پيښور: مسجد کې چاودنې لږ تر لږه ۳۰ کسان وژلي

دوهم تعقیب:

رويټرز خبري آژانس د چارواکو له قوله ليکي چې دا ځانمرګی برید وو.

اسوشتید پریس په خپل تازه رپوټ کې د پولیسو له قوله خبر ورکړی چې په دغه برید کې ۴۵ تنه وژل شوی او شاوخوا ۶۵ نور ټپیان دي.

تر دې وړاندې د پولیسو مشر اعجاز خان  رويټرز ته د لږ تر لږه ۳۰ کسانو وژنه تائيد کړې وه او ويلي و و چې دا یو ځانوژنکی برید وو.

هغه رويټرز ته وويل چې دوه وسلوال کسان پر موټرسایکل مسجد ته نژدې ورسیدل چې د مسجد نه باندې د موظفو پولیسو له خوا د تلاشۍ له پاره ودرول شول. اعجاز خان زیاته کړه: «دوی [وسلوالو] پر پولیسو ډزې وکړې... او بیا مسجد ته ننوتل.»

 زياته شوې چې د پولیسو تحقیقات ادامه لري چې آیا دغو دواړو کسانو د مسجد په منځ کې چاودنه کړې او که نه.

پولیس وايي چې په ټپيانو کې د اکثرو روغتيايي وضعیت نازک دی. د ځايي پولیسو مشر، وحید خان وويل چې دغه چاودنه د پيښور د زوړ ښار، قصه خوانۍ په مسجد کې د جمعې لمانځه پر وخت شوې ده.

اسوشتید پریس له پیښوره ليکي چې تر چاودنې وروسته امبولانسونه د قصه خوانۍ تنګو کوڅو ته رسیدلي تر څو د پيښې ټپيان د ليدي ريډينګ روغتون ته ورسوي.

د دغه آژانس په وینا، تر اوسه کومې ډلې د دغې چاودنې مسئولیت په غاړه نه دی اخیستی. خو په سیمه کې داعش او د پاکستاني طالبانو ډلې دې ته ورته بریدونه ترسره کوي.

د شایان حیدر په نوم يوه عينی شاهد وويل، چاودنه دومره زوروه وه چې هغه يې د مسجد له منځه بهر کوڅې ته راګوزار کړ. حیدر زیاته کړه: «کله مې چې سترګې خلاصې کړې دوړې وې او هر طرف ته مړي پراته ول.»

د ليډي ريډينګ روغتون په عاجله څانګه کې د خلکو سخته ګڼه ګوڼه جوړه شوې او داکتران هڅه کوي تر څو د پيښې ټپیان ژر تر ژره تر عملیاتو او درملنې لاندې ونیسي.

د پاکستان صدراعظم دغه بمي بريد غندلی دی. په پاکستان کې چې اکثریت يې سني مسلمانان دي، شيعه مذهبه مسلمانان په اقلیت کې راځي چې په پرله پسې تر بریدونو لاندې راغلي دي.

آ/م.ک.ص./ب.ص.