1. Kalo tek përmbajtja
  2. Kalo tek lista qendrore e navigimit
  3. Kalo tek më shumë oferta të DW

Merkel dhe Macron ftojnë liderët e Ballkanit në Berlin

11 Prill 2019

Më datën 29 prill zhvillohet në Berlin një takim me liderët e Ballkanit. Nismëtarë janë Franca dhe Gjermania. Ballkani është në qendër edhe të vizitës së ministrit gjerman të punëve të Jashtme Heiko Maas në Varshavë.

https://p.dw.com/p/3GaAP
Berlin Angela Merkel empfängt Hashim Thaci, Kosovo
Fotografi: picture-alliance/dpa/B. Pedersen

Kancelarja gjermane Angela Merkel dhe presidenti francez Emmanuel Macron kanë ftuar liderët e Ballkanit të marrin pjesë në Berlin në një konferencë. Në takimin e datës 29 prill do të priten të vijnë "përfaqësues të nivelit të lartë" të vendeve të Ballkanit Perëndimor, Kroacisë, Sllovenisë dhe Komisionit të BE-së, siç bëri të ditur një zëdhënës i qeverisë gjermane për agjencinë gjermane të lajmeve, dpa. 

Sipas zëdhënësit, kancelarja gjermane dhe presidenti Macron, i japin një rëndësi të madhe stabilitetit dhe zhvillimit të rajonit. Në qendër të bisedës do të jenë sfidat e veçanta të rajonit, e sidomos në lidhje me marrëdhëniet mes Serbisë dhe Kosovës, citon zëdhënësin, agjencia e lajmeve, dpa.

Maas në Poloni 

Bundesaußenminister Heiko Maas
Heiko MaasFotografi: DW/M. Luy

Ndërkohë edhe ministri gjerman i punëve të Jashtme, Heiko Maas, viziton të enjten Varshavën për të diskutuar për Ballkanin Perëndimor, bëhet e ditur nga Ministria gjermane e Punëve të Jashtme. 

Polonia do të jetë organizatore e takimit të ardhshëm në kuadër të procesit të Berlinit, që do të mbahet më 5 korrik. Procesi i Berlinit synon me nisma në sektorin e Ekonomisë, Transportit dhe Rinisë që të luajë një rol të rëndësishëm në përmirësimin e marrëdhënieve bilaterale ndërmjet vendeve të Ballkanit Perëndimor.