Вядомы папярэднія вынікі рэгістрацыі ініцыятыўных групаў

На 110 месцаў у Авальнай зале шляхам збору подпісаў маюць намер прэтэндаваць некалькі соцень чалавек - менавіта для гэтага рэгіструюцца ініцыятыўныя групы.

200 ініцыятыўных групаў ужо зарэгістраваны

Колькі іх усяго - пакуль не вядома. У перадапошні дзень рэгістрацыі старшыня Цэнтрвыбаркама Лідзія Ярмошына на нарадзе ў Мінскам аблвыканкаме паведаміла аб рэгістрацыі двухсот ініцыятыўных групаў. Да гэтых дадзеных варта прыплюсаваць яшчэ і будучых вылучэнцаў ад палітычных партый і працоўных калектываў. Зразумела, што конкурс на дэпутацкі мандат будзе, але да завяршэння 28-га жніўня рэгістрацыі кандыдатаў у дэпутаты, немагчыма сказаць які менавіта атрымаецца конкурс.

Прэс-сакратар Аб'яднаных дэмакратычных сілаў Юры Пацёмкін паведаміў "Нямецкай хвалі", што рэгістрацыя ініцыятыўных групаў праходзіла ў асноўным спакойна:

"Мы пакуль не маем ні воднага прыкладу, калі б была нейкая адмова ў рэгістрацыі. Па дадзеных на раніцу 24 ліпеня пададзена ўсяго каля ста спісаў ініцыятыўных групаў, зарэгістравана - 36 груп, якія ўжо прыступілі да збору подпісаў. Найбольш актыўна сябе праяўляе Аб'яднаная грамадзянская партыя, якая вылучае 29 кандыдатаў у дэпутаты праз збор подпісаў. На другім месцы ідзе Партыя БНФ - 21 чалавек, потым камуністы - 18 чалавек, сацыял-дэмакраты ("казулінцы") - 14, чатыры ініцыятыўныя групы здалі прадстаўнікі ліквідаванай Беларускай партыі працы і яшчэ тры - таксама ліквідаванай партыі "Надзея". Яшчэ "Беларускія хрысціянскія дэмакраты" здалі сем ініцыятыўных групаў. Мы ведаем, што зарэгістравана з іх шэсць, па адной групе могуць быць пытанні".

Сітуацыя палепшылася, ціск на кандыдатаў застаўся

Праваабаронца Уладзімір Лабковіч таксама амаль не мае прэтэнзіяў па рэгістрацыі ініцыятыўных групаў:

"Большасць ініцыятыўных групаў атрымалі пасведчанне аб рэгістрацыі раней за пяць дзён тэрміну, які прадугледжаны Выбарчым кодэксам. Таксама можна адзначыць, што на дадзены момант няма ні воднай адмовы ў рэгістрацыі ініцыятыўных групаў. На мінулых выбарах блізка 20-25% ініцыятыўных групаў, амаль кожны чацверты са спісу Аб'яднаных дэмакратычных сілаў, па надуманых прычынах адмаўлялася ў рэгістрацыі. Улады пачалі больш адрасна працаваць. Гэта непасрэдны канкрэтны ціск на кандыдатаў. Вось нават сёння толькі што паведамілі, што Віталь Каратыш, які зарэгістраваў ініцыятыўную групу ў 13-ай Лунінецкай выбарчай акрузе, раптоўна, абсалютна знянацку быў выкліканы ў ваенкамат і яму было загадана, што ён мусіць ужо уходзіць у войска для праходу тэрміновай службы".

Сапраўды, актывіст руху "За Свабоду" Віталь Каратыш з Кажан-Гарадка Лунінецкага раёну Брэсцкай вобласці 23-га ліпеня здолеў атрымаць рэгістрацыю сваёй ініцыятыўнай групы, а вось ужо 25-га ліпеня мусіць абуваць боты і - аты-баты ў войска. У інтэрв'ю "Нямецкай хвалі" Віталь паведаміў:

"Мяне забралі ў кабінет і ўсучылі ў рукі павестку, дзе абавязалі мяне з'явіцца заўтра ў 9 гадзін раніцы з рэчамі. Фармальна я маю права нават знаходзячыся ў войску працягнуць сваю кампанію, але калі мая ініцыятыўная група збірае 1 тыс. подпісаў. Мяне рэгіструюць і тады на час агітацыйнай кампаніі мяне абавязаны адпусціць з арміі".

Як бачым, Віталя Каратыша нават тэрміновы прызыў на тэрміновую вайсковую службу, магчыма, не спыніць. А вось беларуская Ліберальна-дэмакратычная партыя 24-га ліпеня абвясціла, што яна сама адмаўляецца ад удзелу ў выбарах у Палату прадстаўнікоў.

Пры гэтым яе лідэр, дэпутат Палаты прадстаўнікоў Сяргей Гайдукевіч удакладніў, што ЛДП не будзе і байкатаваць выбары, а, па яго словах, засяродзіцца на падрыхтоўцы да прэзідэнцкіх.

Вылучэнне кандыдатаў у дэпутаты працягнецца да 18-га жніўня. З 19-га па 28-га жніўня пройдзе іх рэгістрацыя, пасля якой пачнецца перадвыбарчая агітацыя. Выбары ў Палату прадстаўнікоў прызначаныя на 28-га верасня.