د چین په فابریکه کې چاودنې درنه مرګ ژوبله اړولې
۱۳۹۷ تیر ۲۲, جمعه
د چین دولتي رسنۍ شینهوا د جمعې په ورځ خبر ورکړ چې د چین په جنوب غرب کې پروت د سیشوان په ولایت کې ځايي چارواکو په یوه تولیدي فابریکه کې د چاودنې په اړه پلټنې پیل کړي دي. د یادې رسنۍ په حواله په دې چاودنه کې ۱۹ کسان وژل شوي او یو شمیر نور ټپیان شوي دي.
شینهوا دولتي رسنۍ د پیښې په هکله ویلي دي چې چاودنه د پنجشنبې په ورځ ناوخته یبین په نامه ښار او په ځايي وخت د ماښام پر ۶ نیمو بجو د یبین هینګدا ټکنالوجي د شرکت په ودانۍ کې شوې. د دې ښار چارواکو ویلي دي چې په دې پیښه کې ۱۲ تنه نور ټپیان دي او روغتون ته د درملنې له پاره لیږدول شوي. چارواکو د ټپیانو روغتیايي وضعیت ښه ښوولی دی.
په عین وخت کې د سیشوان په نامه یوې چینايي ورځپاڼې بیا په خپل رپوټ کې لیکلي چې د اور له کبله د پیښې سیمې ته څیرمه درې نورې ودانۍ هم تخریب او د شاوخوا ودانیو ښیښې ماتې شوي دي.
په وروستیو کلونو کې د چین د کیماوي موادو په سکتور کې تر یو شمیر چاودونو وروسته، د نړۍ د کیمیاوي موادو تر ټولو ستر صادرونکي هیواد چین د صنعتي سکتور د خوندیتوب د معیارونو په هکله اقدامات پيل کړي.
په ۲۰۱۵م کال کې د کیمیاوي موادو په یوه ګودام کې چاودنې ۱۶۵ کسان ووژل. سربیره پر دې، تیرکال د چین په شاندونګ ښار کې د کیمیاوي موادو په یوه بله فابریکه کې چاودنې د اتو کسانو ژوند اخیستی وو.
زیاته شوې ده چې د یبین هینګدا ټکنالوجي په دې شرکت کې چې د پنجشنبې په ورځ د اور په لمبو کې له منځه ولاړ، د خوراکي توکو او درملو د سکتور له پاره یې کیمیاوي مواد چمتو کول.