АДС рыхтуюцца да выбараў

Аб’яднаныя дэмакратычныя сілы (АДС) рыхтуюцца да парламенцкіх выбараў. На апошнім паседжанні Палітрады АДС быў зацверджаны адзіны спіс кандыдатаў у акруговыя выбаркамы, а таксама разгледжаны шэраг пытанняў, звязаных з будучай кампаніяй.

Хто ў спісе

Што да патэнцыйных сябраў акруговых выбарчых камісіяў, то сустаршыня АДС Сяргей Калякін адзначыў: “Да складання спісу прэтэндэнтаў у выбаркамы мы падыйшлі, шчыра скажу, палітычна: мы ўключылі туды людзей, якія маюць досвед дзяржаўнага кіраўніцтва. Напрыклад, туды ўваходзяць Станіслаў Шушкевіч, Станіслаў Багданкевіч, былыя мэры гарадоў, дэпутаты Вярхоўнага Савету і нават некаторыя цяперашнія дэпутаты мясцовых саветаў”.

У кожную з акруговых камісіяў АДС прапануе па адным кандыдаце, але, па словах першага намесніка старшыні Партыі БНФ Вінцука Вячоркі, гэтыя людзі не будуць проста статыстамі.

“У спіс уключаныя людзі, якія могуць і ўмеюць запатрабаваць выканання закону. Скажам, Валянцін Стэфановіч, які ўдзельнічаў у пяці ці шасці міжнародных назіральных місіях, у тым ліку на пост’югаслаўскай тэрыторыі, у цэнтральнаазіяцкіх краінах, дзе сітуацыя ў чымсці параўнальная з нашай”.

Як адзначыў палітык, сябры акругкамаў на выбарчай кампаніі маюць працаваць у звязку з іншымі прадстаўнікамі дэмакратычных сілаў.

“Мы ж таксама будзем вылучаць людзей у ўчастковыя камісіі і назіральнікаў. Гэта значыць, сябра акруговай камісіі абавязкова будзе падмацаваны (у выпадку, калі ён туды патрапіць) шэрагам людзей на іншых роўнях усяго гэтага механізму. У тым разе, калі яны дэ-факта альбо сілаю будуць адхіленыя ад кантролю за тым, што адбываецца, пазбаўленыя магчымасці рэальна працаваць і ў акруговай камісіі, і выязджаць у ўчастковую, то мы будзем прадпрымаць пэўныя крокі”.

Супраць датэрміновага галасавання

Адказваючы на пытанне DW-RADIO датычна датэрміновага галасавання, кіраўнік Аб’яднанай грамадзянскай партыі Анатоль Лябедзька заявіў, што ў Аб’яднаных дэмакратычных сілаў выпрацавана агульнае стаўленне да гэтага пытання, а менавіта што такі від галасавання мусіць быць скасаваны. Гэты падыход, нагадаў Анатоль Лябедзька, замацоўваўся ў прапановах, якія былі распрацаваныя рабочай групаю Нацыянальнага камітэту і перададзеныя ў Палату прадстаўнікоў, адкуль, на вялікі жаль, прыйшла адмова, таму змагацца з датэрміновым галасаваннем застаецца выключна інфармацыйна.

“Мы можам толькі інфармаваць грамадзян Рэспублікі Беларусь, што той, хто галасуе датэрмінова, не мае абсалютна ніякіх гарантыяў, што ягоны голас будзе ўлічаны. Іншага выйсця, як з гэтым змагацца, няма, бо гэта ўсё знаходзіцца ў руках выканаўчае ўлады, і урны для галасавання некалькі дзён знаходзяцца абсалютна без кантролю”.

Лідэр АГП ўпэўнены, што “вялікі працэнт прагаласаваўшых датэрмінова ёсць ускосны паказчык таго, што ўлада збіраецца прызначаць, а не выбіраць дэпутатаў”.

Сустаршыня Аб’яднаных дэмакратычных сілаў Вінцук Вячорка адзначыў, што пра пазіцыю і дзеянні АДС на восеньскай выбарчай кампаніі інфармаваныя міжнародныя структуры, у тым ліку і падчас Парламенцкай канферэнцыі, якая днямі адбылася ў Бруселі з удзелам дэпутатаў Еўрапейскага Парламента і дэлегацыі АДС:

“Вельмі важна цяпер тое, што мы зрабілі свой захад: у нас ёсць адзіны спіс кандыдатаў і адзіны спіс прэтэндэнтаў у камісіі. Цяпер чарга ўлады. Мы і падчас сваіх выступаў на апошняй канферэнцыі, і падчас размовы з прэзідэнтам Еўрапарламента спадаром Пётэрынгам гаварылі, што выкананне згаданых умоваў ёсць абавязковы варунак для папярэдняга прызнання шансу, што выбары могуць стаць свабоднымі і справядлівымі”.