1. Kalo tek përmbajtja
  2. Kalo tek lista qendrore e navigimit
  3. Kalo tek më shumë oferta të DW

Ndryshimi i klimës: Studiuesit francezë ngrenë alarmin

10 Shtator 2018

Nxehtësi ekstreme në Europë, Japoni, SHBA, zjarre në pyje, shkrirje akujsh. 700 studiues francezë janë të shqetësuar për shpejtësinë e ndryshimit të klimës.

https://p.dw.com/p/34bHh
Arktis Kanada Victoria Strait
Shkrirje e akullnajave në Victoria Strait, KanadaFotografi: picture-alliance/dpa/D. Goldmann

Me një hap të pazakontë 700 studiues francezë i drejtojnë një apel bashkësisë botërore për kërcënimin e katastrofave nga ndryshimet klimatike. Në apelin e publikuar nga gazeta "Liberation" ata kërkojnë me urgjencë hapa të shpejtë për të kufizuar ngrohjen globale. Sfidat e ndryshimit të klimës mund të tejkalohen vetëm me "ndryshime të menjëheshme në kuadër të objektivave të qarta dhe ambicioze" deri në vitin 2023.

Hitzesommer 2018 Deutschland Studenten auf einer verdorrten Wiese
Thatësira në Gjermani, shtator 2018Fotografi: picture alliance / Geisler-Fotopress

Një marrëveshje është shumë pak

Ndryshimi i klimës është realitet gjithnjë e më shumë i ndjeshëm, shkruajnë studiuesit. Si për shembull përmes rritjes së temperaturave mesatare, shkrirjes së akullnajave, rritjes së nivelit të detit, shkatërrimit të ekosistemeve. "Fjalimet nuk mjaftojnë siç e tregojnë shifrat e emetimeve të gazrave karbonikë", kritikojnë ekspertët, ku bëjnë pjesë edhe fizikantë dhe ekonomistë.

Studiuesit kritikojnë ngadalësinë e ecjes përpara të luftës kundër ngrohjes globale. Ata i referohen Marrëveshjes së Parisit, 2015 ku u përcaktua një plan veprimi për të kufizuar ngrohjen globale nën 2 grad Celcius. Por një projekt i përmasave të tilla nuk realizohet thjesht me nënshkrimin e një ujdie, theksojnë studiuesit.