Kosovë: Kush bisedon me Serbinë për marrëveshjen finale?

Partitë politike në pushtet dhe ato në opozitë nuk po arrijnë të merren vesh për një platformë të përbashkët dhe ekip negociues për dialogun final me Serbinë. Deputetët u mblodhën në një seancë të jashtëzakonshme e thirrur nga qeveria e Kosovës, për ta mandatar ekipin negociator të Kosovës që kryesohet nga zëvendëskryeministri Fatmir Limaj, propozim ky i qeverisë së Kosovës. Pjesë e ekipit negociator do të jenë edhe Enver Hoxhaj, Behgjet Pacolli, Dardan Gashi, Avni Arifi dhe Mahir Yagcillar, ndërsa vendet e tyre në këtë ekip i kanë të rezervuara edhe partitë opozitare dhe shoqëria civile. Seanca e thirrur nga qeveria i paraprinte një seance tjetër të jashtëzakonshme e thirrur nga partitë opozitare, të cilat synojnë ta nxjerrin një rezolutë që ia ndalon Presidentit të Kosovës, Hashim Thaçi, që të diskutojë me Serbinë çështjen e korrigjimit të kufirit, ide kjo e vet presidentit. Seanca e thirrur nga kryeministri Ramush Haradinaj u bojkotua nga opozita. Kryeministri i Kosovës Ramush Haradinaj kritikoi veprimin e opozitës për bojkotimin e seancës, ndërsa paralajmëroi që edhe qeveria do ta bojkotojë seancën e thirrur nga opozita. "Opozita mund të mos marrë pjesë në votim, por do të duhej të vinte në seancë e t'i tregojë mendimet e veta, mendoj se më e mira ka qenë që të vihet në seancë dhe të thuhen ato pikëpamje çka nuk është në rregull, a janë emrat, a është logjika apo çka nuk qëndron, por vetëm

mospjesëmarrja në seancë nuk mendoj që është ndihmë dhe me këtë ata nuk po dëshmojnë që e kanë qëllimin që po thonë të ruajnë territorin", tha kryeministri Haradinaj.

Nga ana tjetër Lidhja Demokratike e Kosovës (LDK) në opozitë inicuese e seancës së jashtëzakonshme thotë, se "ekipi negociator i propozuar nga qeveria nuk përfaqëson vullnetin e shumicës së qytetarëve të Kosovës dhe do të përligj në emër të qeverisë marrëveshjet e fshehta të presidentit Thaçi me Serbinë. Shteti i Kosovës po hyn në një fazë kritike të ekzistencës së vet për shkak të veprimeve të kastës udhëheqëse, vrastare për perspektivën e shtetit të Kosovës. Sovraniteti dhe integriteti i Kosovës është i pa negociueshëm", thuhet në një deklaratë të LDK-së në opozitë.

Në këtë linjë shprehet edhe partia tjetër opozitare lëvizja Vetëvendosja. Glauk Konjufca, shef i grupit parlamentar të vetëvendosjes tha, se qeveria e Kosovës po dorëzohet përballë trysninë së presidentit të vendit, dhe kjo sipas tij është e papranueshme.

"Sot çka kemi parë është vagonët që do t'i shtohen Hashim Thaçit në negociatat me Serbinë. Duke u bërë bisht i Thaçit duke shkuar në Bruksel me gjysmën e spektrit politik, përkundër që ne i refuzojmë vendet e rezervuara, këtu nuk po ndryshon kurrgjë", thotë Glauk Konjufca duke shtuar se "ekipi negociator i kryeministrit është vetëm për t'ia bërë agjendën e presidentit Thaçi".

Debati në kuvendin e Kosovës po vazhdon pa prezencën e opozitës, ndërsa, pritet të votohet propozimi i kryeministrit për ekipin negociator të Kosovës i kryesuar nga zëvendëskryeministri Fatmir Limaj. Ndërsa, seanca e jashtëzakonshme e opozitës që tenton me anë të një rezolute të parlamentit t'ia ndalojë presidentit që të flasë për korrigjimin e kufirit akoma nuk ka filluar. Kjo seancë mund edhe të dështojë nëse opozita nuk mund ta mbledhë kuorumin e nevojshëm me 61 deputet pjesëmarrës nga 120 deputet sa i ka kuvendi i Kosovës.

Dy seancat e jashtëzakonshme të kërkuara njëra nga partitë në pushtet dhe njëra nga opozita bëhen vetëm tri ditë para se presidenti i Kosovës Hashim Thaçi dhe ai i Serbisë Aleksandër Vuciq, të takohen më 7 shtator në Bruksel në zyrën e shefes së diplomacisë evropiane, Federika Mogherini. Kjo e fundit që lehtëson këtë dialog, u shpreh të premten (310.08)se "pret një takim të vështirë në kërkim të një marrëveshjeje përfundimtare ligjërisht të obligueshme ndërmjet Kosovës dhe Serbisë. Një marrëveshje ligjërisht e obligueshme ndërmjet Kosovës dhe Serbisë po kërkohet edhe nga disa vende të BE-së, (më e zëshme në këtë mes është Gjermania) si kusht që Serbia të mund të përfundojë negociatat për anëtarësim në Bashkimin Evropian.