Dy vjet ndalim postesh publike për Berlusconin

Ish-kryeministri italian, Silvio Berlusconi nuk lejohet të mbajë poste publike për dy vjet. Ky është vendimi i një gjykate të apelit të Milano, i bërë publik të shtunën (19.10), njoftojnë agjencitë e ndryshme të lajmeve. Gjykatësit mbajtën në fuqi kërkesën e prokurorisë. Berlusconi 77 vjeçar, politikani më i kontestuar në Itali u shpall fajtor më 1. gusht nga Gjykata e Kasacionit në Romë për akuzën e mashtrimit fiskal në koncernin e tij mediatik "Mediaset", me dënimin heqje lirie. Me këtë dënim u lidh edhe ndalimi me pesë vjet i ushtrimit të posteve publike. Këtë vendim gjykatësit e rikthyen për negociim në instancën më të ulët në Milano. Mbrojtja kishte kërkuar reduktimin e ndalimit të ushtrimit të posteve publike me një vit, sa ç'është edhe minimumi ligjor. Avokati i Berlusconit, Niccolo Ghedini deklaroi se do të kërkojë anulimin e këtij vendimi.

Por vendimi i rimbetet i pazbatueshëm, sepse Berlusconi gëzon imunitet ende si anëtar i senatit italian. Dhoma e dytë e parlamentit duhet të vendosë së shpejti, nëse kreu u partisë konservatore "Populli i lirisë", PdL, mund të mbajë postin e tij si i dënuar. Ndërkohë dënimin me një vit heqje lirie për shkak të mashtrimit fiskal, Berlusconi nuk do ta kryejë për shkak të moshës së thyer. Bosi i fuqishëm i mediave italiane në vend të kësaj do të merret me punë sociale.