Një skandal tjetër i mbrojtjes së të dhënave po trondit opinionin publik gjerman
7 Tetor 2008Pas skandaleve të tjera këtë vit me tregtinë në internet të të dhënave personale të miliona konsumatorëve dhe me spiunimin e bashkëpunëtorëve në supermarkete, besimi i qytetarëve në mbrojtjen e të dhënave ka humbur.
Shefi i Telekomit Rene Oberman kërkoi në fundjavë falje për skandalin e ri në sipërmarrjen e tij dhe u ofroi një numër të ri telefoni falas të gjithë klientëve të prekur. Gjeste dhe oferta që nuk u mjaftojnë në asnjë mënyrë politikanëve dhe mbrojtësve të të dhënave. Opozita ka kohë që kërkon një ligj më të ashpër.
Shefi i partisë dhe i fraksionit të liberalëve (FDP), Gido Vestervele (Westervele) kërkoi nën përshtypjen e disa skandaleve, duke folur me DW, që mbrojtja e qytetarit të merret më në fund më seriozisht:
"Jo vetëm përballë shtetit dhe shpërdorimeve atje, por shprehimisht përballë koncerneve private, përballë vjedhjeve, përballë përgjimeve në rrjetet tregtare dhe të ngjashmeve. Shpresoj se ky skandal i ri i përsëritur të jetë shkas për të gjitha partitë në qeveri, që të mos i bllokojnë iniciativat tona për një mbrojtje më të mirë të të dhënave personale, por t'i pranojnë ato."
Eksperti për punët e brendshme të Të Gjelbërve, Hans- Kristian Shtrëbele (Ströbele) e quan rastin e vjedhjes së të dhënave personale te Telekomi, pa dorashka "çorbë derrash":
"Dyert e Telekomit me sa duket qenkan të hapura tej e tej për hajdutët e të dhënave personale. Atje duhet të hyjnë në fuqi masa të reja sigurie! Duhet të bëhet një ligj krejt i ri, më i mirë për mbrojtjen e të dhënave."
Wolfgang Bosbah, zëvendëskryetar i Fraksionit Unionist të CDU/CSU-së e akuzon Telekomin se i informoi me shumë vonesë klientët e prekur:
"Të prekurit duhet të qenë informuar patjetër dhe menjëherë."
Shpërdorimet e të dhënave personale duhet të raportohen me detyrim, kërkon kryetari i Komisionit të Punëve të Brendshme, Sebastian Edati (Edathy). Socialdemokrati e kritikoi që në fillim të qershorit mbrojtjen e të dhënave te Telekomi.
"Kur një firmë mund të niset nga fakti që rasti i verifikimit praktikisht nuk ekziston fare, atëherë kjo është e ngjashme kur deklarohet se në tramvaj nuk do të ketë më fatorino. Atëherë, të ndershmit do të vazhdojnë të blejnë një biletë, por numri i atyre që udhëtojnë në të zezë do të jetë më i madh. Kjo mundësi do të përjashtohej, nëse ata do të mësonin se ka të paktën kontrolle sporadike. Dhe kjo duhet të garantohet edhe në fushën e mbrojtjes së të dhënave te firmat."