270610 G20 Abschluss

Samiti i dyfishtë i G8-ës dhe G20-ës në Kanada u mbyll me një marrëveshje për uljen e huave. Kjo befason, aq më tepër kur dihet se në prag të tij ishte ndezur një debat midis Gjermanisë dhe SHBA-së në lidhje me rrugën që duhet ndjekur për të dalë nga kriza: me hua të tjera apo me një politikë inteligjente kursimi. Me sa duket tani qëllimi u arrit. Receta mban emrin rritje ekonomike nëpërmjet uljes së huave, formulë kjo që po i pëlqen edhe presidentit amerikan Barack Obama. Marrëveshja e tetë shteteve më të industrializuara për të përgjysmuar deri në 2013-ën deficitet e tyre nuk është e detyrueshme nga pikëpamja ligjore dhe secili vend është i lirë të vendosë se si do ta arrijë reduktimin e borxheve, por me sa duket me shembullin paralajmërues të Greqisë evropianët kishin argumentet më të mira. Prandaj kancelarja gjermane u nis e kënaqur drejt atdheut.

"Afati për të përgjysmuar deri në 2013-ën deficitet është një strategji shumë e qartë daljeje. Ne largohemi prej programeve koniunkturore, gjatë të cilave kemi bërë më shumë borxhe, dhe si vende të industrializuara përgjysmojmë deri në 2013-ën huatë tona. Kjo është shumë ambicioze, dhe ta them hapur është më shumë se ç'prisja, sepse është shumë specifike. Dhe fakti që kjo pranohet nga vendet e industrializuara përbën për mendimin tim një sukses."

Në kërkim të unitetit

Angela Merkel nuk pati sukses me orvatjen e saj për të futur një takse mbarëbotërore për transaksionet financiare. Kjo ndeshi në qëndresën e fortë për shembull të Kanadasë, që nuk i shpëtoi bankat e saj me miliarda nga taksat. Por edhe të vendeve në ekspansion ekonomik, si Brazili. Më e suksesshme duket ideja e një tatimi për bankat, e cila u mbështet për shembull nga presidenti amerikan Obama dhe kryeministri britanik David Cameron. Por njëherë për njëherë evropianët do të përpiqen të fusin një taksë për tregjet financiare brenda BE-së ose së paku brenda eurozonës.

Premtime të shkelura

Organizatat joqeveritare (OJQ) janë shumë të zhgënjyera pas samiteve në Huntsville dhe Toronto. Për herë të parë në dokumentin përfundimtar nuk përmenden premtimet e takimit të Gleneagles-it para pesë vjetësh që ndihma për zhvillimin të rritet deri në 2010-ën me 50 miliardë euro. Për këtë arsye organizatat e ndihmave nuk kanë besim as ndaj nismës së re të miratuar këtu për të luftuar në mënyrë efikase me rreth tetë miliardë dollarë vdekshmërinë e nënave dhe të fëmijëve.

Autor: Henrik Bëhme/Elert Ajazaj

Redaktoi: Angjelina Verbica