لړۍ ګړندۍ شي او په راتلونکي کې د جرمي ډلو بهرني غړي په ګړندي ډول و ایستل شې، دې ته له پاملرنې پرته چې دوې شخصآ محکوم شوي وي او که نه.
له دې قانون سره د آلمان فدرالي حکومت په آلمان کې د پناه غوښتونکو د زیاتوالي او په ډیرو ښاري سیمو کې د هغوې لپاره داستوګنې د اسانتیاوو د نشتوالي په اړه غبرګون ښودلی دی.
د آلمان صدراعظم اولاف شولڅ، د تیرې اونۍ په پاې کې اعلان وکړ هغه کسان چې په آلمان کې د پاتې کیدو امکان نه لري باید «په لویه کچه» و ایستل شي.
د آلمان په ائتلافي حکومت کې زرغون ګوند د قانون د دغې طرحي په اړه اندیښنه ښودلې ده. د دغه ګوند د سياستوالو په آند د دغه قانون په تصويب سره به د کډوالو اساسي حقونه تر ډېره بریده محدود شي.