Reformë që do t’i lehtësojë apo rëndojë qytetarët gjermanë?

Reforma parashikon që duke filluar nga viti 2007 kontributet për sigurimet shëndetësore do të rriten me 0,5 për qind. Duke filluar që nga viti 2008 kostot e përkujdesjes shëndetësore të fëmijëve do të fillojnë të financohen nga tatimet.

Gëzimi në fytyrën e kancelares Angela Merkel dukej haptazi: "Po zonja dhe zotërinj, pra më lejoni t'ju them, se kemi arritur konsensusin për të ardhmen e sistemit tonë shëndetësor." Numrin e madh të masave që do të merren fillimisht, kancelarja kristiandemokrate nuk e përmendi hollësisht. Flitet se do të zvogëlohen shumat që harxhohen pa nevojë dhe do të lehtësohet transparenca. Do të duhet të bëjmë kursime gjithmonë e më të mëdha. Por jo që tani.

Një minus financiar prej 7 miliardë Euro në fillim do të jetë i pashmangshëm, tha kancelarja. Merkel: "Kjo do të thotë, që më 1. Janar të vitit 2007 do t'i rrisim kontributet e sigurimeve me nga 0,5 për qind." Ndërsa nga viti 2008 e më tej, gradualisht do të fillojë financimi i shpenzimeve me anë të tatimeve. Faza e parë do të kapë shumën prej gjysmë miliardi Euro, në fazën e dytë, pra nga viti 2009 ajo do të rritet deri në tre miliardë, derisa të arrihet gjithë shuma e shpenzimeve për përkujdesjen e fëmijëve, që financohet nga shteti, sot në masën 16 Milliardë. Si do të mund të arrihet kjo pa rritjen e tatimeve, shefat e partive për këtë heshtin. Kontributet e sigurimeve shoqërore do të mblidhen të tëra në një fond, i cili do t'u shpërndahet sigurimeve në proporcion të njëjtë me numrin e anëtarëve.

Sigurimeve që këto shuma nuk i mjaftojnë duhet ta zgjidhin vetë financimin e mëtejshëm, për shembull duke ngritur kontributin. Me konceptin e saj kundër rritjes së tatimeve, kancelarja Merkel arriti sukses ndaj partnerëve socialdemokratë. Por shefi i këtyre të fundit, Kurt Bek, nënvizon: "Shërbimi mjekësor nuk do të ulet dhe kjo është një pikë shumë e rëndësishme, sepse u jep njerëzve siguri dhe qendrueshmëri." Vetëm në raste të vogla, për shembull operacionet kozmetike, sigurimet nuk do të paguajnë më. Edhe pagesa e mjekëve do të jetë më e thjeshtë: "Pra është një reformë më afatgjate se një ditë dhe një vit," - përmbledh kryetari i socialdemokratëve, Kurt Bek.

Qëllimi i reformës ishte në fakt që të uleshin kontributet e sigurimeve. Me kompromisin e parë u arrit pikërisht e kundërta. Ato fillimisht do të rriten. Të paktën në planin afatshkurtër. Në atë afatgjatë, koalicioni shpreson që këtë problem ta zgjidhë reforma e tatimeve mbi sipërmarrjet. Edhe për këtë u vendosën piketat e para. Njëra prej tyre është që të vihet edhe një tatim kompensues ndaj të ardhurave nga kapitali. Shefi i partisë së tretë të koalicionit Unionit kristiansocial, Edmund Shtojber: "Jam shumë i bindur, që do të mund t'i shtojmë të ardhurat e shtetit me një shumë të konsiderueshme parash." Reforma shëndetësore dhe ajo e tatimeve mbi sipërmarrjet do të vazhdojë të preokupojë edhe për shumë kohë opinionin dhe median gjermane.