170709 Tschetschenien Politik

Para gati tre vjetësh gazetarja kritike ndaj Kremlinit, Anna Politkowskaja, u vra në shkallët e banesës së saj në Moskë. Shkaqet e vrasjes nuk janë sqaruar as sot plotësisht. Të mërkurën (5.8.) çështja do të hapet përsëri. Para tre javësh (15.7.) u rrëmbye në Çeçeni dhe u gjet më vonë e vdekur në republikën fqinje të Ingushetisë aktivistja për të drejtat e njeriut Natalja Estemirova. Ishte një tjetër vrasje e një personi kritik ndaj regjimit, pas Politkowskajas, Stanislaw Markelovit dhe personaliteteve të tjera. Organizata për të drejtat e njeriut Memorial, për të cilin punonte Estemirowa, dyshon se pas vrasjes fshihet presidenti çeçen, besnik i Kremlinit, Kadirov. Presidenti i Rusisë, Dmitri Medvedev, premtoi se do ta sqarojë çështjen, por mori menjëherë në mbrotje Kadirovin.

Politika e Moskës në Kaukaz dhe roli i pushtetarëve kaukazianë

Karriera e Ramsan Kadirovit nisi me vrasjen e babait të tij, Ahmat Kadirovit, presidentit të dikurshëm të Çeçenisë. Ky u vra me 9 maj 2005 nga një atentat me bombë. Menjëherë i biri e shpalli të vetin postin e mbetur vakant. E gjitha kjo me aprovimin e presidentit të atëhershëm Vladimir Putin, i cili pas përfundimit të luftës së dytë në Çeçeni mbështetej tek Kadirovi.

Ramsan Kadirov, i cili ka qejf të prezantohet në publik si boksier dhe adhurues armësh, e zgjeroi në mënyrë të vazhdueshme pushtetin dhe krijoi një ushtri private me disa mijë burra. Më në fund në vitin 2007 ai u zgjodh president i Çeçenisë. Kandidatët rivalë u eliminuan që më parë. Akuzat se ai mban burgje të fshehta, në të cilat torturohen kundërshtarët e tij, Kadirovi i hedh poshtë.

"E keni fjalën për akuzat e grupit të Helsinkit, që më akuzon, se në ca qilarë paska të burgosur? Kjo është një vogëlsi, një ofezë. Për këtë unë dua t'i hedh në gjyq, sepse ata pohojnë, se unë jap urdhër që të zhduken njerëz.

Si një pasha jeton Ramsan Kadirovi në Goudermess, 40 kilometer larg Groznit. Atje ai ka krijuar një rezidencë, të ruajtur më së miri, me palestra, hotele, pishina. Rinia e admiron, sepse ai ka ndërtuar shkolla, kopshte dhe në rradhë të parë klube sportive, një ndër preokupimet e tij.

Kulti i individit në Çeçeni të kujton nderimin, që i bëhej Stalinit në kohët e Bashkimit Sovjetik.

Kadirovi është i pranishëm kudo. Që ai është përgjegjës për vrasjen e aktivistes të të drejtave të njeriut Natalja Estemirowa, siç besojnë shumë vëzhgues,ai e hodhi poshtë në televizionin rus.

"Kriminelët natyrisht do të dënohen. Unë kam ngarkuar tashmë të gjitha shërbimet speciale dhe autoritetet përkatëse të hetuesisë, që të gjejnë banditët dhe t'i nxjerrin para përgjegjësisë. Një gjë të tillë nuk mund ta durojmë. Kjo vepër është kryer nga njerëz mizorë."

Natalja Estemirowa ishte e vetmja, e cila iu kundërvu Kadirovit dhe e akuzonte atë për tortura, rrëmbime dhe ekzekutime. Në bazë të kërkimeve të saj numri i të rrëmbyerve është rritur përsëri muajt e fundit. Sepse shpesh në Çeçeni rrëmbehen njerëz, për t' u marrë para, siç tregon kjo grua në Grozni, që natyrisht nuk do ta tregojë emrin e saj.

"Dhjetëmijë, pesëmbëdhjetëmijë, njëzetmijë dollarë, kaq kërkohet. Dhe kur pagesa bëhet personi mbetet në burg, ose del që andej kufomë. Kush e bën këtë? Ndoshta shërbimi sekret rus, i cili është ende këtu? Por ndoshta edhe njerëzit e Rasmanit? Kush e di këtë? Paratë i dorëzohen një ndërmjetësi."

Kadirovi ka kryer në mënyrë panderprerë islamizimin e Çeçenisë.

Gratë duhet të mbajnë shami dhe çiftet e martuara nuk duhet të takohen në publik. Korani përcakton gjithnjë e më shumë jetën e përditshme. Parlamenti sundohet nga partia e Kadirovit, ministritë janë nën kontrolline tij, po ashtu si dhe policia dhe drejtësia. Kremlini në Moskë, nuk çlirohet dot më nga fantazmat, që i ka thirrur vetë.

Kadirovi kërkon tashmë më shumë pavarësi nga Rusia dhe më shumë ndikim mbi të gjithë Kaukazin. Themelimi i një shteti kalifat, në të cilin të bëjnë pjesë Dagestani, Ingushetia, Kabardino-Balkaria dhe Karaçai Çirkizia, është një ide e tij. Një koncept, që në Moskë do të ketë pak popullaritet, por që në Kaukaz gjen gjithnjë e më shumë përkrahës.

Autor: Hermann Krause/Angjelina Verbica

Redaktoi: Fabian Schmidt