Ushtria amerikane fillon hetimet për krimet e ushtarëve amerikanë në Irak

Ndryshe nga muaji mars kur revista "Time" botoi njoftimet për masakrën e mundshme në Haditha, mediat amerikane po njoftojnë tani intensivisht për raste dhe inicidente të ndryshme në Irak. Kështu p.sh. ushtarët amerikanë duhet të kenë vrarë në Ishaki, 15 km në veri të Bagdadit, në muajin mars 11 vetë, ndër ta pesë fëmijë, njëri prej tyre gjashtë muajsh. Po ashtu shtatë ushtarë amerikanë akuzohen se kanë nxjerrë zvarrë nga shtëpia një civil irakian dhe e kanë pushkatuar atë në rrugë të hapur.

Ndërkohë ushtria amerikane ka filluar hetimet për krime lufte në Irak. Ndaj oficerëve përgjegjës, të cilët ishin përpjekur që të maskonin krimet e ushtarëve kanë filluar hetime. Ministri i Mbrojtjes Donald Rumsfeld thekson: "Në luftë ndodhin gjëra që nuk duhet të ndodhin. Ne kemi filluar hetimet dhe së shpejti do të kemi përgjigjet. Pastaj do të dimë më tepër se çdo të ndodhë menjëherë."

Presidenti amerikan Bush u shpreh personalisht shumë i shqetësuar në lidhje me këto incidente dhe deklaroi: "Në rast se shkelen ligjet, do të ketë dënime."

Ushtarët amerikanë në Irak nuk varen prej ligjeve të shtetit por prej Konventës së Gjenevës për Ligjet e Luftës, në të cilën ndalohen shprehimisht goditjet ndaj civilëve të pafajshëm. Pjesë e trainimit të ushtarëve amerikanë është edhe trajtimi human i popullsisë civile. Drejtuesit ushtarakë amerikanë në Irak dhanë tani urdhër që ushtarët t'u nënshtrohen trainimeve të sjelljes dhe të etikës.

Zëvëndëskomandanti i trupave multinacionale në Irak, Donald Campbell, tha në një intervistë televizive se shkak për gabimet e ushtarëve janë faktorë të tillë si "stresi, frika dhe izolimi". Gjithsesi sipas tij 99,9% e ushtarëve amerikanë në Irak sillen në mënyrë korrekte.