پولیس د میني منګل د پخواني میړه په لټه کې دي
۱۳۹۸ اردیبهشت ۲۳, دوشنبه
مينه منګل د شنبې په ورځ کار ته پرلار ناپیژاندو وسله والو کسانو د کابل په کارته نو سیمه کې ووژله. دغي پیښې نه یوازې د کابل د امنیتي وضعیت په اړه اندیښنې زياتي کړي، بلکي د ښځو د حقونو د فعالانو، رسنیو د کارکوونکو او نورو پیژندل شویو کسانو نيوکي هم راپارولي دي.
د کابل د پولیسو ویاند بصر مجاهد، د دوشنبې په ورځ ویلي دي چې د ميني منګل والدینو ادعا کړې ده چې د هغې پخوانی مېړه یې د وژني لامل دی.
مېرمن منګل تر وژل کیدو مخکې له خپل مېړه بېله شوې وه. اوس پیښه تر څیړنې لاندې ده او پولیس د هغې د پخواني مېړه او نورو شکمنو ښکیلو کسانو په لټه کې دي.
د مجاهد په خبره پیښه ښايي د کورني تاوتریخوالي په پایله کې رامنځ ته شوې وي.
د کاناډا لومړي وزیر جستن ترودو او په کابل کې د امریکا متحده ایالاتو سفارت د دې پیښې له کبله خواشیني څرګنده کړې ده.
جستن ترودو د یکشنبې په ورځ پر خپله تویتر پاڼه باندې لیکلي دي: «منګل یوه زړوره خبریاله او د ښځوو او نجونو د حقونو مدافع وه چې کار یې نه یوازې په افغانستان، بکلي په ټوله نړۍ کې د جنسیت د مساوات له پاره مهم وو.»
د ښځو د حقونو فعالې وږمه فروغ، هم پر خپل تویتر لیکلي دي چې منګل د خپلو خلکو د حقونو د دفاع له پاره ډیر فعالیت کاوه: «زه خپلې اوښکې نه شم درولی، ځکه موږ یوه ډیره ښایسته انسانه له لاسه ورکړه.»
په افغانستان کې د ښځو پر وړاندې تاوتریخوالی په یوې جدي موضوع باندې بدله شوې ده، ځکه ډیر خلک اوس هم له کوره بهر د ښځو کار ته په ښه سترګه نه ګوري.
(ms/nz (dpa