Protesta masive në Athinë: Maqedonia është greke

Dy javë pas tubimit të madh në Selanik qindra-mijëra demonstrues protestuan në Athinë nën moton emri i  Maqedonisë i takon vetëm Greqisë. "Maqedonia është greke dhe vetëm greke", "Ne jemi maqedonasit e vërtetë" dhe "Larg duart nga Maqedonia" bërtisnin njerëzit që kishin ardhur në Athinë me rreth 2.500 autobus nga i gjithë vendi. Shumica e tyre u vërshuan në Sheshin Sintagma para Parlamentit. Disa demonstrues qenë veshur me kostume tradicionale, si ato të rebelëve grekë që luftonin në fillim të shekullit XIX në Maqedoni kundër bandave bullgare dhe njësive otomane.

Mes stanjacionit dhe pasionit

Studiuesi i shkencave politike Levteris Koussoulis beson, se rifillimi i demonstratave është pjesë tipike e shoqërisë greke, që është ngurtësuar mes stanjacionit dhe pasionit. "Disa në këtë vend ndihen të lidhur në një mënyrë veçanërisht të prapambetur me historinë. Ata bllokohen të kapur pas së shkuarës dhe nuk e kuptojnë, që bota ecën përpara", kritikoi Koussoulis në bisedë me DW.

Në kërkim të një kompromisi

Grekët e pretendojnë emrin Maqedoni si pjesë të trashëgimisë historike dhe u tremben po ashtu pretendimeve territoriale ndaj provincës greke me të njëjtin emër. Edhe sot Athina ende insiston për kërkesën, që vendi fqinj ta ndryshojë emrin "Republika e Maqedonisë" të sanksionuar në kushtetutë.

Por pas ndryshimit të qeverisë në Maqedoni grekët janë tërhequr nga pozicioni i ngurtë. Që prej disa kohësh po pranohet, që vendi fqinj të përdor një emër që përmban mbiemrin "maqedonas". Kësaj linje dëshiron t'i përmbahet kryeministri i majtë Alexis Tsipras. Pas një raundi të ri bisedimesh me ndërmjetësimin e OKB-së u bë e ditur, se qeveria në Athinë e pranon kompromisin për emrin "Gorna Makedonija" (Maqedonia e Epërme).