Merkel kujton viktimat e sundimit nacionalsocialist

"Mbetet përgjegjësia jonë e përhershme, që të ruajmë të gjallë kujtimin për miliona njerëz, të cilët humbën jetën në vitet e sundimit të dhunshëm nacionalsocialist“, deklaroi Merkel, sikurse bëri të ditur zëdhënsi i qeverisë Steffen Seibert përmes twitterit.

Ministri i Jashtëm Heiko Maas falenderoi të gjithë ata, që „rrezikuan jetën dhe u sakrifikuan me miliona, për të çliruar botën prej fashizmit". Ai kujtoi gjithashtu, që fashizmi ekziston edhe sot. "Ideja e fashizmit për fat të keq as sot nuk është zhdukur", shkruan ai në twitter. "Ne duhet të angazhohemi çdo ditë së bashku për demokracinë dhe lirinë."

Roth: Do të duhej prej kohësh një vend qendror përkujtimor

Michael Roth, ministër shteti për Europën pranë Ministisë së Jashtme, në një artikull për portalin t-online u shpreh për një vend qendror përkujtimor në Berlin, ku të përkujtohen bashkarisht të gjitha viktimat e sundimit pushtues nacionalsocialist. "Një vend i tillë do të duhej të ishte krijuar prej kohësh", shkruan politikani socialdemokrat. "Ne na duhet më në fund një përkujtim i përbashkët ndaj të gjitha viktimave dhe vlerësimi i vuajtjes së shkaktuar në të gjitha vendet e prekura."

Sekretari i përgjithshëm i partisë kristiandemokrate Paul Ziemiak me rastin e ditës së fundit të luftës citoi ish-presidentin Richard von Weizsäcker, duke shkruajtur në msazhin e tij në twitter: "Ne nuk kemi asnjë arsye, që të marrim pjesë në këtë ditë në festat e fitores. Por ne kemi të gjitha arsyet që 8 Majin 1945 ta pranojmë si ditën e fundit të një rruge të gabuar të historisë gjermane, ditë kjo që barti filizin e shpresës për një të ardhme më të mirë."

Me sulmin ndaj Polonisë ish-Rajhu Gjerman më 1 shtator 1939 nisi Luftën e Dytë Botërore. Rreth 60 deri në 70 milionë njerëz humbën jetën. Gjashtë milionë hebrej ranë viktimë e marrëzisë raciste të nacionalsocialistëve. Ndërhyrja ushtarake e aleatëve – SHBA, Bashkimi Sovjetik, Franca dhe Britania e Madhe – çoi në kapitullimin e Gjermanisë, që ishte shpallur më 7 maj në Reims dhe një ditë më pas më 8 maj u përsërit edhe në Berlin. Me këtë iu dha fund veprimeve luftarake në Europë.

bri/haz (epd, afp)