انځورونه: د افغانستان د ځانګړو ځواکونو روزنه پیاوړي کیږي

د افغانستان د اردو او پولیسو ځانګړو ځواکونو، له افغانستان څخه د ناټو د جنګي ځواکونو تر وتلو وروسته د تروریزم ضد مبارزه کې خپله وړتیا ښوولې ده.

اوس ناټو او امریکا متحد ایالات هوډ لري چې په روان کال کې نور شا او خوا ۳۵۰۰ اضافي عسکر افغانستان ته واستوي، څو د افغان امنیتي ځواکونو د روزنې بهیر ګړندی شي. د ځانګړو ځواکونو روزنه په لومړیتوب کې ده.

افغان امنیتي ځواکونه د تروریزم، یاغیتوب او مخدره موادو پر ضد مبارزې باندي بوخت دي. دغو ځواکونو زیات تلفات ګالي، چې په چټکۍ سره نوي سرتیري وګمارل شي او د هغوی ظرفیتونه لوړ شي.

د ناټو ځواکونه، د افغانستان د اردو او پولیس ځانګړو ځواکونه په روزنه کې مهم اړخ لري. په پام کې ده چې د ناټو د تازه نفسه ځواکونو توجه همدې برخې ته وي، څو د افغان ځانګړو ځواکونو د شمیر په زیاتیدو سره په افغانستان کې د طالبانو د یاغیتوب او د داعش فعالیت مهار کړی شي.

په وروستیو کې د افغانستان د دفاع وزارت اعلان کړی دی چې د تروریزم پر ضد د ښې مبارزې او د هیواد د امنیت ټینګولو له پاره غواړي د ځانګړو ځواکونو شمیر دوه برابره ډیر کړي.

ناټو د ترهګرۍ پر ضد عملیاتو کې د ځانګړو افغان ځواکونو وړتیا ستایي او د دغه هیواد د کماندویي ځواکونو شمیر ډیرولو سره موافق دي.

د ورکړل شوو ارقامو له مخې اوس د افغانستان د ۳۵۰ زره پوځ یوازې اووه سلنه برخه ځانګړي ځواکونه ده.

په پام کې ده چې تر۲۰۲۰م کاله پوري د دغو ځواکونو شمیر دوه برابره ډیر شي. د افغانستان پولیس، اردو او ملي امنیت ځانګړي عملیاتي ځواکونه لري چې اصولا دنده یې د ځانګړو عملیاتو تر سره کول وي. خو دغه ځواکونه همهاله د ترهګرۍ ضد عملیاتو کې بوخت دي.

د پوځي عملیاتو د دوام له کبله، د افغانستان ځانګړي ځواکونه ستومانه شوي، خو افغان چارواکي وایي چې دغه ځواکونه د عملیاتو د تر سره کولو په برخه کې لاس ته راوړنې لري. د هغوی په خبره په ټول هیواد کې دغه ځواکونه د شپنیو عملیاتو لویه برخه پر مخ وړي.

د امریکا د پوځي منابعو په وینا یوازې په ۲۰۱۶م کال کې تر نومبر میاشتې پورې د افغانستان ۶۷۸۵ امنیتي ځواکونه وژل شوي او ۱۱۷۷۷ ټپیان شوي دي. د افغانستان د امنیتي ځواکونو په چوکاټ کې د ځانګړو او کوماندويي ځواکونو په زیاتولو سره، په پام کې ده چې جنګي کړنلاره بدلون ومومي او د افغان ځواکونو د تلفاتو کچه راټیټه کړای شي.

د افغانستان ځانګړي امنیتي ځواکونه چې شمیر یې تر ۱۷ زرو زیات دی، په ټول هیواد کي د اردو۷۰ سلنه تهاجمي عملیات تر سره کوي. معمولا له دغو ځواکونو څخه د عملیاتو په ترڅ کې د اردو او پولیسو د ملاتړ په توګه هم استفاده کیږي. اوسمهال دغه ځواکونه هماغه چارې تر سره کوي چې ناټو په تیرو وختونو کې کولې.

د یکشنبې په ورځ د افغانستان په هرات ولایت کې د کماندو د کشف کنډک، څخه ۲۰ تنه فارغه شول. دغو سرتیرو ته ایټالوي ځواکونو چې د ناټو په چوکاټ کې کار کوي روزنه ورکړې ده.

د افغانستان په لویدیځ کې د ۲۰۷ ظفر قل اردو قوماندان محمد ناصر هدایت وویل چې د امریکا د نوې ستراتیژۍ په ترڅ کې د ناټو له لوري د افغان ځواکونو د روزنې او سلا مشورې په برخه کې د پام وړ زیاتوالی لیدل کیږي. عکاس: شعیب تنها شکران، هرات