Ivanka Trump në Berlin: Jam krenare për babanë tim

Në diskutimin në podium, i cili qe shpallur si pika kulmore e takimit të nivelit të lartë të G20-ës, morën pjesë veç amerikanes Ivanka Trump edhe shefja e FMN, Christine Lagarde, Kancelarja gjermane, Angela Merkel, mbretëresha e Holandës Maxima dhe ministrja e Jashtme e Kanadasë, Chrystia Freeland.

Që në krye, Ivanka Trump shfrytëzoi rastin për ta lëvduar Presidentin e SHBA përsa i përket politikës familjare. "Unë jam shumë krenare për babanë tim. Që para se të bëhej President ai është angazhuar për familjet." Pas reagimeve të zemëruara nga publiku, Trump i mbrojti pozicionet e të atit. "E kam dëgjuar kritikën në medie. Por unë e di nga përvoja ime që im atë, kur punonte ende në sektorin privat, ka pasur një qendrim pozitiv ndaj grave. Ai është shumë i bindur që gratë kanë potencialin dhe aftësitë për ta bërë një punë po kaq mirë sa meshkujt," u shpreh vajza e Presidentit të SHBA.

Ivanka Trump tha se është ende shumë e re në rolin e saj si First Daughter (Bijë e Parë) dhe "dëgjon dhe mëson shumë". Vizita e Kancelares Angela Merkel në SHBA kishte qenë për të "shumë interesante". Para së gjithash ajo qe gëzuar që mësoi për modelin e shkollimit dual. Nga forumi në Berlin, në të cilin ajo qe ftuar personalisht nga Kancelarja Angela Merkel, ajo do të marrë me vete "dije dhe këshilla" në SHBA dhe te babai i saj.

Ivanka Trumpin e pyetën më tej nëse udhëton në botën e jashtme në rolin e një anëtareje të qeverisë së SHBA apo si biznesmene. "Me siguri jo në rolin e fundit", tha ajo. Menjëherë pas kësaj First Daughter shtoi se qënia bijë e Presidentit të SHBA dhe njëkohësisht një nga asistentet e tij është "disi e pazakontë", por ajo po e shijon "udhëtimin e rëndësishëm dhe të pabesueshëm".

Nuk ka "mjet kurues të gjithanshëm" për forcimin e femrave

Në prag të takimit të nivelit të lartë, së bashku me Presidentin e Bankës Botërore Jim Yon Kim Ivanka Trump pati kërkuar më shumë inisiativa për forcimin e grave në ekonomi. "Ne duhet të krijojmë një kuadër të ri juridik, për ta rritur produktivitetin e grave. Me kualifikimin e duhur, gratë mund ta drejtojnë më mirë sipërmarrjen," shkruan Trump dhe Kim në një artikull të të ftuarit për "Financial Time's". E pyetur për këtë në diskutimin në podium, Trump tha se për forcimin e rolit të grave në ekonomi nuk ekziston "një mjet kurues të gjithanshëm. Ekzistojnë dallime kulturore midis shteteve e edhe brenda shteteve."

Angela Merkel tregoi se forcimi ekonomik i grave në shtetet e industrializuara është po kaq i rëndësishëm sa në shtetet në zhvillim - dhe tërhoqi vëmendjen në faktin se sipërmarrëset "edhe në Gjermani nuk janë shumicë". Megjithatë shtetet e industrializuara duhet të shërbejnë si model.

Merkeli i shmanget pyetjes nëse është feministe

Merkeli e mbrojti edhe kuotën për për përfaqësimin e grave në këshillat mbikqyrës të sipërmarrjeve, të futur në fuqi në Gjermani në vitin 2016. "Për vite të tëra e kemi kërkuar këtë duke u lutur e duke u përgjëruar. Këshillat e sipërmarrjeve e përpunuan vetë ligjin - duke mos bërë asgjë", u shpreh Kancelarja gjermane. Pyetjes nëse ajo është feministe, Merkeli tha se nëse këtë e sheh dikush kështu "është në rregull. Po unë nuk dëshiroj ta zbukuroj veten me këtë pendë".

Women20 është një proces dialogu i G20 - raundit të shteteve kryesore të industrializuara dhe shteteve në ekspansion. Gjermania ka këtë vit Presidencën e G20-ës dhe do të organizojë në verë takimin e nivelit të lartë të G20-ës.

AUD